Даруй зургаан жилийн өмнө дампуурлаа зарласан 26 Хадгаламж зээлийн хоршооны хохирогчид өнөөдрийг хүртэл хохирлоо бүрэн төлүүлж чадаагүй байна. Тухайн үед 8301 хүний 72 тэрбум төгрөгийг М.Энхболдын Засгийн газар зуун хувь барагдуулна гэж “амлан авч” байлаа. Гэвч нэг засаг солигдож, дахин нэг солигдох гэж байхад дөнгөж 50 орчим хувийг нь буюу 34,2 тэрбумыг нь өгчээ.
   Даруй зургаан жилийн өмнө дампуурлаа зарласан 26 Хадгаламж зээлийн хоршооны хохирогчид өнөөдрийг хүртэл хохирлоо бүрэн төлүүлж чадаагүй байна. Тухайн үед 8301 хүний 72 тэрбум төгрөгийг М.Энхболдын Засгийн газар зуун хувь барагдуулна гэж “амлан авч” байлаа. Гэвч нэг засаг солигдож, дахин нэг солигдох гэж байхад дөнгөж 50 орчим хувийг нь буюу 34,2 тэрбумыг нь өгчээ.  Үлдсэн 36,1 тэрбум төгрөгийг гаргах эх үүсвэр нь тодорхой болчихсон, чухам хохирсон иргэдэд өг гэсэн шийдвэр гарахад л болох юм. Тухайлбал хадгаламж, зээлийн хоршоодоос хураасан эд хөрөнгийг борлуулсан 15 тэрбум төгрөг Сангийн яамны дансанд орчихсон байгаа. Мөн Шүүхийн шийдвэр гүйцэтгэх ерөнхий газрын банк, ХЗХ-дын төлбөр барагдуулах ажлын албаны хашаанд зарвал нийт 22 тэрбум төгрөг болох эд хөрөнгө бэлэн байгаа аж. ШШГЕГ-ын хашаагаар дүүрэн үнэтэй автомашин, компьютер, тавилга тоосонд дараастай хэвтэж байна. Гэсэн ч иргэд, Хууль зүйн яам, ШШГЕГ ч тэр УИХ-ын тогтоолыг хүлээсээр. Хэрэв эдийн засгийн байнгын хороо, хууль зүйн байнгын хороогоор дээрх асуудлыг хэлэлцээд УИХ-д оруулбал ХЗХ-ны хохирогчдын мөнгийг өгөхгүй гэх ямар нэгэн үндэслэл байхгүй. Тиймээс хохирсон иргэд энэ асуудлыг УИХ-ын чуулганд оруулаад өгөөч ээ гэж Эдийн засгийн байнгын хорооны дарга Д.Зоригт, Хууль зүйн байнгын хорооны дарга Д.Одбаяр нарт хандан тус бүр хоёр удаа хүсэлт явуулжээ. Мөн ерөнхийлөгчид гурван удаа, ерөнхий сайдад хоёр удаа хандсан байна. Хариу нь таг чиг. Тэдний тавьж буй хүсэлт, шаардлага нь төлөөлөл болгоод таван хүнийг Д.Зоригт, Д.Одбаяр нартай уулзуулах юм. Ердөө л энэ. Хууль зүйн дэд сайд Удвал хүртэл халаглаж “Энэ хэдийг яая даа” гэснийг ХЗХ-ын хохирогчдын нэг Д.Нямжав гуай ярьж байв. Тэрбээр “Энэ 8000 хүний ард гэр бүл нь бий. Нийлээд зуу гаруй мянган хүний асуудлыг өөрсдөд нь ямар ч хохиролгүй байхад авч хэлэлцэхгүй байгааг хүнд суртал гэхээс өөр юу гэхэв ээ. Уг нь УИХ-ын гишүүд энэ талаар бүгдийг мэдэж байгаа. Зөвхөн Д.Зоригт, Д.Одбаяр дарга нартай уулзаад учирлах л хэрэгтэй байна. Гэтэл хариу өгөхгүй олон хүнийг хүйтэнд чирэгдүүлж байгаа” гэсэн юм. Улсад ямар нэгэн хохирол гарахгүйгээр ШШГЕГ-ын хашаанд байгаа эд хөрөнгийг зараад, хохирогчидод олгохыг зөвшөөрөөд л болох бичиг цаасны асуудлыг шийдэж өгөхгүй олон жил болж байгаагийн хариултыг тэд нэхэж, дарга нарын амнаас унах үгийг хүлээж байна.