Өнөөдөр Балбын шоронд гурван сар гаран хоригдоод байсан Б.Баяндэлгэр эх орондоо ирлээ. Тэрээр дөрвөн цагийн орчимд Чингис хаан нисэх онгоцны буудалд Сөүлийн онгоцоор газардлаа.

   Өнөөдөр Балбын шоронд гурван сар гаран хоригдоод байсан Б.Баяндэлгэр эх орондоо ирлээ. Тэрээр дөрвөн цагийн орчимд Чингис хаан нисэх онгоцны буудалд Сөүлийн онгоцоор газардлаа.
   Б.Баяндэлгэрийг тосохоор түүний ах, эгч, дүү гэрийн бүлийхэн нь болон “Дорнод нутаг” клубын хамт олон, тус клубын тэргүүн С.Отгонбаатар, 24tsag.mn сайтын хамт олон очсон юм. Онгоцноос  буун хүлээн авах руу гарч ирэх тэр мөчид түүний ах, гэр бүлийхэн нь хадаг, сүү барин угтлаа. Энэ үед эх орон, элгэн садандаа ирсэн Б.Баяндэлгэр гэр бүлийхэнтэйгээ тэврэлдэн уйлж тэнд цугласан олон монголчуудын сэтгэлийг хөдөлгөсөн юм.
   Ингээд Чингис хаан нисэх онгоцны буудлаас бүгдээрээ хөдлөн “Brauhaus” ресторанд С.Отгонбаатарын урилгаар зоог барьсан юм. Энэ үед Б.Баяндэлгэр, түүний гэр бүлийнхэн болон “Дорнод нутаг” клубын тэргүүн С.Отгонбаатараас авсан яриаг хүргэе.

Б.Баяндэлгэр

-    Юуны өмнө танд эх орондоо ирсэнд баяр хүргэе. Хамгийн түрүүнд эх орондоо ирсэн сэтгэгдлийг тань сонсох нь зөв байх?
-    Баярлалаа, сэтгэгдэл маш өндөр байлгүй яахав. Хамгийн түрүүнд надад тусалж байсан Дэнгээ ламдаа болон намайг Балбын шоронгоос суллаж гаргахад тусалсан монголынхоо бүх хүмүүст, Дорнод аймгийн иргэддээ маш их баярласнаа илэрхийлье. Тэр дундаа “Дорнод нутаг” клубын хамт олонд, С.Отгонбаатар ахдаа, 24tsag.mn сайтын хамт олондоо үнэхээр их баярлалаа.
-    Балбын шоронд байхад чинь “Дорнод нутаг” клуб болон 24tsag.mn сайтынхан чамайг суллаж, эх оронд чинь буцаах боллоо гэсэн мэдээг анх сонсоход ямар байв, юу бодогдож байв?
-    Тэнд байхад элчин сайдын яамнаас нэг хүн ирээд маргааш, нөгөөдрөөс чи шоронгоос гарахаар боллоо, цаанаас нь  эндээс суллах, Монгол руу явах онгоцны тасалбар зэрэг бүх зүйлийн мөнгө, төлбөрийг төлчихсөн гэж хэлсэн. Яг тэр мөчид маш их баярлаж өөрийн эрхгүй уйлчихсан. Монгол хүн монгол хүнийхээ төлөө ийм юм хийсэн болохоор асар их баярлаж байсан. Намайг авчирсан энэ бүх хүмүүстээ дахин дахин баярлалаа. Тэр мөчид эх орондоо очиход маш сайхан байх байхдаа л гэж бодож байсан даа.
-    Тэгвэл эх орондоо буух тэр мөчид ямар мэдрэмж төрж байна?
-    Үнэхээр хэлэх зүйлгүй сайхан байсан. Тийм нэг эрх чөлөөтэй амьсгал авах шиг л болсон.
-    24tsag.mn сайтын болон, “Монгол айл” төслийн хамт олонтой тэнд уулзаад, чамайг заавал сулланаа гэж хэлэхэд итгэл найдвар төрж байв уу?
-    Тийм ээ маш сайхан байсан. Мөн тэндхийн элчин сайдын яаманд хоёр ч удаа хандсан. Тэгээд надад туслаач гэхэд элчин сайдын яаманд монгол хүн байдаггүй туслах боломжгүй гэсэн. Мөнгөгүй байна утсаар яриулаач гэхэд мөн л боломжгүй, тийм юм байхгүй гээд байсан. Сулласны дараа өөрсдийнхөө нэр төрийг бодсон юм уу их сонин зүйл яриад байсан. Тэрийг одоо би яаж ярихаа мэдэхгүй байна.
-    Юутай ч одоо санаа зовох зүйлгүй боллоо шүү дээ. Эх орондоо ирчихлээ. Удахгүй Дорнод руу явна. Ээж, аав дээрээ очлоо шүү дээ?
-    Тийм ээ. Их баяртай байна гэж нулимс дуслуулан ярьлаа.

