Луу жилийн хаврын эхэн сарын шинийн наймны өдөр IX Богд Жибзундамба хутагт Жамбалнамдолчойжижанцан жанч халсан билээ. Даруй тав хонож буй ч түүнийг хэзээ, хэрхэн хөдөөлүүлэх талаар мэдээллийг олон нийтэд дэлгэхгүй байсаар байгаа. Үүний учир нь агуу хүмүүс хойд төрлөө олж, сүнс нь биенээсээ гарахдаа заавал ямар нэгэн ер бусын шинж тэмдэг үзүүлдэг аж. Үүнийг нь хүлээж байж хэзээ, хэрхэн хөдөөлүүлэхээ шийднэ гэж Гандантэгчилэн хийдийн хэвлэл мэдээлэл хариуцсан төлөөлөгч мэдэгдсэн юм. Түүний тайлбарлаж буйгаар амьсгалахгүй байгааг нь анагаах ухаанд үхэл гэж үздэг ч буддын шашинд бол сүнс нь биеэсээ гараагүй тул хорвоогоос нэг мөсөн явсан гэж үздэггүй аж. Тиймээс хойд төрлөө олсон гэсэн шинж тэмдэг үзэгдэхээс нааш биеийг нь хөндөхийг цээрлэж байгаа гэнэ. Ямартаа ч түүнийг биеийг нарийн дэг, журмын дагуу занданшуулж засах юм байна.
   IX Богд жанч халснаас хойш түүний хойд дүрийнг тодруулах асуудал олон нийтийн анхаарлыг татах болсон. Тэрбээр тэнгэрт одохоосоо өмнө дэргэд байсан хүмүүстээ хойд дүр нь Монголоос тодорно, төр засгийн хэрэгт оролцохгүй, шашин номоо тэргүүлээд явна хэмээн айлдаж байсан. Энэ дагуу IX Богдын хойд дүрийг тодруулахаар ажлын хэсэг гарсан ч юун түрүүн Богдын дараах төрлөө олсон гэсэн шинж тэмдгийг хүлээж, харж байгаа гэж Гандантэгчинлан хийдийн хэвлэлийн төлөөлөгч мөн хэлсэн юм. Жанч халсны дараа хувилгаадын дүр шууд тодорчихдоггүйг бид олон жишээгээр мэднэ. Тиймээс IX Богдын хойд дүрийг тодруулах нь хэдэн сар, жилээр яригдах асуудал аж. Ямартаа ч Богд Монголд эргэж төрнө гэдгээ өөрөө айлдсан билээ.