УИХ дахь МАН-ын бүлэг өнөөдөр шатахуун, махны үнийн өсөлт болон валютын ханшийн өсөлтийн шалтгааныг тогтоож, ямар арга хэмжээ авах талаар хуралдлаа. МАН-ын бүлгийн дарга Ө.Энхтүвшин сэтгүүлчдэд мэдээлэхдээ өнгөрсөн Баасан гарагт шатахууны үнэ огцом өсч, түүнийг дагаад өргөн хэрэглээний барааны үнэ нэмэгдсэн нь АН-ын мэдэгдэлтэй холбоотой хэмээв. Тэрбээр “Засгийн газраас шатахуун борлуулдаг компаниудтай сайн ярилцаж тохиролц гэсэн үүрэг өгсөн. Гэтэл шатахууны үнийг нэмэх үүргийг Засгаас гарч буй сайд нар өгөөд явж. Монгол банкны ерөнхийлөгчийг огцруулах санал гаргасан нь өөрсдийн буруугаа бусад руу чихэж байгаа зориуд хийсэн үйлдэл” гэв. Тэрбээр мөн АН-ын хамтарсан Засгийн газраас гарна гэсэн мэдэгдэл хийсний дараа гэнэт ийм эдийн засгийн савлагаа үүслээ. Нийлж болсон юм чинь салж болно. Гэхдээ төрийн ажил тасалдаж болохгүй гэлээ. “Биднээс хойш галав юүлсэн ч яахав гэж хандсан” хэмээн Ө.Энхтүвшин дарга сөрөг хүчнээ буруутгав.

   МАН-ын зүгээс Монгол банк уян хатан бодлого явуулаагүй гэж байгаа ч халж, солихоо түр хойшлуулаад цаашид яах, ямар арга хэмжээ авах тухай ярилцах хэрэгтэй гэж үзсэн байна. Одоо МАН-ын бүлгийн хуралдаан үргэлжилж байна.