Өнгөрөгч долоо хоног спортоор амьсгалсан, монголын тамирчид эх орондоо төдийгүй, хилийн чанадад амжилтаар дүүрэн болж өнгөрлөө. Монголын тамирчдын оролцсон тэмцээн, уралдааныг тоймлон хүргэе.

   Өнгөрөгч долоо хоног спортоор амьсгалсан, монголын тамирчид эх орондоо төдийгүй, хилийн чанадад амжилтаар дүүрэн болж өнгөрлөө. Монголын тамирчдын оролцсон тэмцээн, уралдааныг тоймлон хүргэе.
   Бокс.
   Өнгөрөгч даваа гариг буюу 1 дүгээр сарын 30. Дөрвөн жилд нэг удаа зохиогддог “Монголын бүх ард түмний спортын 13 дугаар их наадам” Спортын төв ордонд боксын төрлөөр эхэллээ. Ширэн бээлийтнүүдийн УАШТ-нд нийт 25 байгууллагын 222 тамирчин 13 жинд хүч үзсэн юм. Тэмцээнд Монгол улсын хөдөлмөрийн баатар Э.Бадар-Ууган гэмтлийн улмаас, П.Сэрдамба, гавъяат тамирчин У.Мөнх-Эрдэнэ нар тодорхой шалтгааны улмаас оролцоогүй учир 49, 60, 64 кг-ийн жингийн аваргаар хэн шалгарах нь тун сонирхолтой байсан юм. Эрэгтэйчүүдийн 49 кг-ийн жинд 25 тамирчин оролцож, нэгдүгээр байранд Г.Ган-Эрдэнэ /Төв аймаг/ шалгарсан бол А.Доржнамжин, М.Гандулам, Г.Ариунболд нар удаалсан юм. 60 кг-ийн жинд З.Энхзориг /Сүлд спорт хороо/, Б.Жавхлан /Орхог аймаг/, Б.Оргил, Г.Билгүүн, 64 кг-ийн жинд Б.Чинзориг, Ц.Отгон-Эрдэнэ, А.Мөнхбаатар, О.Батзориг нар алт, мөнгө, хүрэл медалийн эзэд боллоо. Харин багийн дүнгээр Орхон аймгийн баг тамирчид түрүүлж, “Алдар” спорт хороо, “Сүлд” спорт хорооны баг тамирчид удаалсан юм. Тэмцээнээс харахад боксийн спортоор хичээллдэг хүүхэд залуус нэг үеэ бодвол маш ихээр нэмэгджээ. Үүнийгээ дагаад тамирчдийн ур чадвар ч сайжирч байна.  

   Жүдо.
   Францын нийслэл Парисд жүдо бөхийн “Их дуулга”-ын тэмцээн өнгөрөгч амралтын өдрүүдээр болсон бөгөөд 96 орны 589 хүчтэн зодоглолоо. Тэмцээний эхний өдөр хөнгөн жингийн барилдаанууд болж өнгөрсөн бөгөөд манай тамирчдын хувьд амжилтаар дүүрэн байв. Эрэгтэйчүүдийн 73 кг-ийн жинд барилдсан ОУХМ С.Ням-Очир өрсөлдөгч бөхчүүдээ бүгдийг нь цэвэр ялж, алтан медалийн төлөө Германы бөхийг мөн цэвэр ялж аварга болсон бол гавъяат тамирчин М.Бундмаа 52 кг-ийн жинд мөнгө, Х.Цагаанбаатар, М.Уранчимэг нар хүрэл медаль хүртсэн юм. Харин тэмцээний 2 дахь өдөр -100 кг-ийн жинд зодоглосон олимпийн аварга, хөдөлмөрийн баатар Н.Түвшинбаяр Латвийн бөхийг ялж алтан медаль хүртсэн бол мөн тус жинд барилдсан Б.Тэмүүлэн хүэрл медаль хүртлээ. Ингэснээр Монголын баг тамирчид нийлбэр дүнгээр гуравдугаар байранд орсон байна. Жүдочдийн дараагийн зогсоол ирэх бямба, ням гаригт Унгарын Будапештэд болох эмэгтэйчүүдийн “Дэлхийн цом”  бол эрэгтэйчүүд Австри улсад зодоглоно.
Сагсан бөмбөг.
   Өнгөрөгч 2 дугаар сарын 4-нд буюу бямба гаригт Буянт-Ухаа дахь спортын шинэ ордонд “Спрайт супер лиг”-ийн шинэ улирлын нээлт боллоо. Тус тэмцээнийг “Эм-Си-Эс Кока Кола” компани “TLG13” ТББ хамтран зохион байгуулж байгаа ба ажилчин залуусын дунд чөлөөт цагаа зөв боловсон өнгөрүүлэх, эрүүл идэвхитэй амьдралыг хэвшүүлэх зорилготой юм. Энэ удаагийн тэмцээн эрэгтэй, эмэгтэй нийлсэн 21 баг оролцож байгаа бөгөөд түрүүлсэн багт алтан медаль, арван сая төгрөг, шилдэг тамирчинд АНУ-ын Чикаго хотоор аялан тоглолт хийх эрхээр шагнах юм. Өнгөрсөн жилийн хувьд ИНЕГ-ын Буянт-Ухаа баг аваргалсан билээ.




   Гар бөмбөг.
   Өнгөрөгч долоо хоногт оюутны улсын аварга шалгаруулах гар бөмбөгийн тэмцээн МУИС-ийн Эдийн засгийн сургуулийн спорт зааланд болж өнгөрсөн ба эрэгтэй 12, эмэгтэй 10 баг оролцлоо. Тэмцээн гурван өдөр үргэлжилсэн ба эрэгтэйчүүдийн төрөлд МУИС-ын тамирчид аваргалж, ХААИС, ШУТИС удаалсан бол эмэгтэйчүүдээс ШУТИС, МУБИС, Их засаг сургуулийн баг тамирчид шагнал хүртсэн байна.






   Гүйлт.
   Монголын тамирчдаас Лондонгийн олимпийн хамгийн анхны эрхийг аваад байсан гавъяат тамирчин Б.Сэр-Од өчигдөр Японы Ойта хотноо 61 дэх удаагийн “Беппу Ойта” марафоноос мөнгөн медаль хүртлээ. Тэрээр энэ тэмцээнд 2 цаг 11 минут 05 секунд гүйж өөрийн амжилтаа 30 секундээр ахиулжээ. Түүний дараагийн зогсоол Лондон.
   Ийнхүү өнгөрөгч долоо хоногийн ёпортын онцлох гол үйл явдлууд ийм байна. Спортынхны хувьд амжилтаар дүүрэн өнгөрлөө. Дараа долоо хоногт юу болох бол?