“Улаанбаатар төмөр зам” ТӨХК өөрийн хөрөнгө, хөдөлмөрөөр 3.5 км замыг 27 хоногийн дотор тавьж чаджээ. Хятадын хилээс Замын-Үүд хооронд уг замыг байгуулсан бөгөөд монголчууд барьж ашиглалтад оруулж байгаа юм. Ажлыг гүйцэтгэсэн монголчууд “Хөрөнгө мөнгийг нь шийдээд өгчихвөл бид өөрсдөө замаа тавьж чадахаар байна” гэж итгэлтэй хэлж байлаа.

   Сүүлийн жилүүдэд “УБТЗ”-аар тээвэрлэх ачааны хэмжээ эрс ихэсч, тус боомтын хүчин чадал хүрэлцэхгүйгээс хил дээр вагон саатах болжээ. Энэ хэрээр ачаа барааны эргэлт удааширч, хил дээр 600 гаруй мянган тонн ачаа гацаанд ороод байгаа гэнэ. Үүний ихэнх нь барилгын материал байгааг ч Замын-Үүд боомтын албаныхан хэлж байв. Харин энэ жилээс эхлэн явах вагоны тоог хоёр дахин нэмэгдүүлэх боломжийг бүрдүүлжээ. Өнгөрсөн наймдугаар сард Засгийн газрын шийдвэр гарч, есдүгээр сард эхэлсэн замын ажлыг 27 орчим хоногийн дотор дуусгажээ. Энэ замыг урд хөршийн барьж буй замтай холбох юм бол хүчин чадал одоогийнхоос хоёр дахин нэмэгдэж, 24 хос галт тэрэг буюу 2640 вагон Замын-Үүд-Эрээний хооронд явах боломж бүрдлээ. Ингэснээр иргэдийн ачаа бараа хил дээр хүлээгдэхгүй байх боломж бүрдэх учиртай.

    Замын-Үүдээс Хятадын хил хүртэлх төмөр замыг анх 1956 онд ашиглалтад оруулсан байдаг. Энэ замаар хоногтоо 12  хос галт тэрэг буюу 1320 вагон явдаг бөгөөд 3000-5000 зорчигч дамжин өнгөрдөг байна. Мөн Монгол Улсын гадаад худалдааны нийт эргэлтийн 70 орчим хувь нь энэ боомтоор дамждаг.