Иргэний хөдөлгөөний удирдагч О.Магнай өнөөдөр твиттер болон фэйсбүүк хуудасдаа “Хаан хүнс” компани Хятадаас бууз оруулж ирдэг хэмээн бичсэн нь шуугиан тарив. Тэрбээр “Гаалийн мэдээг бүтэн хоёр өдөр нягтлаад өнөөдөр бичиж байна. Хамгийн сүүлд цагаан сарын өмнө 120 тонн банш оруулж иржээ. Гаалийн татвар бага өгөхийн тулд банш гэсэн байна” гэж бичжээ. Гэтэл өдрийн турш интернэтээр тараагдсан энэ мэдээлэл нь худал гэдгийг Гаалийн ерөнхий газрийн олон нийттэй харилцах албанаас О.Магнай руу утасдаж мэдээлжээ. Хилээр энэ их хэмжээний банш оруулж ирсэн нь “Хаан хүнс” биш “Хан хүнс” гэдэг Хятадын компани байсан аж. Үүнийг О.Магнай сайн тодруулж, нягтлалгүй бичиж шуугиан дэгдээсэн нь эргээд түүнийг тун эвгүй байдалд оруулав. Тэрбээр Монголын биш хятад компани байсан гэсэн ганц өгүүлбэртэй залруулга бичээд алга болсон байна. Түүнийг твиттер хуудсаар дагагчид, фэйсбүүкийн найзууд нь харин “Хаан бууз”-ны тухай биш О.Магнайг хариуцлагагүй зүйл ярилаа хэмээн шүүмжилсээр үлджээ.