Өнгөрсөн оны наймдугаар сарын 11-ний өдрийн 11 цагийн үед Өмнөговь аймгийн Цогтцэций сумын нутагт байрлах Тавантолгой ХК-ий ажилчдын тосгоны  байранд байгуулсан усан оргилуурт 10 настай хүү А.Зоригтбаатар, гурван настай хүү Г.Золбаяр нарын ах дүү хоёр тоглож байгаад оргилуурын цахилгаанд цохиулж нас барсан хэрэг гарчээ. Амиа алдсан хүүгийн эцэг эх болох Э.Ганчулуун, А.Алтанчимэг нар Тавантолгой ХК-д гомдолтой байгаагаа илэрхийлж, зөрчигдсөн эрхээ хамгаалуулахаар хуульчдад хандсан байна. Иймээс хуульчид хүүхдийн эрхийг ноцтой зөрчсөн тус компаний эсрэг стратегийн өмгөөллийн хэрэг үүсгэсэн байна.

Усан оргилуур нь барилга байгууламжийн стандарт, хууль тогтоомж, хэв журмыг зөрчиж баригджээ

Тавантолгой ХК нь анх усан оргилуурыг ажилчдынхаа чөлөөт цагаа өнгөрөөх газар болгох зорилгоор байгуулжээ. Гэсэн ч тус байгууламж нь Монгол улсад мөрдөх барилга байгууламжийн стандарт, хууль тогтоомж, хэв журмыг зөрчсөн гэж мэргэжлийн хяналтын дүгнэлт гарчээ. Цахилгааны гэмтэлтэй баригдсан тус усан оргилуурт хүүхдүүд тоглож байгаад амиа алдсан байна. Уг хэргийг хууль хяналтынхан шалгахдаа хоёр хүүг амиа хорлосон гэж бүртгээд хэргийг хэрэгсэхгүй болгосон аж. Хэдийгээр энэ хэргийг аймгийн прокурор мөрдөн байцаалтад дахин буцаах шийдвэр гаргасан ч энэ нь хэн нэгнийг эрүүгийн хэрэгт татахаас илүүтэй иргэний хариуцлагын маш том хэрэг болсон гэж хүний эрхийн хууьч М.Ичинноров үзэж буйгаа илэрхийлэв. Аймгийн ерөнхий прокурорт гомдол тавьсан байгаа учир хэргийг дахин мөрдөн байцаалтад буцаачихсан байгаа аж.

Усан оргилуурын ус тогтой байгааг диспетчерт мэдээлсэн хэдий ч аюулаас зайлуулах арга хэмжээг хэн ч аваагүй байна.

Хөвгүүдийн эх А.Алтанчимэг 40 настай бөгөөд өмнө нь хоёр хүүгээ хагалгаагаар төрүүлж байжээ. Тиймээс дахин хүүхэд гаргах боломж нь маш хумигдмал байгаа гэнэ. Хэрэг гардаг өдөр компаний жижүүр усан оргилуурын ус тогтой байгааг диспетчерт мэдээлсэн хэдий ч аюулыг зайлуулах арга хэмжээг хэн ч аваагүй байна. Тавантолгой компани орон нутгийн бүтээн байгуулалт хэмээн хүүхдийн тоглоомын газар барьсан нэр төдий уг байгууламжид аюулгүй байдлыг хангаагүйн улмаас хоёр сайхан хүүхдээ алдлаа гэж хүүхдүүдийн эх А.Алтанчимэг ярьж байна.

Хөвгүүдийн эцэг Э.Ганчулуун: Компанийн удирдлагууд бидний төлөө нэг ч удаа сэтгэл гаргаагүй

- Та Тавантолгой ХК-д ямар ажил хийдэг вэ?

Би засварчин, манай эхнэр ерөнхий тогооч хийдэг. Хохирол барагдуулж нэг сая 200 мянган төгрөг өгсөн.

- Одоо тэр усан оргилуур ажиллаж байгаа юу?

- Ажиллахгүй байгаа.

- Хүүхдүүд яагаад хараа хяналтгүй явж байсан юм бэ?

- Угаасаа хүүхдийн тоглоомын талбайн хажууд байдаг усан оргилуур шүү дээ.

- Компаний зүгээс усан оргилуурыг хууль зөрчиж баригдсан гэдгийг хүлээн зөвшөөрч байгаа юу?

- Компаний удирдлагууд усан оргилуурыг тийм байсан, ийм байсан гэж бидэнтэй ярилцаагүй. Өчнөөн хоногийн өмнөөс тог цохиж байна гэж хэлээд байхад арга хэмжээ аваагүй юм. Үүнд л гомдолтой байна. Энэ хэрэг гарснаас хойш бид шүүх цагдаагаар явъя гэж бодоогүй. Хөвгүүдийг маань өнгөрснөөс хойш энэ компаний удирдлагууд бид нарт хүндэтгэх сэтгэлээр хандаж наана цаана гэсэн бол бид өнөөдөр ингэж явахгүй байсан юм. Гэтэл өнөөдрийг хүртэл хүний урманд нэг ч удаа бидний төлөө сэтгэл гаргаагүй.

- Хүний эрхийн хуульч М.Ичинноров: Маш их хэмжээний мөнгийг Тавантолгой ХК-аас нэхэмжилнэ

Саруул ухаанаар бодоход 10 настай, гурван настай хүүхэд ус хараад тоглож наадна уу гэхээс амиа хорлоё гэж бодохгүй шүү дээ. Усанд тог байна гэж ямар ч хүүхэд бодохгүй. Монгол улсад хүний эрх хэрхэн зөрчигдөж уландаа гишгэгдэж байгааг энэ хэргээс харж болно. Хууль шүүхийн байгууллага мөнгөтэй нэгэнд үйлчлээд ядарсан хүнд нүүрээ бууруулдаг ийм тогтолцоо байна. Өмнөговьд харанхуй, усгүй, бөөн тоостой байгаа. Тавантолгой компани Монголын нүүрсийг зөөгөөд л байж байна. Тийм учраас бид сэтгэл санааны нөхөн төлбөр, амь насны нөхөн төлбөр гээд маш их хэмжээний мөнгийг Тавантолгой ХК-иас нэхэмжлэхээр стратегийн өмгөөллийг эхлүүлж байна.

Т.Хулан