Визийн зөрчлийн улмаас Балбад гурван сар гаруй саатуулагдан хоригдож буй Б.Баяндэлгэр хэмээх хүүгийн өрөвдөм түүхийг уншигч та бүхэн 24tsag.mn сайтын зохиогч М.Буянбадрахын сурвалжлагаас уншиж мэдсэн. Манай сайт нэгдүгээр сарын 18-наас эхлэн Б.Баяндэлгэр хүүд туслах аянг өрнүүлж, хандивын данс нээж мөнгө цуглуулан түүнийг эх оронд нь авчрах санаачилга өрнүүлсэн юм. “Цагаан сараар цагаан үйлс бүтээе” гэсэн манай уриалгыг дэмжсэн олон хүний нэг нь “Дорнод нутаг” клубын тэргүүн С.Отгонбаатар байлаа. Тэрбээр хүний нутагт мөнгөгүйн эрхээр хоригдож байгаа Дорнодынхоо залуугийн тухай олж мэдэн эргэлзэх юмгүй түүнийг яаж суллуулах талаар 24tsag.mn сайт болон ГХЯ-ныхантай зөвлөлдөж эхэлсэн юм. Ингээд хүүг Монголд хэзээ авчрах болсон тухай болон одоо Балбад нөхцөл байдал ямар байгаа талаар мэдээлэхээр 24 tsag.mn, “Дорнод нутаг” клубынхэн өнөөдөр хэвлэлийнхэнд хандан мэдээлэл хийлээ.  

 24tsag.mn сайтын захирал М.Буянбадрах: Энэ бол гэмт хэрэг үйлдсэн залуугийн тухай асуудал биш юм

   Өнгөрсөн сарын сүүлээр "NTV" production"-ы зураглаач Г.Батнягт ах бид хоёр баримтат киноны зураг авалтаар Балбад хэд хоносон юм. Балба бол Монголтой адил хоёр том гүрний дунд оршдог жижиг буурай улс. Тэнд явж байгаад маш санамсаргүй байдлаар монгол залуу Балбын шоронд хоригдож байгааг мэдсэн. Энэ бол гэмт хэрэг үйлдсэн залуугийн тухай асуудал биш юм. Жуулчдад түгээмэл тохиолддог визийн зөрчлийн асуудлаар энэ залуу шоронд оржээ. Нэг үгээр хэлбэл визийн хугацаа нь хэтэрсэн гэсэн үг юм. Эндээс шашны ном үзэхээр Өмнөд Энэтхэгт очсон Б.Баяндэлгэр байнга оршин суух зөвшөөрлийнхөө хугацааг сунгах хураамжаа төлөлгүй явсаар байгаад багагүй хэмжээний торгуульд унасан. Мөнгөө төлж чадахгүй болохоороо эх орондоо ирж, мөнгө олоод буцаж очин номоо үргэлжлүүлэн үзэх бодолтойгоор хийдээсээ гарсан ч мэдээлэлгүйгээсээ болж эцсийн дүндээ Балбад ирэн зовж зүдэрч явсан байна. Тэгээд Балбын цагаачлалын албанд баригдаад хоригдож байгаа. Балбын засгийн газар бол өөрсдийнхөө төсвөөс мөнгө гаргаж хүнийг албадан гаргадаггүй. Мөнгөө төлсөн цагт гаргана гээд хорьчихсон. Цагаачлалын албаны тусламжтайгаар хүүтэй уулзсан юм. Хүү биднээр дамжуулан /“Би гэртээ харимаар байна” Б.Баяндэлгэр 2011 оны 12 сарын 26/ гэсэн зурвасыг дамжуулсан. Эгчийнхээ утсыг өгсөн боловч холбогдохгүй байгаа. Хүүд сайхан сэтгэлтэй С.Отгонбаатар гэдэг хүн туслахаар болоод байна. Балбын цагаачлалын алба руу холбогдоод Б.Баяндэлгэрийг Монголд авчирахад нийт хэдэн төгрөгийн зардал гарах талаарх судалгааг хийж үзсэн. Бид амжвал энэ долоо хоногт үгүй юм аа гэхэд ирэх долоо хоногт хүүг авчирна. Гадны орон руу явахдаа манай залуучууд мэдээлэлтэй, судалгаатай, бэлтгэлтэй явж байгаач ээ гэж сануулмаар байна.

“Дорнод нутаг клуб”-ын тэргүүн С.Отгонбаатар: Хүүг эх оронд нь авчирахад шаардлагатай мөнгө бэлэн болсон

   Б.Баяндэлгэр маань өөрөө Дорнодынх. Бид нарын зорилго бол газар доорх баялгийг биш газар дээрх баялаг болох  хүнийг хайрлах юм. Нэг залуу маань өөрийнхөө болгоомжгүйгээс болж Балбад хоригдож байгааг сонсоод түүнд туслахаар шийдсэн. Гол нь Балбын цагаачлалын албанаас хариу ирэхийг хүлээж байна. Шаардлгатай мөнгө 1600 ам.доллар бэлэн байгаа. Тусалж дэмжсэн нийт Дорнодчууддаа их баярлалаа гэж хэлмээр байна.

        Ямартай ч монгол залуугийн суллагдах өдөр холгүй бололтой. Хүүг таньдаг ах дүү, найз нөхөд байвал “Дорнод нутаг клуб”-ын хамт олонтой холбогдохыг уриалж байна. “Дорнод нутаг” клуб, түүний тэргүүн С.Отгонбаатар нар нутгийнхаа залууг нутагтаа шинэлүүлэх зорилго хэрхэн биелэхийг 24tsag.mn дэлгэрэнгүй сурвалжлах болно.

     PS: Б.Баяндэлгэрийн талаар бичсэн сурвалжлагыг энд дарж уншина уу.

Т.Хулан