МСНЭ-ийн  XVI их хурал болж эвлэлийн ерөнхийлөгч, дотоод асуудал, орон нутаг хариуцсан дэд ерөнхийлөгч нар болон Хяналтын зөвлөлийн гишүүдийг сонголоо. МСНЭ-ийн Ерөнхийлөгчид өнгөрсөн гурван жил уг байгууллагыг удирдсан Монгол Улсын соёлын гавьяат зүтгэлтэн Б.Галаарид, МҮОНРТ-ийн дарга асан М.Наранбаатар, ETV телевизийн захирал Ч.Даваабаяр, С.Шаравдорж нарыг нэр дэвшүүлсэн. Эх сурвалжийн мэдээлснээр Б.Галааридыг АН-ын дарга З.Энхболд, М.Наранбаатарыг МАН-ын дарга М.Энхболд нар тус бүр ерөнхийлөгчид зүтгүүлсэн гэнэ. Хоёр том намын дарга "Энхболд"-уудын тулаан сэтгүүлзүйн салбарт ч өрнөөд амжсан  нь энэ бололтой. З.Энхболдын хувьд М.Наранбаатартай өнгөрсөн оны сүүл үеэс эхлэн олон нийтийн өмнө "халз тулалдсан". Их хурлын даргын индэр дээрээс М.Наранбаатарыг "архи уудаг, ажлаа хийдэгггүй" гэх зэргээр хэлсэн. Үүнд нь эгдүүцэж, уурласан М.Наранбаатар их хурлын даргыг сонгуулийн үеэр олон нийтийн телевизийг ашиглан "өрсөлдөгчөө муулсан нэвтрүүлэг гаргахыг шаардаж байсан" хэмээн хэд хэдэн телевизийн ярилцлагад орох үеэрээ ярьсан. Ингээд эцэс сүүлд нь хоёр эрхмийн тулаан цагдаа, сэргийлэх дээрээ тулсаны эцэст нам жим болсон. Харин М.Энхболд өрсөлдөгчийнхөө хүнийг гаргахгүйн тулд М.Наранбаатарыг дэмжиж байсан гэх таамгийг учир мэдэх хүмүүс ярьж байсан юм. Харин энэ бүхний эцэст Б.Галааридаас бусад нэр дэвшигчид бүгд нэрээ татсан бөгөөд Б.Галааридыг сэтгүүлчид 99.9 хувийн саналаар улираан сонгожээ. Тэгвэл гадаад асуудал хариуцсан тэргүүн дэд ерөнхийлөгчөөр М.Наранбаатар, дотоод асуудал хариуцсан дэд ерөнхийлөгчөөр Х.Батхишиг, орон нутаг хариуцсан дэд ерөнхийлөгчөөр С.Шаравдорж нар тус тус томилогдлоо. Харин хяналтын зөвлөлд долоон хүнийг томилсон бөгөөд даргаар нь Монцамэ агентлагийн сэтгүүлч Д.Ариунаа сонгогдов.
                Даширамд дурдахад Монголын сэтгүүлчдийн эвлэлийн XVI их хуралд хот, хөдөөгийн хэвлэл мэдээллийн 150 гаруй байгууллагын 248 төлөөлөгч оролцсон байна.