Монгол улс цаазын ялгүй орон болсныг иргэд хэрхэн хүлээн авч байгаа талаарх санал асуулгыг манай сайт өнгөрсөн 24 цагт явууллаа. Энэ санал асуулгад нийт 668 хүн идэвхитэй оролцож өөрийн үзэл бодлоо илэрхийлсэн байна. Хүний төрөлх эрхийг хөнддөг энэ асуудал аль ч оронд маргаантай байдаг билээ. Өнгөрсөн жилээс Монгол цаазын ялгүй болох талаар идэвхитэй яригдаж эхэлсэн ч иргэд, нийгмийн төлөөллүүд олон талын байр суурьтай байсан. Уг санал асуулгын эхний хариулт буюу “Зөв. Амьд явах бол хүний үндсэн эрх” гэсэн хариултыг 230 хүн, “Буруу. Одоо гэмт хэргийн тоо улам нэмэгдэх болно” гэснийг 270 хүн, "мэдэхгүй, ялгаагүй байх” гэсэн хариултыг 168 хүн бөглөсөн байна. Хувиар тооцож үзвэл нийт оролцогчдын 40,4 хувь нь буруу, 34,4 хувь нь зөв, 25,1 хувь нь мэдэхгүй гэсэн хариулт өгчээ. Бид санал асуулгынхаа буланд өнгөрсөн баасан гарагт үнэ нь огцом нэмэгдсэн шатахууны үнэ таны амьдралд хэрхэн нөлөөлж байгаа талаарх асуулга эхлүүлсэн байгаа. Идэвхитэй оролцож, өөрийн үзэл бодлоо илэрхийлнэ үү.
