Шинэ сайд нарыг томилох асуудал УИХ-ын чуулганаар ид яригдаж байх үеэр УИХ-ын гишүүн Н.Батбаяр ерөнхий сайд С.Батболд руу "аттак" хийв. ЗТБХБ-ын сайдад нэр дэвшээд байгаа Ц.Дашдоржийн асуудлыг хэлэлцэж байсан ч тэдний яриа хувийн шинжтэй болж өрнөв. Н.Батбаяр гишүүн "Таныг ерөнхий сайд болсон хугацаанд манай улс хэр баяжсан бэ? Та өөрөө хэр баяжсан бэ? Таван толгойг "MCS"-д өгөхдөө зарсан уу, бэлэглэсэн үү?" гэж шулуухан асуув. Үүний хариуд ерөнхийлөгч С.Батболд "Эхлээд та өөрийгөө засах хэрэгтэй. Биеэ засаад гэрээ зас, гэрээ засаад төрөө зас гэдэг үг үнэн юм билээ. Би өөрийгөө засаад өрхөө засчихсан. Одоо төрөө засах ажлыг үүнээс ч илүү хийж чадна гэж бодож байна. Таван толгойн лицензийг 10 гаруй жил хадгалж байгаад үндэсний компанидаа өгсөн. Хэн нэгэн гадаадын хүнд худалдаагүй. Хариуцаж байгаа хүн нь би. Харин та байсан бол чадахгүй гамшиг болгоно. Ийм зохимжгүй юм ярихаа боль" гэлээ. Асуулт тавьсан гишүүн "Үнэн үг хэлсэн хүнд үхэр өшөөтэй гэдэг. Та их сандарч байна. "МCS"-д Таван толгойг зарсан юм уу, бэлэглсэн юм уу? гэж дахин асуув. Ерөнхий сайд үүнд нь бүр уурсч "Та үгээрээ хүн доромжлохгүй шүү. Миний хувийн асуудлыг сонирхож байгаа бол надад Монгол улсын хууль зөрчсөн асуудал байхгүй. Өнөөдөр гишүүнийг томилох асуудал ярьж байхад би чамд тайлан тавих хэрэгтэй юу?” гэж ширүүхэн дуугарав.

     Өмнө нь Н.Батбаяр гишүүн нэр бүхий найман гишүүний хамт ерөнхий сайдыг огцруулах хүсэлт тавьж байсан ч үр дүнд хүрэлгүй намжсан билээ. Тэдний сөргөлдөөний дараа УИХ-ын гишүүд Ц.Дашдоржийн асуудлыг хэлэлцэж байгаагаа санав бололтой. Яг одоо түүний томилогдох гэж буй салбартай нь холбоотой зам засвар, орон сууцны асуудлаар ямар ажил хийхээр төлөвлөж байгааг нь УИХ-ын гишүүд асууж байна.