УИХ-ын гишүүн Х.Баттулгын Монголын ардчилсан холбоо өчигдөр ерөнхий чуулганаа хийж, мэдэгдэл гаргажээ. Тэд иргэдийг сэрэмжлүүлэн, сэрээхүйн тулд уг мэдэгдлээ сонины бүтэн нүүр дамнан нийтэлсэн байна. Монголын ард түмэнд тус болох баялаг нь гадаадын шуналтнуудад ашиг болж байгаа нь гадны корпорациудад үйлчилсэн манай олигархиудын буруу гэж мэдэгдэлд дурдаад энэ цөөн хэдэн олигархийн шунал улс орныг гамшигт унагана гэжээ. Хамгийн ойрын аюул нь Монголын эдийн засаг гадаадынхны бүрэн хяналтад орж, энэ хяналтаар дамжуулж бүгдийг гадны ашиг сонирхолд нийцүүлэх үйл явц хэмээн бичсэн байна. Монгол улс “баялгийн хараалын” дүрмээр амьдарч, иргэд 21 000 төгрөг, монгол-олигархиуд 21 сая доллар, цаад том корпорациуд 21 тэрбум долларын ашиг авч байгаа нь шударга ёс уу гэж асуужээ. Энэ бол 1990 онд хүсч байсан “Ардчилал” биш гэдгийг МоАХ хариуцлагатайгаар мэдэгдлээ.

    <<Хамгийн харамсалтай нь, МоАХ-ны оролцоо, идэвхтэй дэмжлэг, зүтгэлээр анхлан байгуулагдсан Ардчилсан намыг өнөөгийн хэсэг удирдлага ард түмний язгуур эрх ашиг, ардчиллын үнэт зүйлсийг хамгаалан, булхай луйврыг эсэргүүцэн тэмцэхийн оронд хамтран зохион байгуулагч нь болж хувирчээ>> гэх үгсийг мэдэгдлийн сүүл хэсэгт бичжээ. Намын даргатайгаа түнжин хагарсан нь тодорхой болсон Х.Баттулга үүнд л хамгийн их бухимдаж байсан бололтой. Өнөөдөр посткоммунист хүчин болсон улс төрчид цөөн хэдэн олигархийн заавраар ажиллаж байгаа гэнэ. Тийм учраас Ардчилсан нам дотор шинэ уур амьсгал оруулж, шинэ ёс зүй, дэг журам тогтоох шаардлагатай. Нам дагасан бүлгээс хагацахгүйгээр АН улс орны шинэчлэл хийж чадахгүй гэдгийг МоАХ онцолжээ. Энэ нь цаагуураа АН дотор олигархиуд байгаа бөгөөд тэднийг "цэвэрлэж" байж ардчилсан нам нэрнийхээ утгад нийцэнэ гэж хэлэх гэсэн бололтой. Х.Баттулга өнөөдрийн өглөөг ч мөн л "Босоцгоо, дарлагдсан ардууд аа" гэдэг үгээрээ угтсан. Тэгвэл “Ардчилсан Монголчуудаа эх орон ардчилалд аюул учирлаа. Сэрцгээе!” хэмээн сүүлийн үеийн “уламжлалт” үгээр мэдэгдлээ өндөрлүүлжээ. Бидний тэмцэл ариун учраас ялагдашгүй хэмээснээс үзвэл тэд дээрх бүхнийг өнөөдрөөс эхлүүлэн ажил хэрэг болгож байгаа бололтой.