Зарим нэг судлаачийг эс тоовцол хэний ч мэдэхгүй нэг орос хүний хөшөөг 85 сая төгрөгөөр босгох шийдвэрийг өчигдөр хотын удирдлагууд гаргалаа. Тодруулбал, Нийслэлийн Иргэдийн Төлөөлөгчдийн Хурлын Тэргүүлэгчдийн өчигдрийн хуралдаанаар Иван Яковлевич Коростовецийн дурсгалыг мөнхжүүлэх зорилгоор хөшөөг нь босгож, РЦНК-ын өмнө байрлуулах тухай асуудлыг хэлэлцэн баталсан юм.Тус хөшөөг босгох мөнгө нь Соёл Спорт Аялал жуулчлалын сайд Ц.Оюунгэрэлийн багцаас гарах бөгөөд нийт 85 сая төгрөг шаардлагатай аж.
Уг хөшөө нь зургаан метрийн өндөртэй байх гэнэ. Иван Яковлевич Коростовецийн тухай товч танилцуулбал, тэрбээр 1911 оны Үндэсний эрх чөлөөний хувьсгалын үеийн Хаант Орос улсын сайд, нэрт дипломатч, дорно дахины судлаач хүн.
Мэдээж Иван Яковлевич Коростовецийн тухайн цаг үедээ хийсэн бүтээсэнг энд үгүйсгэх гэсэнгүй. Гэхдээ түүний хөшөөг босгох нь манай энэ цаг үед үнэхээр шаардлагатай юу?. Соёлын салбарын нэн даруй хийх ажлуудын нэг мөн үү?.
85 сая төгрөгөөр юу хийж болох вэ?. Энэ бол нэг цэцэрлэг босгох хөрөнгөний 3/1 –ийг эзлэх мөнгө. 2013 он улсын төсөвт 100 гаруй хүүхэд хүмүүжих нэг цэцэрлэг барихад 280 сая төгрөг төсөвлөсөн гэж тооцоолбол энэ мөнгө нэг цэцэрлэг босголцох хэмжээний хөрөнгө юм. Нөгөөтэйгүүр ССАЖ-нд нэг орос судлаачийн хөшөөнд босгохоос өөр хийх ажил их баймаар юм. Цаана чинь залуус номын сангүй гэж хэлэн талбай дээр ном уншиж байна. Учир нь нийслэлд хоёрхон байдаг номын сангийн нэг болох Д.Нацагдоржийн нэрэмжит төв номын сан гэхэд одоо хүртэл засвар нь дуусаагүй гэж уншигчдыг хүлээж авахгүй байж байна.
Өнгөц, урсгал засвар хийхэд дахиад л бороо усанд тааз, хананаасаа эхлээд мууддаг гэж тус номын сангийн хэлж сууна. Бүрэн хэмжээний сайн засвар хийхэд их хэмжээний мөнгө хэрэгтэй гэнэ. Д.Нацагдоржийн нэрэмжит номын сангийн засварын ажилд гэхэд л нийт 495 сая төгрөг зарцуулагдаж байгаа гэж байгаа. Үүнд хаант Орос улсын үеийн сайдын хөшөөг босгох мөнгөө нэмэрлэвэл илүү үр дүнтэй ажил болох биш үү.
Энэ мэт үргүй зардлаа нийлүүлж байгаад Байгалийн түүхийн музейн шинэ байрыг босгоход зориулж болмоор л санагдана. 85 сая төгрөг бол бидний татварын мөнгө. Бидний мөнгөөр бидэнд зориулсан ажил яагаад хийж болохгүй гэж. Ямартай ч Иван Яковлевич Коростовецийн хөшөөг босгохоос өөр хийх чухал ажил соёлын салбарт их бий. Манай орны түүх соёл, ахуй амьдралтай танилцахыг хүссэн жуулчдын цуваа тасрахгүй. Гэвч тэдэнд үзүүлэх онгон дагшин байгаль, нүүдэлчин соёл уламжлалаас гадна түүхийн гэрч болсон музейн асуудал хөндөгдөж эхэлдэг. Богд хааны ордон музей нь хэзээ мөдгүй нурж унах нь холгүй байхад Хэлмэгдэгсдийн музей нь хотын төвд үзмэр болон байрлаж л байна. Уг нь бол улс төрийн их хэлмэгдүүлэлтийн үеийг энэхүү музейд очоод үзэх боломж байгаа ч одоо цагт бол үлгэр бололтой.
Иймээс засварт орж, хэлмэгдсэн музейнүүд хэзээ нэг үүд хаалгаа нээж ард иргэддээ үйлчлэх юм бол салбарын сайдаа. Улаан оросыг цагаан оросоор солилоо гээд юу өөрчлөгдөх гэж. Үнэхээр хөшөө босгохыг хүсээд байгаа бол Манлайбаатар Дамдинсүрэнгээс эхлээд хөшөөг нь мөнхжүүлэх ёстой олон хүний нэрс хөвөрч л байна шүү дээ.
24tsag.mn
Сэтгэгдэл (18)