“Женко” группээр овоглосон сайд асан Х.Баттулга дэлхийн хамгийн том Чингисийн хөшөөг босгож жуулчдын өмнө нүүрээ халхлах ганц цогцолбортой болгосон. Сайдын суудлаас буусан ч тэрбээр мөн л жуулчдыг татах, Гиннесийн номд ч орохуйц шинэ төсөл хэрэгжүүлэхээр зэхэж байна. Улаанбаатар хотоос 50 км зайд 108 га талбайг хамарсан “Их Майдар” цогцолборын ажил аль хэдийн эхэлжээ. Төв аймгийн Сэргэлэн сумын нутагт Өгөөмөрийн аманд Богд хаан уулын энгэрт босох энэ цогцолборт Өндөр гэгээн Занбазарын бүтээсэн Майдар бурханыг 554 метр өндөртэйгээр бүтээх аж. Бас болоогүй, Майдар бурхны ард дэлхийн аль ч өнцгөөс эрээд олохгүй хамгийн өндөр 108 метр цагаан гантигаар Гаадангийн суварга босгож Гиннесийн амжилт эвдэхээр боджээ. Х.Баттулга аргагүй бизнес сэтгэлгээтэй хүн гэдгээ харуулж суваргын гадна талд нарны эрчим хүч хуримтлуулах шилэн хавтан суурилуулахаар төлөвлөсөн. Энэ нь цэцэрлэгт хүрээлэн, сургалтын танхим, сүм гээд цогцолборын тал хувийг эрчим хүчээр хангах бололцоотой гэнэ. “Женко”-гийнхон цэцэрлэгт хүрээлэндээ “Будда ланд” гэж жуулчдад тааруулаад аятайхан нэр бодоод олчихсон байна. Уг төслийн танилцуулгад “Цогцолборт ирсэн хүмүүс Майдар бурхны өлмийд гороолоод зүүн мутраас нь рашаан хүртээд 10 дугаар давхарт гарч 108 000 Майдар бурхны ерөөл сонсоод гадагш гарч өндрөөс байгаль орчин, цогцолборыг бүхэлд нь харж болно” гэжээ.

   Тэрбээр энэ цогцолборыг байгуулахдаа билэгдлийг их л бодож тунгаасан бололтой. 108 га талбайг хамарсан цэцэрлэгтэй, 108 метр суваргатай, 108 мянган ширхэг алтадсан, 27 см жижигхэн Майдар бурхадтай гээд сүсэгтнүүдийг татах олон зүйл энд багтжээ. Хойд уулынхаа оройноос дээш цоройсон Гаадангийн суварга дотор Майдар бурхны 108 мянган хувилбарыг хийж, иргэдэд эзэмшүүлэх юм байна. Өмнө нь Цонжин болдог цогцолборт 10 мянган баатрын дүрд “хувилах”-ыг санал болгож байсан бол өөрийн гэсэн бурхантай болох тоог арав дахин өсгөжээ. “Овог нэр, удам судрынхаа нэрийг мөнхжүүлж, хойч үедээ өвлүүлэх боломжтой” гэж сурталчилж буй алтадсан Майдарыг хүн бүрт хоёр хувь үйлдэж нэгийг нь суварга дотор, нэгийг нь гэрт нь хадгалуулах гэнэ. Алтадсан, хоёр хувь гэхээр жижиг Майдар бурхны үнэ “талийж” өгөх байх. Гэхдээ одоогоор үнэ хөлсийг нь нийтэд зарлаагүй байгаа. Өөрсдийгөө ямар нэгэн аргаар “чимэх” гэсэн, мөнгөө үрж ядах хүмүүсийн загатнасан газар нь маажиж багагүй мөнгө цуглуулах нь. Бас л “онц” тавих бизнес сэтгэлгээ.

   Дашрамд сануулахад, Х.Баттулгын охин Б.Номин ч бас дэлхийн хамгийн том монгол гутал бүтээхийг санаачилж ойрын хэдэн жилдээ “эвдрэхээргүй” Гиннесийн амжилтын эзэн болж байсан юм.

Б.Баяр

.