Олон хоног дамнаж, бие биенээсээ хожоо хайсан сайд нарын асуудал шийдэгдлээ. Гэсэн ч тэргүүн шадар сайдын суудлаар “туг тахиж” байж Засгийн газраа бүрдүүлсэн МАН-ын санаа амрах цаг болоогүй. Дангаараа хариуцлага хүлээж байгаа хойно дандаа тэдэн дээр фокус тусна гэсэн үг. Ерөнхий сайд, шинэ сайд нар бас шадар сайд дээр. АН-ын дарга Н.Алтанхуягийн ажлыг өвөртлөн авч эрх мэдэл нь “данхайж” буй шадар сайд М.Энхболдыг “сүүдрээс” гаргах цаг болжээ. Тэрбээр өөрийн хариуцдаг Хүүхдийн төлөө үндэсний төв, Улсын мэргэжлийн хяналтын газар, Онцгой байдлын ерөнхий газар дээр нэмж Шударга өрсөлдөөн, хэрэглэгчийн төлөө газар, Стандартчилал, хэмжил зүйн газрыг бонус болгон авлаа. Чухам энэ томоохон асуудал эрхэлсэн агентлагууд нэг хүний гарт орохоороо яах ийх тухай хардалтыг хойш тавьж болно. Харин доороо арван “шадрын шадар” туслахтай түүний ажлын үр дүнг нэхэх цаг иржээ. Тэргүүн шадар сайд Н.Алтанхуяг та юу хийсэн? гэж асуух хөг нь өнгөрсөн. М.Энхболдоос харин хариу нэхэх цаг байна, ахиу ажиллахыг шаардах эрх бидэнд байна. Шаардая.Эрүүл мэндийн салбар ямар байна, Эрдэс баялаг, эрчим хүчний салбар ямар байна гэдэг ерөнхий мэдээлэл бидэнд бий. Дээр дурдсан шадар сайдын халаасан дахь агентлагууд харин бүрхэг байдаг шүү. Хүүхдийн төлөө үндэсний газар гэхэд шадар сайдын харьяанд орлоо гээд өөрчлөгдсөн зүйл үл ажиглагдана. Бодлогыг нь зангидаж байдаг гэсэн шалтгаанаар түүний үүргийг дөвийлгөж болох ч “зангидагдсан” бодлого нь хаана байна? Өнгөрсөн парламентад хүртэл ийм албан тушаал байх хэрэггүй гэсэн санал, хүсэлт гардаг байсныг УИХ-ын протокол баталж байна. 2004-2008 онд УИХ-ын гишүүн байсан М.Зоригт чуулганы нэгдсэн хуралдаан дээр “Шадар сайд гэж хэнд ч хэрэггүй, юу ч хийдэггүй, гадаадад л хуралд суудаг нэг хүн байгаа. Дээр нь баахан хэрэггүй дэд сайдууд байна" гэжээ. Одоогийн шадар сайдад зориулаагүй ч өчигдөрхөн хэлсэн юм шиг цаг үе нь чухам таарахаар үг. Хамгийн сүүлд М.Энхболд сайдын хамгийн амжилттай хийсэн ажил нь Лондон-2012 Олимпийн наадмын монголын багийн ахлагчийн хувиар хийсэн айлчлал байлаа. Тэрбээр Британид очиж манай тамирчид олимпын үеэр хэр тухтай байж, яаж бэлтгэл хийхийг өөрийн биеэр шалгаад ирсэн. Гэсэн ч сонгууль болж, Засгийн газар өөрчлөгдсөний дараа олимпийн наадам болох билээ. Олимпод манайхан амжилттай оролцсон эсэх хариуцлага түүнд тусахгүй. Харин Олимпийн ерөнхий хороонд тохогдоно. Хий хардаж байна гэвэл ойрхоны жишээ ч бий. Шатахууны үнийг барьж чадаагүй гэж Шударга өрсөлдөөн, хэрэглэгчийн төлөө газрын даргыг ажлаас нь хуссан. Түүнийгээ хараандаа, харьяандаа байлгаж байдаг тэргүүн шадар сайдад хир ч хүрээгүй юм шүү. Шадар сайдын гарыг эдийн засгийн чөлөөт бүс байгуулж, хилийн боомтуудыг эмхлэх зэрэг олон чухал ажил харж, хүлээж байна. Түүн дээр гэрлээ тусгая.
Б.Баяр
