АН-ын дарга хамтарсан Засгийн газраас гарна гэсэн мэдэгдэл хийсэн нь хоёр намын хагарлыг нийтэд ил болгосон билээ. МАН-ынхан ийм мэдэгдэл хийсэнд гайхаж, арай ч ханилж яваад хаяхгүй байлгүй хэмээн гомдонгүй харж байсан. Харин АН-ын гишүүд намын даргынхаа шийдвэрийг алга ташин хүлээн авч байна. Намаа шүүмжилж чаддаг Х.Тэмүүжин гишүүн хүртэл “Даргадаа баяр хүргэж, алга ташъя” гэсэн билээ. Хэдийгээр маргааш болох АН-ын ҮЗХ-аар засгаас гарах эсэхээ шийднэ гэж байгаа ч тус намын хувьд дотроо аль хэдийн ярьж, тохиролцжээ. Тиймээс маргаашнаас АН-аас сонгогдсон сайд, дэд сайд нар Засгийн газрын ямар ч үйл ажиллагаанд оролцохгүй байхаар шийдсэн байна. Тус намын удирдах зөвлөлийн гишүүд хуралдаж энэ шйидвэрийг дуу нэгтэй гаргасан гэж эх сурвалж мэдээллээ. Тодруулбал, АН-ын дарга Н.Алтанхуяг, намын ерөнхий нарийн бичгийн дарга Д.Эрдэнэбат нар АН-гүй МАН яаж ажиллахыг харахаар дээрх үүргийг өгсөн гэв.
