Буузны мах, тавгийн ууцаа авах гэж халаасаа шавхаж байгаа хэдэн хөгшчүүл Цагаан сараас өмнө сая төгрөг өгнө гэсэн Засгийн газрын амлалтыг хүлээсээр байна. Орой болгон телевизийн мэдээнд чих тавьж “Сая төгрөгийн тухай ярих нь уу?” хэмээн анаж суугаа хүн олон. Гэтэл өчигдөр өглөө Нийгмийн хамгаалал, хөдөлмөрийн сайд Т.Ганди “Сая төгрөгийг цагаан сараар өгнө гэж амлаагүй. Гуравдугаар сард багтаагаад өгчихнө” гэсэн хариу хэлсэн. Өмнө нь МҮЭХ-ныхон Төрийн ордныг тойрон жагсаж байх үест “Багш нарын цалинг нэмнэ, Цагаан сараас өмнө хөгшчүүлд сая төгрөгийг нь өгнө” хэмээн тов тодхон хэлж байснаа тэрбээр булзааруулав. Харин хэдхэн цагийн дараа ЗГХЭГ-ын дарга Ч.Хүрэлбаатар “УИХ шийдвэрээ гаргасан тохиолдолд сар шинээс өмнө ахмадууд сая төгрөг авах боломжтой” гэж бяцхан “гэрэл” асаалаа. Хэнд нь итгэх вэ? Цагаан сарын “өмнө” ба “дараа”-гийн хооронд цөөн өдөр байгаа ч иргэдийн хувьд бол олон асуудалтай тулгарах урт хугацаа.

   ЗГХЭГ-ын дарга Ч.Хүрэлбаатарын хэлж буйгаар сая төгрөгийг гацааж буй асуудал нь Таван толгойн нүүрсний ордыг ашиглах зарим асуудлын тухай УИХ-ын тогтоолд өөрчлөлт оруулах асуудал юм. Үүнийг шийдвэл сая төгрөгийн “май” гээд л шууд өгчих юм байх. Гэхдээ энэ бол жинхэнэ “асуудалтай”. Учир нь Таван толгойн 10 хувийг аж ахуйн нэгжүүдэд олгоно гэж заасан хувийг иргэдэд өгөх үү, үгүй юу гэдгийг оны өмнөөс ярьж эхэлсэн ч эрх баригч намууд санал нийлэхгүй байгаагаас одоо хүртэл шийдэгдээгүй байна. Намрын чуулганд гурвын өдрийн хугацаа үлдээд байхад АН энэ асуудлаар завсарлага авсан нь тохиролцоход тун ярвигтай байгааг харуулж байна. Дараа долоо хоногт сонгуулийн хуульд өөрчлөлт оруулах, үнийн хөөрөгдлийг бууруулах гээд олон төвөгтэй асуудал УИХ-ыг хүлээж байгаа. Гуравхан өдрийн дотор шийдэж чадна гэдэг юу л бол. Тиймээс засгаас өгөх сая төгрөгөөр Цагаан сараа хийнэ гэж итгэж суугаа бол мөрөөдөхөө болиод мөнгө хайх хэрэгтэй болжээ. Баяраас өмнө өгнө, өгөхгүй гэдгээ тодорхой хэлж чадахгүй байгаа нь ямар шалтгаантайг дээр дурдав. Т.Ганди сайд удахгүй сайдын суудлаа Унгарын элчин сайдаар солих гэж буй тул ингэж хайнга хандаж байна гэж улстөржүүлээд ч яахав ээ. Ямартаа ч үнийн хөөрөгдөл дэндлээ гэсэн бухимдлыг дарсан “Сая төгрөгтэй сайхан шинэлээрэй” гэсэн Засгийн газрын үг молиго болов.