Хятадын банк Монголд салбараа нээхээр болсон тухай мэдээлэл энэ оны эхнээс яригдаж санхүүгийн салбарт багагүй маргаан дэгдээгээд байгаа. Нэг хэсэг нь “Хятадын банк орж ирвэл Монголын банк санхүүгийн салбар өрсөлдөж чадахгүй. Жижиг орны хувьд энэ үндэсний эрх ашиг цаашлаад эдийн засгийн бие даасан хараат бус байдалд шууд нөлөөтэй” гэж тайлбарлаж байна. Нөгөө талд “Хятадын банк орж ирснээр манай санхүүгийн зах зээлд өрсөлдөөн бий болно, зээлийн хүү буурч бизнес эрхлэгчдэд таатай нөхцөл бүрдэнэ, гадаад банк орж ирвэл тухайн орны аль нэг банктай хамтарч л таардаг, тэртэй тэргүй манай банкууд бүгд гадаад эх үүсвэрээс хөрөнгө босгож байгаа, энэ шат дамжлагийг л байхгүй болгож зээлийн эх үүсвэрийг шууд оруулж ирдэг болно” гэж тайлбарлах эдийн засагчид ч бий.

    Монгол Улсын хууль тогтоомжийн дагуу гадаадын аливаа банк манай оронд нэг жил төлөөлөгчийн газраа ажиллуулсаны дараа салбар байгуулах хүсэлтээ илэрхийлж түүнийг Монгол банкны Ерөнхийлөгч баталгаажуулж зөвшөөрснөөр Засгийн газарт уламжлан шийдвэрлэдэг ажээ. Одоогийн байдлаар Монгол Улсад “Bank of  China”, Их Британийн “Standard Chartered”,  Голландын ING, Японы “Sumitomo Mitsui”, “Bank of Tokyo Mitsubishi UFJ” зэрэг гадаадын таван банк үйл ажиллагаа явуулж байгаагаас Хятадын банкнаас бусад нь салбараа нээх хүсэлтээ гаргаад байгаа гэдгийг эх сурвалж мэдээллэж байсан. Хятадын банкны хувьд төлөөлөгчийн газраа нээгээд нэг жил болж байгаа ч салбар нээх талаар санал гаргаагүй байна гэж албаны эх сурвалжууд мэдээллэж байсан.

    Тэгвэл Хятадын банк салбараа нээх хүсэлтээ саяхан гаргасан болохыг эх сурвалж мэдээллэж байна. Тэд Монголын “Туушин” компанид анхны зээлээ олгосон бөгөөд цаашид ч зээл авах хүсэлтэй компаниудтай идэвхтэй яриа хэлэлцээрт ороод байгаа. Ялангуяа манай барилгын компаниуд урт хугацаатай, богино хүүтэй Хятадын банкны зээлд хамрагдахаар уртаас урт дараалал үүсгээд байгаа гэнэ. Монголын санхүүгийн салбарт сандрал авчраад байгаа Хятадын банк “Central Tower” барилгын 13 давхарыг тэр чигт авч их засвар оруулаад байгаа. Банкны аюулгүй систем, сүлжээ тоног төхөөрөмжийн Хятадын төрийн өмчит “Huwai” компани гүйцэтгэж байгаа болохыг эх сурвалж баталж байна.

    Ийнхүү санхүүгийн салбарт маргаан дэгдээгээд байгаа Хятадын банк Монголд салбараа нээхээр шийдвэртэй хөөцөлдөж эхэлсэн нь тодорхой болж үүнд нь тус улсаас манай оронд суугаа онц бөгөөд бүрэн эрхэт элчин сайд нь онцгой анхаарч хүч хаян манай төр засгийн удирдлагуудтай идэвхтэй уулзаж эхлээд байна.

    Эх сурвалжийн мэдээллэж байгаагаар Ерөнхий сайд Н.Алтанхуяг болон танхимын бусад сайд нар нь Хятадын банкны салбарыг нээх талаар нэгдсэн шийдэлд хүрсэн гэнэ. Ялангуяа эдийн засгийн хөгжлийн сайд Н.Батбаяр, дэд сайд О.Чулуунбат нар үүнийг нэлээд идэвхтэй дэмжиж хөөцөлдөх болсон гэнэ. Тэр ч бүү хэл салбараа нээвэл Манай улсад үзүүлж болох тусламж, хөнгөлөлт, хөрөнгө оруулалтуудаа ч санал болгосон гэх. Улс орны эдийн засаг муудаж, гадаадын хөрөнгө оруулалт эрс буурч Монгол улс долларгүй болсноор төгрөгийн ханш 40 хувиар унаад байгаа. Иймд Хятадын банкны салбарыг оруулж ирж хямд эх үүсвэртэй зээлээр бизнесийг дэмжих нь маш бодитой гарц болно гэж эрх баригчид үзэж Монгол банкны Ерөнхийлөгч Н.Золжаргалыг уг асуудлыг яаралтай батламжлан оруулж ирэхийг үүрэгджээ.

    Харин Н.Золжаргал уг саналыг шийдвэрлэхгүй зугтсаар хүнд олдохгүй яваа гэнэ. Эх сурвалжуудын мэдээллэж байгаагаар Н.Золжаргалд Хятадын банкыг эсэргүүцэх хоёр шалтгаан буй гэнэ. Нэгдүгээрт тэрээр Худалдаа хөгжлийн банкны Б.Мэдрээ Д.Эрдэнэбилэг нартай ажил, амины урт зузаан холбоотой. Банкны салбарынханы лоббиг хамгаалж Хятадын банк орж ирэхийг зөвшөөрөхгүй байгаа. Хоёрдугаарт Хятадын банкыг оруулж ирвэл ард иргэд, улс төрчдийн зүгээс багагүй эсэргүүцэлтэй тулгарах болно гэдгийг тооцоолж уг асуудлаас аль болох зайлсхийж байгаа гэдгийг эх сурвалж мэдээллээ.

    Ямартай ч тэрээр энэ зунжингаа эрх баригчдад баригдалгүй гадаад, дотоодоор явж асуудлаас аль болох зайлсхийсээр яваа гэдгийг эх сурвалж онцолж байна.