Тэргүүн шадар сайдын албан тушаалыг Засгийн газрын бүтцээс хасах тогтоолыг УИХ-ын чуулганаар хэлэлцэж байна. Эрх баригч хоёр нам өчигдөр тохиролцсон тул энэ асуудлыг хурдан шуурхай батлах байх гэсэн хүлээлт байсан. Харин нэгэнт Засгийн газрын бүтцийг ярьж байгаа тул дэд сайд нарын асуудлыг хөндөж эхэллээ. УИХ-ын гишүүн З.Энхболд “Тэргүүн шадар сайдаас гадна энэ олон сайд нарыг яах вэ? Нэгэнт Засгийн газрын бүрэлдэхүүнийг өөрчилж байгаа юм чинь ярих хэрэгтэй гэв. Мөн УИХ-ын гишүүн Н.Ганбямба “Гурван жил гаруй хугацаанд дэд сайд нарыг цөөлж, захиргааны зардлыг бууруулах боломж анх удаа гарч байна. Цэргээсээ дарга нарынх нь тоо илүү болчихсон байгааг бүгд харж байна. Ганц тэргүүн шадар сайд биш дэд сайд нарыг хасах асуудлыг оруулж ирэхгүй яасан юм бэ?. Агентлаг гэхэд л газрын орлогч дарга, хэлтсийн дарга, тасгийн дарга, ахлах мэргэжилтэн гэсэн олон шат дамжлыг давж ажлаа бүтээсэн хүнд хөдөлмөрийн баатар цол олгохоор болоод байна” гэв. Харин үүний хариуд чуулганд оролцож буй ерөнхий сайд С.Батболд “Дэд сайдын албан тушаалыг нэг хүнд зориулж бий болгосон гэж ярьж байгаа нь буруу. Эрдэс баялаг, эрчим хүчний салбар гэхэд зайлшгүй хоёр дэд сайдтай байх хэрэгтэй” гэж хариуллаа. АН-ын гишүүдийн хувьд дэд сайд нарыг цомхтгох асуудлыг өнөөдөр заавал хэлэлцэх хэрэгтэй гэж үзэж байна.