Иргэд гаалиас машинаа авч чадахгүй байна. Авлаа гэхэд маш өндөр үнээр хуучин машин авах болоод байгаа юм. Энэ нь Засгийн газар автомашины онцгой албан татварын үнийг шинэ оны өмнөхөн хэд дахин нэмсэнтэй холбоотой гэнэ. Тэр дундаа үйлдвэрлэснээсээ хойш арав болон түүнээс дээш жил явсан машины онцгой албан татварын үнийг илүүтэйгээр нэмсэн байх юм. Одоогийн байдлаар хилээр орж ирсэн ачааг буулгадаг хэд хэдэн газарт Япон, Солонгос зэрэг орнуудаас ачуулсан машин эзэддээ хүрэлгүй саатаад байгаа юм байна. Гурвалжингийн гүүрний урд байрлах “АБТЭМА” гэх газарт ихэнхдээ “Pruis-10, 11” зэрэг татвар бага төлдөг машин буудаг. Тус газарт байгаа машинуудыг эзэд нь он гарахаас өмнө оруулж ирэхээр төлөвлөж захиалсан ч хил дээр хүлээгдээд оноос хойш орж ирсэн байна. Иргэд одоо машинаа авах гэхэд гурван сая буюу түүнээс дээш төгрөгийн алдагдалд орох болоод байгаа гэнэ. Япон улсаас 1997 онд үйлдвэрлэсэн “Nissan Sunny” маркийн машиныг тус бүрийг нь хоёр сая төгрөгөөр захиалахад энд ирээд тээвэрлэлтийн зардал, онцгой албан татварыг нэмэхээр есөн сая гаруй төгрөг болж байна. Ингэж өндөр үнээр машин авч байснаас “Да хүрээ” захаас Монголд орж ирээд удаагүй байгаа машиныг 5.5-6.2 сая төгрөгөөр аваад унах боломжтой болжээ. Иймээс иргэд машинаа авч чадалгүй энд үлдээхэд хүрээд байгаа юм байна. Эзэд нь аваагүй машиныг Гаалийн ерөнхий газрынхан дуудлага худалдаагаар борлуулаад улсын орлого болгодог. Манай улсын хилээр нэвтрэх авто тээврийн хэрэгслийн тоо жилээс жилд нэмэгдсээр байгаа. 2010 оны байдлаар нийт 24633 авто тээврийн хэрэгслийг улсын хилээр нэвтрүүлж байсан бол энэ оны эхний найман сарын байдлаар 31341 авто тээврийн хэрэгслийг улсын хилээр нэвтрүүлсэн гэх тоо байна. Энэ нь өмнөх оныхоос 2.2 дахин нэмэгдсэн гэсэн үг юм. Мөн Замын цагдаагийн газрын гаргасан судалгаагаар хотын төвөөр замын хөдөлгөөнд оролцож буй авто тээврийн хэрэгслийн 30 орчим хувийг 2500 /см3/ -аас дээш хөдөлгүүрийн цилиндрийн багтаамжтай буюу том оврын жийп машин эзэлж байгаа юм байх. Энэ бүгдээс болж машины онцгой албан татварын үнэ нэмэгдсэн байна. АБТЭМА-д машинууд ийнхүү эзэддээ очиж чадахгүй гацчихаад байгаа бол Х хороолол дахь “Материал импекс”-т "Да хүрээ" зах дээр 14 сая төгрөгөөр зарагдаж буй машин гааль дээрээс 18 сая төгрөгөөр авах хэмжээний үнэтэй байна. "Да хүрээ" зах дээр автомашины үнэ 500-1.5 сая төгрөгөөр нэмэгдсэн бөгөөд хамгийн үнэтэй машин нь 48 сая төгрөгийн шинэхэн “Range rover”, харин дараа нь “Land 100” 43 сая төгрөгөөр зарагдаж байна. Мөн “X trail” 16 сая төгрөг, “Honda Fit, Prius" 7.5 сая төгрөг, “Teana” 13.5 сая, “Honda CRV” 16.5 сая, “Кluger” 20 сая, “Маrk 2” 10.5 сая, “Теrrano” 16 сая, “Honda Сivic” 15 сая төгрөгөөр зарагдаж байна.
Т.Хулан
