УИХ-ын дэд дарга Г.Батхүү, гишүүн Р.Буд, Ц.Цэнгэл нар Улсын их баяр наадмын тухай хуулийн төслийн шинэчилсэн найруулгыг УИХ-ын даргад өргөн барьжээ. Шинэчилсэн найруулгад баяр наадмыг төр зохион байгуулах нь төсвийн зардал ихтэй, буцаан төвлөрүүлж чадахгүй учир мэргэшсэн холбоонд зохион байгуулах эрхийг олгох нь илүү оновчтой гэжээ. Ингэсээр хариуцлага сайжирч, улсын их баяр наадам жинхэнэ утгаараа ард түмний наадам болно хэмээн үзсэн гэнэ.

    Энэ зүйл заалт нь үнэндээ улсын их баяр наадмыг хувьчлах гэсэн оролдлого юм. Төрийн төсвөөс хотойлоо гэх нэрийдлээр хувийн компани, албан байгууллагын нэр дээр наадмыг монопольчлох гэсэн явдал аж. Хэрэв үнэхээр төрд л ашиггүй, алдагдалтай байгаа юм бол ард түмний дундаас ашиг олдог бизнесийн болон холбоод үүнийг дааж авах гэж үү? Хэрэв үнэхээр холбоо зохион байгуулдаг боллоо гэхэд бэлэн төсөв гаргуулахгүй учраас үйлчилгээ, үзвэр, худалдаа наймаа, түрээсийн төлбөр үнэ нэмэгдэх нь тодорхой юм. Ингэснээр ард түмэнд наадмыг нь ойртуулах биш ардын наадмыг баячуудын наадам болгох магадлал ихтэй.

    Төсөлд тусгасан хоёр дахь томоохон заалт нь сэргээшийн шинжилгээтэй холбогдож буй юм. Одоогийн хуулиар шөвгийн 16-д үлдсэн бөх болон сур харвааны эхний гурван байр эзэлсэн харваачдаас сэргээшийн шинжилгээ авдаг ч шинжилгээний хариу гараагүй байхад буюу наадмын үеэр цол, чимэг олгодгийг хууль санаачлагчид буруу гэж үзжээ. Өөрөөр хэлбэл, шинжилгээний хариу гарсны дараа сэргээш хэрэглэсэн бөх, харваачдаас цол, чимгийг хурааж авдаг нь хэн, хэнийхээ сэтгэл зүйгээр тоглосон тоглолт болж буй учраас сэргээшийн шинжилгээний хариуг үндэслэн цол, чимгийг олгодог байхаар хуулийн төсөлд тусгажээ. Мөн хурдан морины уралдаанд эрлийз морьд уралдах болсон тул түүнд бас шалгуур тавих хэрэгтэй гэж үзсэн байна. Үндэсний их баяр наадмын хурдан морины уралдаанд 75 буюу түүнээс дээш хувийн Монгол цустай морьд уралдуулж байхаар хуулийн төсөлд тусгасан юм байна.