УИХ-ын гишүүдийн нэрийг барьж амин хувийн ажлаа амжуулдаг, гишүүний нэрээр далайлгаж хууль бус үйлдэл хийдэг туслахуудын тухай дуулдах боллоо. Хамгийн сүүлд гэхэд УИХ-ын гишүүн А.Телейханы туслах Ш.Айдос ерөнхийлөгч болон УИХ-ын даргын нэрийг барьж "Эм Си Эс", "Жаст" зэрэг компаниас дөрвөн сая төгрөг залиласан нь шүүхээр тогтоогдсон билээ. Харин УИХ-ын гишүүн Л.Гүндалайн туслах Д.Саранчимэг 2008 оны нэгдүгээр сард Хөвсгөл аймгийн нэгэн хадгаламж зээлийн хоршооноос нэг сая таван зуун мянган төгрөг аваад одоо хүртэл бүрэн төлөөгүй байна. Тэрбээр “Арвинмөрөн” ХЗХ-ноос гурван сарын хугацаатай зээл авсан бөгөөд сарын дөрвөн хувийн хүүтэй, хугацаа хэтэрсэн бол 0,8 хувийн хүү нэмж тооцохоор тохиролцсон байжээ. Д.Саранчимэг нь 2008 оны 10 дугаар сард буюу есөн сарын хугацаа хэтэрсэн хойно үндсэн зээлийн 550 000 төгрөг, хүү болох 400 000 төгрөгийг барагдуулсан. Харин үлдсэн 192 000 төгрөгийг 2008 оны 10 дугаар сарын аравны өдөр төлнө хэмээн гарын үсгээ зурж, амлажээ. Өрөө төлөхийг шаардахад нь мөн л 2009 оны тавдугаар сарын таванд төлнө гэсэн байна. Гэсэн ч өнөөг хүртэл таг чиг. Зээлийн хүүгээс ашиг олдог хадгаламж зээлийн хоршооны гишүүд Л.Гүндалай гишүүний туслах тул арай ч хулхидахгүй, төлж л таарна хэмээсээр өнөөдрийг хүрчээ.
   Хэрэв зээлийн үлдэгдэл 550 000 төгрөгийг 2009 оны дөрөвдүгээр сараас эхлэн дөрвөн хувийн хүүгээр тооцвол 714 266 төгрөг болж байна. Өмнөх 460 000 төгрөгийн хүүтэй нийлээд зээлийн хүүд 1 174 267 төгрөг төлөх ёстой аж. Мөн төлөөгүй үлдсэн үндсэн зээл болох 550 000 төгрөгийг нэмбэл 1 724 266 болж байна. Тодруулбал, “Арвинмөрөн” ХЗХ нь Д.Саранчимэгээс 1 724 266 төгрөг нэхэмжилж байгаа юм.
   УИХ-ын гишүүний туслах атлаа сая гаран төгрөгийг дөрвөн жилийн дотор төлж чадахгүй байгааг юу гэж ойлгох вэ? Л.Гүндалай гишүүний нэрийг өмнөө барьж авсан болохоор гишүүнээр төлүүлэх гээгүй байлтай. Хэрэг хуучирдаггүй. Мянган төгрөг залилсан байлаа ч шүүхэд хандаж болдог билээ. Л.Гүндалайн гишүүний дөрвөн жилийн хугацаа ч дуусч байна, туслахынх нь “бүрэн эрх” ч дуусч байна. Тиймээс яаралтай өр төлбөрөө барагдуулахыг дээрх хадгаламж зээлийн хоршооныхон хүсч байгаа юм.