Олон нийтийн сүлжээ сайт болох Фэйсбүүкийн үүсгэн байгуулагч Марк Зүкербэрг ойрын үед хямрангуй байна. Учир нь түүний бүтээсэн сүлжээг “Anonymous” хакеруудын бүлэглэл энэ сарын 28-нд хаах гэж байгаагаа мэдэгджээ. Энэ заналхийлэлд ямар хариу үйлдэл үзүүлснээ Марк өөрөө твиттертээ нийтэлсэн нь дараах зураг юм. Фэйсбүүк болон ноён Марк нар интернэтийн сүлжээг хянаж, оюуны өмчийн асуудал хөндөн, интернэт хэрэглээг хязгаарлах гэж буй баримт бичгийн эсрэг байгаа. Энэхүү SOPA/PIPA актыг “Anonymous” бүлэг ч ялгаагүй эсэргүүцдэг. Гэсэн хэдий ч өөрсдийн үндсэн ажлаа тэд орхиогүй байна. Уг нь дайснаараа нэгдсэн "дайснууд" хэсэг хугацаанд эвлэрэхэд гэмгүй байдаг ч “Anonymous” бол “Anonymous” ажээ. Одоо нэгдүгээр сарын 28-нд фэйсбүүк хаагдах эсэхийг л харах үлдлээ.

   Тэд өнгөрсөн оны 11 дүгээр сарын тавны өдрийг мөн л Фэйсбүүк хаагдах өдөр гэж зарлаж, “заналхийллээ” видео хэлбэрээр түгээж байсан. Бид өршөөдөггүй, хүлээж бай хэмээн айлгаж байсан ч тухайн үед хэвийн өнгөрсөн билээ. Финлянд улсын фэйсбүүкчдийн 70 хувь нь тус сайтын нууцлалыг найдваргүй гэж үздэг гэжээ.