Сүүлийн үед хоногт 5-8 хүн золгүй байдлаар амь насаа алдаж байна. Амиа алдагсдын дийлэнх нь архинаас болж байгаа аж. Энэ талаар Нийслэлийн цагдаагийн газрын Олон нийттэй харилцах хэлтсийн байцаагч, цагдаагийн дэслэгч Х.Ган-Ялалтаас тодрууллаа.
    Сүүлийн үед хоногт 5-8 хүн золгүй байдлаар амь насаа алдаж байна. Амиа алдагсдын дийлэнх нь архинаас болж байгаа аж. Энэ талаар Нийслэлийн цагдаагийн газрын Олон нийттэй харилцах хэлтсийн байцаагч, цагдаагийн дэслэгч Х.Ган-Ялалтаас тодрууллаа.

-Сүүлийн үед золгүй байдлаар амиа алдагсдын тоо нэмэгдэж байна?

-Тийм. Зөвхөн өнгөрсөн хоногт золгүй байдлаар арван хүн амиа алдсан байна. Нас барсан иргэдийн дийлэнх нь архи хэтрүүлэн хэрэглэсний улмаас гэртээ унтаж байгаад ил харагдах гэмтэл шархгүй нас барсан байна.

-Хүйтний эрч чангарсан нь бас нөлөөлдөг байх?

-Тэгж хэлж болно. Зарим шөнө -39 хэм хүртэл хүйтэрч байгааг цаг агаарын мэдээллээс иргэд анзаарч байгаа байх. Тиймээс зайлшгүй шаардлагатай л биш бол гэрээсээ гарах, алсын замд гарах бол дулаан хувцаслаж, болзошгүй тохиолдлоос сэрэмжлэх хэрэгтэй байна. Тухайлбал, өнгөрсөн хоногт золгүй тохиолдлоор нас барсан иргэдийн дунд зам дагуу явж байгаад осгож нас барсан, гудамжинд ухаангүй хэвтэж байгаад осгож амиа алдсан тохиолдол гарлаа.

-Хэргийн талаар жаахан тодруулвал?

-Баянзүрх дүүргийн 20 дугаар хорооны нутагт орших Монгол шилтгээний харалдаа төв зам дагуу осгосон байдалтай нас барсан хүн байна гэсэн мэдээллийг авч шалгахад, 174 см өндөртэй, ногоон эрээн богино куртка, хар ноосон цамц, хар даавуу өмд, хагас түрийтэй хар өнгийн өвлийн гуталтай, 35-40 орчим настай эрэгтэй хүн осгосон байдалтай нас барсаныг тогтоож, хэргийг Баянзүрх дүүргийн цагдаагийн хэлтэст үргэлжлүүлэн шалгаж байна. Мөн Сонгинохайрхан дүүргийн 23 дугаар хороо Хангайн 50 дугаар гудамжинд ухаангүй хүн хэвтэж байгаад 103-т хүргэгдэх замдаа нас барсан гэсэн мэдээллийг авч, шалгахад: 155 см өндөртэй, цагаан өнгийн өдөн куртиктэй, дотуураа шар өнгийн ноосон цамцтай, доогуураа хар өнгийн ноосон өмд, урт түрүүтэй хар гутал өмссөн  35-40 настай эмэгтэй хүн биедээ ил харагдах гэмтэл шархгүй, осгосон байдалтай нас барсаныг тогтоон, хэргийг Сонгинохайрхан дүүргийн цагдаагийн хэлтэст үргэлжлүүлэн шалгаж байна.