Хэлж байгаад шатахууны үнийг 260 төгрөгөөр нэмсэн цөөн хэдэн компаниас импортлогчийн бүрэн эрхийг нь төр өөртөө авах болсноор шатахууны үнэ дорвитой хямдрах нь. Бензин шатахууны үнийг удахгүй 320 төгрөгөөр эргүүлэн хямдруулахаар болжээ. Уг асуудлыг УИХ-аар авч хэлэлцэн, эрхээрээ далайлган эдийн засаг “алдаг” байдлыг нь таслахад хүрч байж үнийг буулгах болж байна. Засгаас бурууг нь нэхэж, МҮЭ-ийнхэн хүйтэнд ордон гороолж, Ажил олгогч эздийн холбооныхон хүч хавсарч байж шатахууныг хямдруулахаар болсон. Гэтэл тэр нь тоглоом, шоглоом мэт 20-30 төгрөгөөр багасгаж, тохуурхаж байлаа. Тэдэнд төр маань төмөр нударгаа үзүүлж, гарт нь байсан импортын удирдлагыг хурааж зориглолоо. Уг ажлын үрээр зах зээлд байгаа бусад бараа бүтээгдэхүүний үнийг багасгах ажил өрнөнө. Түүнийг Шударга өрсөлдөөнийг хянан зохицуулах хорооныхон гардан гүйцэтгэх аж.Шатахууны үнээс хамаарч хүнсний гол нэрийн бүтээгдэхүүнүүд, түлээ нүүрс болон зарим төрлийн ахуйн бараа 10-15 хувиар үнээ нэмээд байсан юм. Хамгийн энгийнээр таксины үнэ км тутамдаа 200-300 төгрөгөөр нэмэгдээд байгаа билээ.
