Улсын Ерөнхий прокурорын 2013 оны 01 дүгээр сарын 25-ны өдрийн А/12 дугаар “Үндэсний монгол бичгийг сэргээн хэрэглэх тухай” тушаалыг хэрэгжүүлэх хүрээнд прокурорын байгууллагын хэмжээнд монгол бичгийн сургалтыг үе шаттайгаар амжилттай зохион байгуулж, дүгнэлээ.

Прокурорын байгууллагын гадаад харилцаа өргөжин тэлж, гадаадад  ажлын айлчлал 5-н удаа хийж, олон улсын сургалт, семинарт 2 , гадаадад зохион байгуулагдсан сургалтанд 8 удаа хамрагдаж, гадаадын 2 оронд туршлага судалсан бөгөөд нийт 89 прокурор гадаад, 88 прокурор дотоод сургалтанд оролцжээ.

Улсын Ерөнхий Прокурорын газар 2009 онд 5 улс оронтой 13 эрүүгийн хэргийн хүсэлт даалгаварын асуудлаар харилцаж байсан бол  2013 оны байдлаар нийт Эрх зүйн туслалцаа харилцан үзүүлэх чиглэлээр, Монгол  Улсаас  гадаадын улс орнуудтай байгуулсан “Иргэн, гэр бүл болон эрүүгийн хэргийн талаар эрх зүйн туслалцаа харилцан үзүүлэх тухай гэрээ”, хэлэлцээрүүдийн  хүрээнд нийт 55 даалгавар, хүсэлтийн даалгавар, хүсэлтийг хүлээн авч зохих  журмын  дагуу  шийдвэрлэх арга хэмжээ авсан.

Өмнөговь аймгийн Ханбогд суманд сум дундын прокурорын газарт ажиллах прокуроруудыг томилж үйл ажиллагааг нь эхлүүлсэн, Өвөрхангай аймгийн Хархорин, Хэнтий аймгийн Бор-Өндөр дэх сум дундын прокурорын газруудын барилгад өргөтгөл, их засвар мөн Улаанбаатар хотод Прокурорын сургалт судалгааны төвийн конторын барилгын их засварын ажлыг хийж дуусган ашиглалтанд хүлээн авсан.

Улсын төсвийн хөрөнгөөр баригдах зарим аймгийн прокурорын газрын конторын барилга барих, тендерийг зарлан шалгаруулалт явуулж, Дундговь аймаг, Ховдын Булган, Завханы Тосонцэнгэл дэх сум дундын прокурорын газруудын барилгыг тендерт заагдсан нөхцлийн дагуу ажил дуусгах гэрээний хугацаанд чанарын “сайн” үнэлгээтэйгээр, мөн прокурор, ажилтнуудын 112 айлын орон сууцыг тус тус ашиглалтанд хүлээн авчээ.

2013 онд прокурорын байгууллагын үйл ажиллагаагааг олон нийтэд ил тод болгох, аймаг, нийслэл, тээвэр дүүргийн прокурорын газруудаас хийсэн ажлыг УЕПГ-ын вэб сайтаар сурталчлах, олны анхаарал татсан болон хэвлэл мэдээллийн хэрэгслээр гарсан хэргийн шийдвэрлэлтийн талаар нийтэд мэдээлэх зэрэг ажлуудыг зохион байгуулан хэрэгжүүлэхэд голлон анхаарсан ба УЕПГ-ын вэб сайтад 616  мэдээ мэдээллийг байршуулсан нь өнгөрсөн онтой харьцуулахад  1,9 хувиар өссөн, сонинд 60, телевизэд 218 удаа мэдээ мэдээлэл гаргасан байна.

Прокурорын байгууллага прокурорын үндсэн хяналттай холбогдуулан 13950 гомдол, хүсэлт, мэдээлэл хүлээн авсан нь өнгөрсөн оныхоос 8.5 хувиар өсчээ. Мөн төрийн байгууллага, албан тушаалтан, иргэдээс прокурорын байгууллагад гаргасан 719 өргөдөл, гомдлыг хүлээн авч, шийдвэрлэжээ.