Цагдаагийн байгууллагын алба хаагчдын авлига, хээл хахууль, хүнд суртлын талаар мэдээлэл хүлээн авах 126 тусгай дугаарын утсыг ажиллуулаад удаагүй байгаа. Энэ хүрээнд иргэдээс дуудлага мэдээлэл ирдэг ч дийлэнхи нь цагдаагийн алба хаагчийн хууль ёсны шаардлагыг биелүүлэлгүй, архи согтууруулах ундааг хэтрүүлэн хэрэглэж, цагдаагийн алба хаагчийн өмнөөс эсэргүүцэх, үг хэлээр доромжлох, улмаар энэ байдлаа зөвтгөж 126 тоот утсанд алба хаагчийн эсрэг үндэслэлгүй мэдээлэл өгдөг байна.

Тухайлбал, Говь-Алтай аймагт үйл явдал ийн өрнөжээ. Тус аймагт барилгын ажил гүйцэтгэж байсан БЗД-ийн харьяат иргэн Т гэгч нь аймгийн төвийн баранд хэсэг нөхдийн хамт архидан согтуурч байгаад “Гар утсаа алдлаа” хэмээн цагдаа дуудаж асуудал үүсгэжээ. Дуудлагын дагуу цагдаагийн алба хаагч ирж шалгаад алдагдсан гэх гар утсыг нь нэн даруй олж өгсөн байна. Гэсэн хэдий ч архиндаа хөлчүүрхсэн Т нь ойр орчимдоо агсамнаж, түүгээр ч барахгүй дуудлагын 126 дугаарын утсаар “Танай цагдаа намайг хөх няц болтол зодож, баруун нүдийг цохиж гэмтээлээ, тэгсэн хэрнээ нутгийн залуустай дотно мэндэлж, илт нутгархаж байсан” гэж мэдэгджээ.

Энэ дагуу цагдаагийн байгууллагын холбогдох албаны хүмүүс шалгахад тэрээр архи согтууруулах ундааг хэтрүүлэн хэрэглэж болсон үйл явдлыг тодорхой санахгүй байгаа, биед нь үүссэн гэмтэл шарх байхгүй байснаас гадна өөрөө 126 дугаарын утсанд маргааш өдөр нь дахин залгаж, цагдаагийн алба хаагчийг гүтгэсэн талаараа уучлал хүссэн байна. Энэ мэтчилэн ажил үүргээ гүйцэтгэж байгаа алба хаагчийг гүтгэн доромжлох, утасны дуудлагаар худал мэдээлэл өгөх, цагдаагийн байгууллагын ажилд хүндрэл учруулах явдлууд мэр сэр гардаг аж.

Д.Ундрах