2014 оны Сочигийн өвлийн олимпийн наадам түүхэнд байгаагүй их зардал гаргасан нь олон нийтийн анхаарлыг их татах болсон юм. 2008 оны Бээжингийн зуны олимпод 40 тэрбум доллар зарцуулсан бол Сочигийн өвлийн олимпийн бүтээн байгуулалт 51 тэрбум долларын өртгөөр бүтжээ. Өөрөөр хэлбэл, энэ нь НАСА-гийн Ангараг гариг дээрх судалгааны зардлаас гурав дахин их гэсэн үг юм. Гэтэл энэхүү зардлын 25-35 доллар нь авилгалд идэгдэж, алга болсон гэж шүүмжлэгчид цөөнгүй байгаа ажээ. Олимпийн бүтээн байгуулалтад зарцуулсан энэ хөрөнгийг дэлхий нийтэд тустай ямар арга хэмжээнд зарцуулах бололцоотой байсан талаарх саналаа шинжээчид дэвшүүлж байна.

1.    Оросуудын олимпод зарцуулсан хөрөнгөөр дэлхий өнцөг булан бүрт амьдарч буй бүх хүүхдүүдийг вакцинд хамруулах боломжтой. Нэг вакцин 0,18 долларын үнэтэй бөгөөд дэлхийн эрүүл мэндийн байгууллагаас гурван ширхэг тун нь хүүхдийн эрүүл мэндийг бүрэн хамгаалж чадна гэж үздэг. 0,50 доллараар нэг хүүхдийг хамгаална гэж тооцвол 50 тэрбум долларын хөрөнгөөр 100 тэрбум хүүхдэд туслах боломжтой.

2.    2015 он гэхэд дэлхийн хүн амын 75 хувьд нь ус цэвэршүүлэх оновчтой систем шаардлагатай болно гэсэн тооцооллыг гаргасан байдаг. Дэлхийн эрүүл мэндийн байгууллагаас 2015 он хүртэл жил бүр 14 тэрбум долларыг энэ салбарт зарцуулна гэж тооцжээ. Тэгвэл олимпийн наадмын зардлаар энэ төслийн 25 хувийг санхүүжүүлж болох нь ээ.
3.    Олон улсын судлаачдын багаас дэлхий дээр устаж алга болж буй нэн ховор амьтдыг хамгаалахад жил бүр 80 тэрбум доллар зарцуулах шаардлагатай болохыг мэдэгджээ. Гэхдээ 3,9 тэрбум доллараар туйлын ховор амьтдыг эхний ээлжинд хамгаалж чадна гэж үздэг. Тэгвэл 51 тэрбум доллараар ховордсон амьтдыг 12 жил хамгаалахад зарцуулж болох байв.
4.    Сирийн иргэний дайны уршгаар 2 сая хүн харийн оронд дүрвэсэн. Үүнээс гадна 4 сая хүн дотооддоо шилжин суурьшсан юм. НҮБ-аас 2014 онд Сири дэхь тусламжийн ажиллагаанд 6,5 тэрбум доллар зарцуулна гэж тооцжээ. Тэгвэл 51 тэрбум доллараар Сирийг хэдэн жилийн турш санхүүжүүлэх байлаа.
5.    Дэлхийн хүнсний хөтөлбөрөөс зургаан хүүхэд тутмын нэг нь амьжиргааны баталгаажих түвшнээс доогуур амьдарч байна гэсэн тооцооллыг гаргажээ. Тэдгээрийн дотор таваас доош насны хүүхдүүдийн 45 хувьд нь хүнсний нэмэлт тэжээл шаардлагатай байна. Жилд нэг хүүхдийг шаардлагатай эрдэст бодисоор хангахад 180 доллар хэрэгтэй гэж тооцвол, 51 тэрбум доллараар 280 сая хүүхдийг өлсгөлөнгөөс аварч болох юм.

6. Дэлхий дээр тулгамдаж буй бас нэгэн асуудал бол боловсрол олгож буй багш нарын цалин хэт доогуур байгаа явдал юм. Багш нарын жилийн дундаж цалин 38 мянга 215 доллар гэж тооцвол Сочигийн олимпийн мөнгөөр нэг сая гаруй багшийн цалинг олгох бололцоотой гэнэ.

7. Америк оюутнууд жилд дунджаар 30 мянган долларын зээл авч суралцдаг гэсэн дүн бий. Хэрэв онлайнаар биш, орчинд нь очиж суралцвал зардал үүнээс ч өндөр гарна. Гэхдээ сургуулиа төгссөний дараа өрөө төлөх нөхцөлтэйгөөр заал авах бололцоотой. Тэгвэл 10 мянган оюутанд жил бүр 10 мянган долларын тэтгэлэг олгоно гэж үзвэл, 50 тэрбум доллараар оюутнуудыг 500 жил тэтгэх юм.