Хан-Уул дүүргийн ес, аравдугаар хороо түүхий нүүрс түлэхгүй байх хязгаарлалтын бүсэд багтсан билээ. Нийслэлийн агаарын бохирдлыг бууруулах ажлын хүрээнд эдүгээ тус хороодын айл өрхүүдэд бүрэн шаталтат зуух олгох ажил өрнөж байгаа юм.Дүүргийн аравдугаар хороонд байрлаж буй “Нэг гэр цэгийн үйлчилгээ”-ний гадна бүрэн шаталтат зуух сурталчлах өдөрлөг зохион байгууллаа. “Сэлэнгэ констракшн”, аравдугаар хороо, “Хас” банкнаас хамтран зохион байгуулсан уг өдөрлөгийн үеэр бүрэн шаталтат зуухны ашиглалт, галлах зарчмын талаар иргэдэд мэдээлэл өгөв. Мөн тус хорооны 60 иргэн зуух худалдан авах гэрээ байгуулж, 23 иргэн бэлэн мөнгө тушаан, гурван иргэн азтан болж үнэгүй зуухны эзэд болжээ.
Тус өдөрлөгийн үеэр дүүргийн Агаарын бохирдлыг бууруулах салбар зөвлөлийн гишүүн Санхүү, төрийн сангийн хэлтсийн дарга Д.Даваадулам өөрийн хариуцсан хэсгийн айл өрхүүдээр орж ажил амьдралтай нь танилцлаа.
Дүүргийн иргэд аравдугаар хороонд байрлах “Нэг гэр цэгийн үйлчилгээ”-нд хандан “Хас” зуухыг 60.200, “Өлзий” зуухыг 36.200, гэрийн гонх 78500, 4 ханатай гэрийн дулаалга 316-345 мянган төгрөг, таван ханатай гэрийн дулаалга 336-385 мянган төгрөгөөр тус тус худалдан авах боломжтой аж.
Мөн аравдугаар хорооны Засаг дарга иргэддээ хандан бүрэн шаталтат зуухны төслийн ажлын явцын талаар мэдээлэл өгөх үүднээс захидал хүргүүлжээ.
Тус хороонд хэрэгжиж буй бүрэн шаталтат зуухны төсөл энэ сарын 28-нд өндөрлөх бөгөөд иргэд төслийн хугацаа дууссан хойно бүрэн шаталтат зуухыг хөнгөлөлттэй үнээр бус зах зээлийн бодит үнээр буюу 500-600 мянган төгрөгөөр худалдан авах юм байна.
Б.Чимэг
