24tsag.mn cайт УИХ дахь уяач гишүүдийг танилцуулж байна.
Д.Батцогт
УИХ-ын
гишүүн, УИХ-ын Нийгмийн бодлого, боловсрол, соёл шинжлэх ухааны байнгын
хорооны дарга Д.Батцогт энэ жилийн наадмаас эхэлж үндэсний их баяртаа
морь уралдуулж буй юм байна. Ховд аймгийн уяачдын холбоог тэргүүлдэг
түүнийг нөхөд нь “Уяачдын холбооны тэргүүн байж морь уяхгүй байхаар
яадаг юм бэ” гэж зөвлөсний дагуу бэлгэнд авсан үрээгээ сойжээ. Үрээг нь
УИХ-ын гишүүн Х.Болорчулуун бэлэглэсэн гэнэ. Харин хэн гэдэг уяач
үрээнийх нь уяа сойлгыг тааруулж байгаа нь тодорхойгүй аж. Юутай ч
өнгөрсөн жилийн наадамд УИХ-ын гишүүн Д.Батцогтын хар азарга аймгийнхаа
наадамд айрагдсан тухай дуулгаж ирсэн болохоор үрээ ч бас гайгүй давхиж
мэдэх юм шүү.
Г.Батхүү
Монгол улсын манлай уяач гишүүн УИХ-д нэлээд хэд бий. Тэдний дундаас хурдан удмын хамгийн олон адуутай хүн нь Г.Батхүү юм. Тэрээр хурдан морь сонирхохын зэрэгцээ анч нохойнд ч бас мөнгө хайрладаггүй нэгэн. Наадам болгоноор эгшиглэдэг “Толин хул” дууг ч түүнийг зохиосон гэдэг.
Б.Наранхүү
УИХ-ын гишүүн Б.Наранхүүгийн хээр азарга ардын их баяр наадмаар түрүү магнай болж байсан юм. Тэрбээр улс төрийн хүрээнд орж ирэхээсээ өмнө сайн морьдоороо танигдсан гэдэг. Сонгуулийн сурталчилгаандаа ч уяач, бөхчүүдийг оролцуулсэн гэх мэр сэр яриа байдаг.
Су.Батболд
Манлай уяач Сундуйн хүү гэдгээр нь Төв аймгийнхан, морины хорхойтнууд ч анддагүй УИХ-ын гишүүн С.Батболд жил бүрийн наадамд хурдан адуугаа уралдуулдаг. 2009 онд Төв аймгийн наадамд хязаалан насанд уралдсан хүрэн халзан үрээ нь хол тасархай түрүүлж байв. Су.Батболд гишүүний том хүү ч мөн өвөө, аавынхаа сонирхлыг өвөлсөн хурдан морины хорхойтон аж.
Ч.Улаан
МАХН-ын дэд дарга, манлай уяач Ч.Улаан улс төрч дундаа хурдан морь ярих хоббитой хүмүүсийн нэг. Түүнийг Сүхбаатар аймгаас олон удаа сонгогдсон нь морьтой холбоотой гэж ярих нь бий. Түүнийг Сүбхаатар аймгийн морьдыг үнэд хүргэсэн хүн гэж хэлдэг нь үнэний ортой. Сүхбаатарын сумын наадамд түрүүлсэн морь өдгөө 20-30 сая төгрөгөөс буухгүй болсонд Ч.Улаан гишүүний гавъяа гэдэг аж.
Ц.Даваасүрэн
Бие даагч гишүүн болсон Ц.Даваасүрэнгийн уясан адуу энэ жил өнгөтэй байна. Ц.Даваасүрэнгийн буурал азарга өчигдөр наймд давхиж эзнээ баярлууллаа. Тэрбээр хэвлэлийнхэнд адуу, морины тухай яриад байдаггүй, харин чимээгүйхэн наадамд морио сойж суудаг нэгэн юм.
Х.Баттулга
МоАХ-ны тэргүүн Х.Баттулгын хувьд энэ жил хэд хэдэн адуу сойгоод байгаа. Түүний алаг морь өмнө нь улсад түрүүлж байсан түүхтэй юм.
Д.Бат-Эрдэнэ
“Ажнай” корпорацийн ерөнхийлөгч Д.Бат-Эрдэнийн Ембүү халзан азарга өнгөрсөн жилийн наадмын түрүү магнай болсон. Ембүү халзанаас өөр сүргийн манлай болсон хурдан хүлгүүд түүнд олон бий. Түүнийг Өмнөговийн уяач, бөхчүүдийг жил бүр ивээн тэтгэдэг гэлцдэг.
М.Энхболд
Төв аймгийн Баян сумын уугуул, ММСУХ-ны ерөнхийлөгч Миеэгомбын Энхболд бол УИХ дахь хамгийн хашир туршлагатай уяач. Түүний хурдан буянгууд түрүү айргийн тавд орж байсан түүхийг жагсаавал уртаас урт жагсаалт гарна. Түүнчлэн тэрээр Төв аймгийнхаа сум бүрийн уяачдын холбоонд нэгдүгээр үеийн эрлийз үрээ бэлэглэж, сум бүрийг эрлийз адуутай болгож байжээ.
Сэтгэгдэл (15)