"Аса" циркийн менежментийн хувьчлал олон асуудлыг дагуулж эхлээд байгаа. Энэ байдлаас болж ШӨХТГ-ын дарга О.Магнай, Д.Дагвадорж аварга хоёр шүүхдэлцэх дээрээ ч тулсан.

Харин бусад холбогдох албаныхан ямар байр суурьтай байгааг тодрууллаа.

ТӨХ-ны захирал Д.Цогтбаатар: Гэрээнд заасан үүргээ биелүүлээгүй бол олон юм ярих шаардлагагүй

-Асан циркийн асуудал сүүлийн үед шуугиан тарьж байна. ТӨХ-ны зүгээс ямар байр суурьтай байгаа вэ?
-Циркийн асуудлыг бид авч үзнэ. Өөрөөр хэлбэл гэрээндээ циркийг циркээр нь ашигла гэж заасан байгаа.  Тэгэхээр бид хаа хаанаа иргэн хүнийхээ үүргийг биелүүлэх ёстой. Хувьчилж авсан л бол гэрээнд заасан үүргээ биелүүлэх ёстой. Хэрвээ чадаагүй бол олон юм ярих шаардлагагүй.

 -Их аварга Д.Дагвадорж болохоор бид гэрээгээ зөрчсөн зүйл байхгүй гэж байсан. Энэ тал дээр?

-Энэ асуудлыг шүүх тогтооно. Гэрээнийхээ үүргийг хэрхэн биелүүлснийг шүүх тогтоогоод өгөхөөр бид засаж залруулах ажилруугаа л орох ёстой.  Тэр хүмүүс заавал эсрэг байдлаар тайлбарлаад байхаасаа илүү засаж залруулах л хэрэгтэй. Хэрвээ тэд зориулалтын журмаар нь ашиглаад явбал бид энэ тал дээр ярих зүйл байхгүй. Бид бие биенээ хамгаалсан зүйл яриад хэрэггүй" гэлээ.

ССАЖЯ-ны сайд Ц.Оюунгэрэл: Соёлын байгууллага 100 хувь улсдаа ирэх ёстой гэдэгтээ би санал нийлдэггүй

- "Аса" циркийн хувьчлалын талаар ямар байр суурьтай байна?

-“Аса” цирк дээр менежментийн хувьчлал явагдсан байдаг. Менежментийн хувьчлал бол циркийг циркээр нь ажлуулна, харин менежментийг бид зохицуулна гэж хувьчилсан гэсэн үг. Тэгэхээр менежментийн хувьчлалын үр дүнг менежмент явагдаж байгаа үгүйгээр шалгадаг. 1990-иэд онд маш олон барилга байгууламжийг менежментийн бус барилгын хувьчлалт хийсэн. Тэгэхээр аль нь барилгын хувьчлалт явагдсан, аль нь үйл ажиллагааны хувьчлалт явагдсан бэ гэдгийг ялгаж салгаж байж шалгалт явагддаг. “Аса” циркийн хувьд ШӨХТГ бол менежментийн үйл ажиллагааны шалгалтыг хийсэн гэж ойлгосон. Тиймээс цирк төлөвлөгөөт арга хэмжээгээ сэргээж ав. Үүнийг хийж чадвал хувьчлалыг хэвээр үлдээнэ гэж ойлгосон.

-Соёлын чиглэлээр үйл ажиллагаа явуулдаг байгууллагууд эхнээсээ хувьчлагдаад эхэлсэн. Тухайлбал, “Ард”, “Од” кино театр  хувьчлагдаж, түрээсийн хэлбэрлүү шилжсэн. Эдгээр дээр салбарын яамны зүгээс ямар бодлого баримталж байгаа юм?

-Театр, номын сан, кино театрын хувьчалыг тухайн үед обьектийн хувьчлалаар хувьчилсан. Обьектийн хувьчлал бол менежментийн хувьчлалаас тэс өөр. Өөрөөр хэлбэл, тухай обьектийг аваад энэ обьектийг өөрийнхөө ашигтай гэж бодож байгаа хэлбрээрээ ашиглана гэсэн үг. Тэгэхээр эхний ээлжинд аль нь обьектийн, аль нь менежментийн гэдгээ ялгаж салгах хэрэгтэй.  Ерөнхийдөө соёлын байгууллага 100 хувь улсдаа ирэх ёстой гэдэгтээ би санал нийлдэггүй. Учир нь төрийн бодлого тогтвортой байх ёстой.  Тухайн үед төр обьект гэж үзээд обьектоо хувьчилсан бол эргүүлээд төрийнх гэж хураагаад авбал хувьчилж авсан хүндээ шударга бус зүйл.  Тиймээс обьект хувьчилсан бол эргэлт буцалтгүй байх ёстой.