Налайх дүүргийн “Хаан” банкинд өчигдөр орой гэмт этгээдэд буудуулсан хүн хагалгааны дараа нас баржээ. Цагдаагийн газраас өгсөн мэдээллээр тус дүүргийн “Хаан” банкны захирал Д.Туяагийн нөхөр Ч.Батбаатарыг буудсан хэрэгтэн нь Сонгинохайрхан дүүргийн тавдугаар хороонд оршин суугч Г.Бат-Ялалт гэгч байжээ. 2008 онд ХААИС-ийн Инженер механикийн сургуулийг төгссөн, эхнэр хүүхдийн хамт амьдардаг аж. Түүнийг их хэмжээний өртэй тул өрөө төлөхийн тулд ийнхүү дээрэм хийхээр завдсан гэж эх сурвалж хэлж байгаа юм. Тэрбээр өчигдөр өглөө Нарантуул захаас такси хөлслөн авч Налайхын “Хаан” банкны өмнө зогсоогоод гэмт хэрэг үйлдсэнийхээ дараа таксины жолоочийн хоолойд хутга тулган сүрдүүлж зугтсан байна. Харин цагдаа нар түүнийг хэрэг гарснаас хойш 20 минутын дараа баривчилсан бөгөөд “Би хүн алчихлаа шүү дээ” хэмээн уйлж байсан тухай таксины жолооч ярьжээ. Амиа алдсан Ч.Батбаатар нь 36 настай, гурван хүүхэдтэй байжээ. Түүнийг харамсалтайгаар хорвоогоос буцсанд манай сайтын хамт олон гүн харамсаж байгаа илэрхийлж байна. Хэрэгтэн нэгэнт хэргээ хүлээж, газар дээрээ баригдсан тул хэрэг үнэн зөвөөр шийдэгдэнэ гэдэгт итгэлтэй байна.
