Баянхонгор аймгийн Баянлиг сум говийн бүс нутагт хамаарагддаг бөгөөд иргэд нь загийг түлш болгон хэрэглэх явдал их байгаа гэнэ. Нийт 3400 гаруй хүн ам, 1000 гаруй өрхтэй тус сумд 80 гаруй хувь нь ажилгүй байгаа аж. Тиймээс орлогогүй хүмүүсийн олонх нь байгалиас түлш бэлтгэх буюу загаар галлаж байна. Хэрэв орлоготой байсан бол 500 км алсаас мод, 250 км газраас нүүрс бэлтгээд, загийг хамгаалах ажил урагштай байх юм. Гэтэл ажилгүй, тэтгэврийн, орлого багатай өрх өвлийн хүйтнийг давахын тулд заган ой руу гар хөрөө, сүхтэй орж байна.

    2011 онд БОАЖЯ-наас “ Заг, бутлаг ургамлыг түлшинд хэрэглэхийг хоргилох” тухай тушаал гарсан нь загийг хамгаалах эхний алхам болсон юм. Гэвч тус сумд загийг хамгаалах ажил нь иргэдийг осгооход хүргэх тул бүрэн хэрэгжих боломжгүй гэсэн үг. Түлш бэлтгэхийн тулд дунджаар нэг сая төгрөг зарцуулдаг боловч утаагүй зуухыг хэрэглэвэл уг зардал гурав дахин багасч байгааг туршиж үзжээ. Тиймээс “Хас”, “Өлзий” зэрэг бүрэн шаталттай зуухыг тус сумд хүргүүлснээр заган ойг хамгаалах ажил үр дүнтэй болж эхэлнэ гэж сумын байгаль хамгаалагч А.Батчулуун үзэж байна. Тус сумд хамгийн ойр нүүрсний орд нь 180-220 км тойрогт байдаг аж.