Драмын урлагийн шилдгүүдийг шалгаруулдаг “Гэгээн муза” наадам энэ сарын 27-нд болох гэж байна. Энэ өдөр бол Олон улсын театрын баярын өдөр юм. Ес дэхь удаагаа зохиогдож буй энэ жилийн наадамд драмын жүжиг, дуулалт жүжиг, хүүхдийн жүжиг гэсэн гурван төрөлд нийт 11 шинэ уран бүтээл өрсөлдөх гэж байна.

Драмын жүжгийн төрөлд:

УДЭТ нь Б.Шүүдэрцэцэгийн “Домогт Ану хатан”, Д.Намдагийн “Оролмаа”, Б.Цогнэмэхийн “Тэнгэрийн хүү” жүжгүүдээрээ өрсөлдөх бол “Мөрөөдлийн театр” “Миний нууц хүү”, Дархан-Уул аймгийн “Залуучууд” театр “Маргаашгүй хаан” жүжгүүдээрээ тус тус өрсөлдөх аж.

Хөгжимт жүжгийн төрөлд:

Дундговь аймгийн “Төв халхын дуулалт жүжгийн театр” нь “Жанжин заан”, Говьсүмбэр аймгийн “Боржигон” чуулга нь “Боржигон сэцэн”, Баянхонгор аймгийн ХДТ-ын бүтээл “Арван тавны сар” зэрэг бүтээлүүдээрээ тус тус өрсөлдөх гэнэ.

Хүүхдийн жүжгийн төрөлд:

Уг төрөлд Дундговь аймгийн театр болон Хүүхэлдэйн театрын уран бүтээлчид өрсөлдөх ажээ.

 Улсын хүүхэлдэйн театр анх удаа “Том хамарт одой”  хүүхдийн жүжгээр оролцох гэж байна. Түүнчлэн СУИС-ийг төгссөн оюутнууд “Гацуурхан” уран бүтээлийн нэгдэл байгуулж, “Алтан түлхүүр” жүжгээрээ өрсөлдөх гэнэ. Мөн Дундговь аймгийн төв халхын дуулалт жүжгийн театр “Солгой харандаа” жүжгээрээ тус тус өрсөлдөж байна. Нийт гурван төрөл тус бүр дээр шилдэг жүжгийн зохиол, шилдэг найруулагч, шилдэг тайзны зураач, шилдэг хөгжмийн зохиолч, шилдэг эрэгтэй гол дүр, шилдэг эмэгтэй гол дүр, шилдэг эрэгтэй туслах дүр, шилдэг эмэгтэй туслах дүр гэсэн найман номинацид уран бүтээлчид өрсөлдөнө. Энэ жилийн наадмын шилдэг уран бүтээлч номинацид нэр нь дэвшигчдийн нэрсийг танилцуулъя.

Шилдгийн шилдэгүүд хэн байх вэ?

Оны шилдэг жүжгийн найруулагчийн төрөлд:

УГЗ, Б.Баатар “Ану хатан”

Ч.Найдандорж “Оролмаа”

Н.Наранбаатар “Тэнгэрийн хүү”

Н.Дэмбэрэлсамбуу “ Маргаашгүй хаан” жүжгээр тус тус нэр дэвшжээ.

Оны шилдэг жүжгийн зохиолч төрөлд:

Уг төрөлд зохиолч Б.Шүүдэрцэцэг “ Домогт Ану хатан” жүжгээр, Б.Цогнэмэх “Тэнгэрийн хүү”, төрийн шагналт яруу найрагч Б.Лхавгасүрэн “Маргаашгүй хаан” жүжгээрээ тус тус өрсөлдөж байна.

Оны шилдэг жүжгийн хөгжмийн зохиолч төрөлд:

УГЗ, Б.Бямбабаяр “Домогт Ану хатан”

УГЗ, Т.Сэр-Од “Тэнгэрийн хүү”

Э.Эрдэнэчулуун “Маргаашгүй хаан” жүжгийн хөгжмийн зохиолоороо тус тус өрсөлдөх нь ээ.

Оны шилдэг тайзны зураач төрөлд:

“Домогт Ану хатан” жүжгээр Санжаасүрэн, “Оролмаа” “Тэнгэрийн хүү” гэсэн хоёр уран бүтээлээрээ Ганхуяг, “Маргаашгүй хаан” жүжгээр Саранхөхөө гэсэн зураачид өрсөлдөж байна.

