Авлигатай тэмцэх газар оны өмнө шинэ удирдлагатай болоод халаа, сэлгээ хийн хараал, ерөөл нэлээд хүртсэн. Харин он гарсаар “задарсан” гэгдээд буй аймаг, дүүргийн   засаг дарга нарыг “эрүүдэж” эхлэв.

    Авлигатай тэмцэх газар оны өмнө шинэ удирдлагатай болоод халаа, сэлгээ хийн хараал, ерөөл нэлээд хүртсэн. Харин он гарсаар “задарсан” гэгдээд буй аймаг, дүүргийн   засаг дарга нарыг “эрүүдэж” эхлэв.
   Одоогоор Сонгинохайрхан дүүргийн ээлжит засаг даргаар томилогдон ажиллаж байсан Д.Болдыг бусдын эд хөрөнгийг завшсан, үрэгдүүлсэн, Налайх дүүргийн засаг дарга Б.Баяндэлгэрийг газрын асуудлаар АТГ-т шалгаж байгаа. Мөн Орхон аймгийн засаг дарга Д.Оюунбатыг  албан тушаалаа урвуулан ашиглаж, улсад их хэмжээний хохирол учруулсан хэргээр шалгаж байгаад ялын дүгнэлт үйлдэн шүүх рүү шилжүүлсэн байна.  Түүнчлэн Увс аймгийн засаг дарга Э.Цасчихэрийг хэрэгт холбогдуулан АТГ-ын байцаагчид тус аймагт ажилласан ба хэргийг ирэх долоо хоногт прокурорт шилжүүлэхээр болсон. Мөн өвөрмонгол найз Түмэнбаяртаа Говьсүмбэр аймгийн Шивээговь сумын нутагт байдаг “Илчлэг шивээ” үйлдвэрийн газрыг өгөхөөр доод албан тушаалтнуудаа тулгасан хэргээр Говьсүмбэр аймгийн засаг дарга Ж.Баянмөнх АТГ-ынханд баривчлагдан хоригдсон.
   Энэ мэтчилэнгээр аймгийн засаг дарга нараас ээлж дараалан “ам асууж”, “эрүүдэн” шүүх гэнэ. Аймаг, дүүргийн засаг дарга нар ИТХ-ын даргатайгаа хөтлөлцөн албан, тушаалаа хэтрүүлэн ашиглаж, төсвийн хөрөнгөнөөс “иддэг” нь нэгэнт нууц биш болжээ. Эхнээсээ “эрүү” шүүлтэнд унаж, идсэн хэрэг нь сөхөгдөж, аймаг, дүүргийн засаг дарга нар минь “аав” руу явж эхэллээ. Засаг дарга нарыг эхнээс нь дуустал шалган “самнах”, зүгээр ч нэг том шүдтэй самаар бус, бөөсний самаар самнах яриаг сонссон аймаг, дүүргийн засаг дарга, ИТХ-ын дарга нар ихэд сандарч байгаа сурагтай. Хоригдсон засаг дарга нар “аавын” пянг даахгүй, бие нь муудаж, эмнэлэгт хүргэгдэж байна гэнэ шүү. Арга ч үгүй биз паартай байшинд амьдарч, паалантай жоогоонд суудаг байсан амьдралаас тэс өөр орчин хойно.
   Түүгээр ч барахгүй сонгууль ойртож байгаатай холбогдуулан найман жил суусан засаг дарга нар Медведев, Путин хоёрын үлгэрээр ИТХ-ын даргатайгаа солигдож идэх их үйлээ үргэлжлүүлэхээр болж буй гэнэ. Монголын гоё хууль л даа.
   Юутай ч эхнээсээ шалгагдаад өнхрөөд буй. Энэ мэтчилэн үргэлжилсээр 21 аймаг, есөн дүүргийн засаг дарга нараас хэд нь үлдэж, хэд нь bye bye болохыг харж л байя.