Улсын Ерөнхий прокурорын газраас ял эдлүүлэх ажиллагаанд тавих хяналтын чиглэлээр өнгөрсөн онд дэвшүүлсэн зорилтыг хэрэгжүүлэх, ялтны эрхийг хангах, ялтны гаргасан өргөдөл, гомдол, хүсэлтийг хуульд заасан хугацаанд шуурхай шийдвэрлэж барагдуулах, гэмт хэргийн улмаас учирсан хохирлыг нөхөн төлүүлэх, хорихоос өөр төрлийн ялыг хууль журамд заасны дагуу бодитой хэрэгжүүлэх, цагдан хорих, албадах байруудад хоригдож байгаа хоригдогчийн эрхийг хангуулахад хяналтын ажлаа чиглүүлэн ажиллажээ.

Улсын Ерөнхий Прокурорын 2012 оны А/24 тоот тушаалаар 11 хүний бүрэлдэхүүнтэй ажлын хэсэг байгуулагдан “Албадан ажил хийлгэх” ял, “Тодорхой албан тушаал эрхлэх, үйл ажиллагаа явуулах эрх хасах ялыг эдлүүлэх журам”-ыг шинэчлэн боловсруулж Хууль зүйн сайдын 2013 оны 6 дугаар сарын 11-ний өдрийн  А/130, А/131 тоот тушаалаар батлуулан хяналтын ажилд мөрдүүлэн ажиллаж байна.

Ял эдлүүлэх ажиллагаанд тавих хяналтын чиглэлээр прокуророос нийт 788 удаа шалгалт хийж, ял эдлүүлэх үйл ажиллагаатай 4481 удаа танилцаж, 1882 зөрчил илрүүлж зөрчлийг арилгуулахаар прокурорын шаардлага 203-ыг бичиж, 6 албан хаагчид эрүүгийн, 195 хүнд сахилгын арга хэмжээ тооцуулж, 345 хүний  зөрчигдсөн эрхийг сэргээсэн байна.

            Баривчлах, хорих ял эдлүүлэх ажиллагаатай холбоотой Шүүхийн шийдвэр гүйцэтгэх алба, хорих ангийн даргын гаргасан 2376 тушаалыг хянаж, хууль зөрчсөн 49 тушаалыг хүчингүй болгож, 3 тушаалыг өөрчлүүлсэн байна.

Прокурор шүүхийн шийтгэх тогтоол биелүүлэхтэй холбоотой 3015 ялтны хувийн хэргийг хянаж, хуульд заасан шаардлага хангаагүй 618 ялтны хувийн хэргийг хорих ангид нь буцааж, шүүхээр 2367 ялтны шийтгэх тогтоол биелүүлэхтэй холбоотой асуудлыг шийдвэрлүүлжээ.

Хорих ангид ял эдэлж байгаа ялтнуудын гэмт хэргийн улмаас бусдад учруулсан хохирлыг барагдуулах, нөхөн төлүүлэхэд тавих прокурорын хяналтыг сайжруулахад анхаарч ажилласнаар 1035 ялтнаас 6 тэрбум 200 сая төгрөгийн төлбөрийг гаргуулж, хохирлыг нөхөн төлүүлсэн байна.

Тайлангийн хугацаанд хууль бусаар баривчлагдсан, цагдан хоригдсон 34 хүнийг прокурорын тогтоолоор суллаж, 172 хоригдогчийн зөрчигдсөн эрхийг сэргээжээ.

2013 онд 295 ялтанд шүүхээс нийт 1448347.8 төгрөгийн торгох ял оногдуулснаас 1100508.9  мянган төгрөгийн ял биелэгдэж, торгох ялын биелэлт улсын хэмжээнд 76,0  хувьтай болсон нь  өмнөх оныхоос 13 хувиар өссөн байна.

Хорихоос өөр төрлийн ял эдлэхээс зайлсхийсэн буюу тогтоосон журмыг зөрчсөн торгох ялтай 14, албадан ажил хийлгэх ялтай 8, хорих ялыг тэнсэж хянан харгалзсан 14, ял хойшлуулсан 4, нийт 40 ялтны асуудлыг шүүхэд шилжүүлж, шүүхээс 38 ялтны ялыг хорих ялаар солиулсан нь хорихоос өөр төрлийн ялын биелэлтэнд прокуророос тавих хяналтын ажилд тодорхой ахиц гарсныг харуулж байна.

Гэмт хэргээс урьдчилан сэргийлэх ажлын чиглэлээр харьяа прокурорын газрууд 788 мэдэгдэл бичиж, 531 удаа яриа таниулга, мэдээлэл, зөвлөгөөн зохион байгуулан 103586 хүнийг хамруулсан байна.