СЕХ-ноос өнөөдөр УИХ-ын сонгуулийн бэлтгэл ажлын талаар мэдээллээ. Ирэх зургадугаар сард болох сонгуулийн бэлтгэл ажлыг энэ сарын 15-наас эхлүүлэхээр болжээ. 2012 оны сонгуультай холбоотой хууль, эрхзүйн баримт бичгүүдийг хэвлэж иргэдэд сурталчлах, телевиз радиогоор сурталчилгааны шторк явуулах зэрэг ажлыг гүйцэтгэх гэнэ. Энэ хүрээнд Дээд шүүхээс тайлбарлавал зохих 40 гаруй хуулийн зүйл заалт байгаа бол хэвлүүлэх ёстой 50 гаруй журам, заавар байгаа аж. Сонгуулийг улс орон даяар ойролцоогоор 1800 хэсэг байгуулан явуулах бөгөөд нийслэлийн сонгогч ихтэй тойрогт хоёр хэсэг байгуулах аж. Түүнд ажиллах мэргэжилтэн, боловсон хүчнийг энэ сарын 15-наас бэлтгэх бол санал тоологч 2500 орчим машин захиалжээ. Тус бүр нь 3200 ам.долларын үнэтэй сонгуулийн санал тоолох машиныг Америкаас төлөвлөгөөний дагуу авчруулах бөгөөд одоохондоо таван машин байгаа аж. Үүнээс гадна сонгуулийн саналын хуудасны загвар, дизайн, агуулах мэдээлэл зэргийг СЕХ-ноос батлуулах ёстой. Мэдээлэл хийх үеэр СЕХ-ны дарга Лувсанжав зарим асуултад хариулт өглөө. УИХ-ын сонгуулийг Орон нутгийн сонгуультай хамтад нь явуулах санал гаргаад байгаа. Үүнийг СЕХ хэрхэн үзэж байгааг тодрууллаа.
-Автомат санал тоолох машинтай болохоор үүнийг амархан гэж үзээд байх шиг байна. Орон нутгийн сонгуулийг автомат машинаар явуулна гэвэл тодорхой техникийн шийдлийг хийх ёстой. Хуулиар бол СЕХ УИХ-ын сонгуулийг л зохион явуулдаг бол ОНС-ийг салбар хэсгүүд зохион байгуулдаг юм. Энэ хоёр сонгууль нэг дор байж болохгүй гэх хэд хэдэн шалтгаан байна. Эхлээд саналын хуудсанд бүх нэр дэвшигчийг багтаах боломжтой гэдэг эргэлзээтэй. Хоёрт, орон нутагт нэр дэвшигчид УИХ-ын сонгуулийн дараа л нэр нь тодорхой болдог учир цаг хугацааны хувьд эргэлзээтэй. Гуравт, яг энийг заасан хууль эрхзүйн зохицуулалт байна уу гээд цөөнгүй асуудал бий. Гэхдээ СЕХ бол ямар нэг буруу зөв гэх дүгнэлт хийдэг байгууллага биш. Зөвхөн хууль эрх зүйн хүрээнд л ажилладаг гэлээ. Түүнээс гадаадад байгаа иргэд хэрхэн саналаа өгөх, сонгуульд оролцох талаар асуусан юм.
-Гадаадад байгаа иргэдийн саналыг авахаар хуулинд тусгасан. Гэхдээ Монгол улсын дипломат төлөөлөгчтэй газар л санал өгч болно. Бас улсын шинэчилсэн бүртгэлд хамрагдсан байх шаардлагатай. Энэ хоёрыг хангасан бол сонгуульд оролцохдоо эхлээд санал өгнө гэдгээ тухайн газартаа бүртгүүлэх ёстой. Гадаадад байгаа иргэдийн саналыг цаасаар авах бөгөөд тодорхой хугацааны өмнө СЕХ-нд ирүүлснээр тоолох юм. Гэхдээ нэг онцлог нь тэд зөвхөн улс төрийн намуудыг сонгох болно. Учир нь тойрог байхгүй учраас намд л санал өгөх боломжтой гэв. Төгсгөлд нь түүнээс сонгуулийн үеэр гарсан хууль бус үйлдэлд хяналтыг хэн тавих, хариуцлагыг хэрхэн тооцох тухай асуулаа.
-Иргэд өөрсдөө саналаа худалдахгүй л байх хэрэгтэй. Мэдээж хууль зөрчсөн үйлдэл хийж байгаа нэр дэвшигч, компанит ажлын ажилтан, төлөөлөгчид хариуцлага тооцох тухай хуулинд заасан байгаа. Нөгөө талаас иргэдэд бас хариуцлага тооцох зүйл орсон. Саналаа худалдах, давхардуулж санал өгөх болон будлиантуулах оролдлого хийх ёсгүй. Бас өөрөө хэнд санал өгснөө мэдэгдүүлэхийг хуулиар хориглоод байгаа. Тийм учраас сонгуульд оролцож байгаа иргэд та бүхэн ч бас хуулиа баримтлах хэрэгтэй шүү.
