Монголчуудын бахархлыг сэрээж, зүрхийг булгилуулсан үйл явдлууд шил даран өрнөж, эх орны алтан соёмбот төрийн далбаа дэлхийн энгээр намирлаа. Монгол хүн бүр зүрхээ даран нэгэн мөчийг хүлээсэн өдөр зургаадугаар сарын 29. Энэ өдөр монгол улсын эмэгтэй шигшээ баг түүхэнд тэмдэглэгдэн үлдэх, түмнээ хайрлуулан хүндэтгүүлэх яруу алдрын эзэн боллоо. 

Хэний ч санаанд оромгүй амжилтыг монгол залуус гаргаж, оюун санаа, сэтгэл зүй, хурд хүч, зориг зүрхийн дууллыг дэлхийд харуулсан юм. Манай улсын хувьд хөгжлийн түүх нь залуухан спорт бол сагсан бөмбөг. Гэвч сагсанбөмбөгчид 3x3 дэлхийн аварга шалгаруулах тэмцээнээс мөнгөн медаль хүртсэн нь эл спортын хөгжлийн хурдыг тодорхойлох онцлох үйл явдал болов.

Тэгвэл энэхүү мөчийг хуваалцан Монгол Улсын Ерөнхийлөгч У.Хүрэлсүх тамирчдад баяр хүргэхдээ "Монголчууд атгасан гар шиг эв эетэй байхдаа бахдам түүх бүтээж чаддагийг энэ торгон мөчүүд яруу тодоор батлан харуулж байна.

Аугаа амжилт ялалтыг бүтээсэн баг, хамт олон Та бүхнийг монгол төр үнэлэх болно.

Амжилтаа улам ахиулж Олимп, дэлхийн аварга болж алтан соёмбот төрийн далбаагаа тун удахгүй дахин улам өндөрт мандуулахын өлзийтэй сайхан ерөөлийг өргөн дэвшүүлье" хэмээн дурдсан байлаа. 

Ерөнхийлөгч У.Хүрэлсүхийн "Аугаа амжилт ялалтыг бүтээсэн баг хамт олон, та бүхнийг монгол төр үнэлэх болно" гэсэн нь олны анхаарлыг татаад байна. Энэ түүхэн, дээд амжилт тэдэнд "Монгол Улсын Гавьяат Тамирчин" гэх эрхэм цолыг авч ирэх болов уу гэж харж байгаа хүмүүс ч бий. 

Хэрэв  шигшээ багийн дөрвөн тамирчинд "Гавьяат" хүртээвэл, тэд "Монгол Улсын Гавьяат Тамирчин" гэж дуудуулах монголын анхны эмэгтэй сагсан бөмбөгчид болно. Түүнчлэн шигшээ багийн тоглогч Н.Нандинхүсэл 18 насандаа "Гавьяат" болсон монголын анхны сагсанбөмбөгч болно. Эл спортоос төрөн гарсан анхны гавьяат нь Ц.Шаравжамц билээ.