С.Отгонбаатар

-    Танд баяр хүргэе. Монголынхоо нэг иргэнийг хаа холын Балбын шоронгоос суллан авчирч их том буян үйлдлээ шүү дээ?
-    Баярлалаа. Ямар ч байсан бид Монголынхоо нэг иргэнийг ядарч явахад нь тусалж эх оронд нь авчирлаа. Өнөөдөр монголчуудыг дандаа газрын доорх баялаг гэж ярьдаг болчихож. Газар дээрх баялгаа огт анхаарахаа больчихож. Хүн чанар, хүний жудаг гэдэг зүйлээ гээчихэж. Тийм болохоор анх 24tsag.mn сайтын уран бүтээлч М.Буянбадрах шоронд хоригдож байсан Б.Баяндэлгэрийн талаар хэлэхэд бид яагаад тусалж болохгүй гэж, яагаад нутгийн залуугаа эх оронд нь авчирч болохгүй гэж. Бас алдаж, онож яваа залуус үүнээс сургамж аваасай. Өнөөдөр хүнээ хүндэлсэн, хүнээ хайрласан тийм засаг төртэй болоосой гэж бодож байна.
-    Б.Баяндэлгэртэй хамт гэр бүл дээр нь очих уу?
-    Монгол ёс байна даа. Одоо нэг цай, хоол идчихээд өнөөдөртөө Дорнод руу гарч, Б.Баяндэлгэрийгээ ээж, аав дээр нь аваачна. Машин тэрэг бүгдийг нь бэлдчихсэн байгаа.

Б.Баяндэлгэрийн ах Б.Уранбилэг

-    Өнөөдөр ямар ч гэсэн дүү нь эх орондоо ирлээ. Ямар байна?
-    Маш их баяртай байна. Дүүг минь бидэнд авчирсан бүх хүмүүстээ баярлалаа.
-    Дүүгээ хоригдож байна гэж сонсоод ямар нэгэн газарт хандсан уу?
-    Бид өөрсдөө хөдөөний хүмүүс болохоор хот сайн мэдэхгүй. Хаана хандахаа мэдэхгүй байсан.
-    Ямар ч гэсэн дүү та бүгд дээрээ ирлээ шүү дээ, дүү нь өөрчлөгдсөн байна уу?
-    Их баяртай байна. Их өөрчлөгдсөн байна. Зургаан жил уулзаагүй байсан. Халуун оронд байсан даа ч тэр юм уу харласан байна.
-    Онгоцноос буугаад дүү нь гараад ирэх тэр мөчид ямар байв?
-    Их сайхан байсан. Өөрийн эрхгүй шууд л нулимс урсаад л ирсэн.
-    Одоо бол дүүгээ өөрөөсөө холдуулахгүй биз?
-    Ёстой холдуулахгүй.

Б.Баяндэлгэрийн эгч Б.Урантогос

-    Дүүгээ ингэж хоригдсон гэж хэзээ мэдсэн бэ?
-    Бид саатуулагдсан л гэж сонссоноос хүнд мөнгөө хулхидуулаад, шоронд хоригдсон гэж мэдээгүй байсан. Ямар ч гэсэн дүүгээ ирсэнд их баяртай байна.
-    Дүүгийн тань талаар 24tsag.mn сайт дээр бүх мэдээлэл нь цаг тухай бүрт нь гарч байсан уншиж байсан уу?
-    Тийм ээ, дүүгийн минь талаар бүх мэдээлэл нь гарч байсан. Сайтаар болон телевизээр гарч байсан. Та бүхэндээ маш их баярлалаа
   Ийнхүү зургаан жилийн өмнө гэрээсээ нэг годгор хиамтай гарч, Энэтхэг улсад эрдэм номд сурч байсан монгол хүү монгол хүндээ залилуулан мөнгөгүй болж улмаар Балбын шоронд гурван сар гаран хоригдож байгаад өнөөдөр эх орондоо ирлээ. Түүнийг авчирахад гүн туслалцаа үзүүлсэн “Дорнод нутаг” клубын хамт олон, “Монгол айл” төслийнхөн, нийт монголчууддаа баярлалаа. Б.Баяндэлгэр Монголдоо байна.
Түүний ирэх мөчийн зарим зургийг сайтын “Монгол 24 цагт” булангаас үзнэ үү.