Оны шилдэг эрэгтэй гол дүрийн төрөлд:

Энэ төрөлд “Миний нууц хүү” жүжгийн Тайвнаагийн дүрээр “Мөрөөдлийн театр”-ын жүжигчин Г.Эрхэмбаяр, мөн тус жүжгийн Самбуугийн дүрээр АЖ, Г.Мягмарнаран, “Ану хатан” жүжгийн Галданбошигтын дүрээр Цэрэнболд “Тэнгэрийн хүү” жүжгийн Модуны дүрээр СТА, жүжигчин Г.Эрдэнэбилэг нар тус тус өрсөлдөж байна.

Эмэгтэй гол дүрийн төрөлд:

“Ану хатан” жүжгийн Анугийн дүрээр СТА, жүжигчин Ц.Баясгалан, “Маргаашгүй хаан” жүжгийн Гэрэл хатны дүрээр Дунгаамаа, “Оролмаа” жүжгийн Оролмаа дүрээр МУГЖ, С.Сарантуяа нар өрсөлдөх аж.

Эрэгтэй туслах дүрийн төрөлд:  

“Мөрөөдлийн театр”-ын жүжигчин Г.Алтаншагай “Миний нууц хүү” жүжгийн Хатнаагийн дүрээр, Оролмаа жүжгийн Найданжавын дүрээр Отгонбат, мөн тус жүжгийн Хаймчигийн дүрээр Тамир, “Тэнгэрийн хүү” жүжгийн Лү Сүн Вангийн дүрээр АЖ, П.Цэрэндагва, “Тэнгэрийн хүү” жүжгийн Түмэншаньюгийн дүрээр МУГЖ, Б.Жаргалсайхан тус жүжгийн зайрангийн дүрээр СТА, жүжигчин С.Болд-Эрдэнэ “Маргаашгүй хаан” жүжгийн Дэлбэг түшмэлийн дүрээр Мандахбаяр гэсэн уран бүтээлчид өрсөлдөх юм байна.

Эмэгтэй туслах дүрийн төрөлд:   

Уг төрөлд “Мөрөөдлийн театр”-ын бүтээл “Миний нууц хүү” жүжгийн Шүүдрээ мөн “Оролмаа” жүжгийн  малгайчны дүрээр МУГЖ, Ж.Оюундарь, мөн “Ану хатан” жүжгийн Юм-агсын дүрээр МУГЖ, С.Сарантуяа, “Оролмаа” болон “Тэнгэрийн хүү” жүжигт бүтээсэн дүрээрээ МУГЖ, У.Уранчимэг, мөн МУГЖ, Г.Урнаа “Оролмаа” жүжгийн Дуламсүрэнгийн дүрээр, жүжигчин СТА, Б.Нармандах “Оролмаа” жүжгийн Должингийн дүрээр, “Тэнгэрийн хүү” жүжгийн Могол хатны дүрээр АЖ Н.Сувд нар өрсөлдөж байна.

    Шилдэгүүдэд нэр дэвшсэн жүжгүүдийг энэ сарын 19-нээс үзэж эхлэх юм байна. Энэ жилийн наадамд орон нутгийн театрын уран бүтээлчид идэвхтэй оролцож байгаа аж. 2011 онд олон түүхэн ой тохиосон учир үүнтэй холбоотойгоор түүхэн жүжгүүд ихэвчлэн өрсөлдөж байгаа нь энэ жилийн “Гэгээн муза”-ийн онцлог болж байна.  

Жүжигчид ямар хувцасаар гоёх вэ?

Энэ жил уламжлал ёсоор “Шилмэл загвар”, “Хайрын хурим”, “Эрд сүлж” зэрэг агентлаг, хувцас загварын салонуудын загвар зохион бүтээгчдийн урласан хувцасаар жүжигчид гоёх юм байна.  

СТА, жүжигчин Г.Эрхэмбаяр: Чадалтай уран бүтээлчидтэй хамт нэр дэвшинэ гэдэг бол том амжилт

-       2011 онд “Мөрөөдлийн театр” байгуулагдаад “Миний нууц хүү” жүжгээ тавьсан. Манай жүжиг гарсан даруйдаа олонд их таашаагдсан. Саяхан Дархан, Эрдэнэтэд тоглоод ирлээ. Дахин тоглооч гэсэн санал хүмүүсээс их ирж байгаа. Манай жүжгийг үзэж амжаагүй хүмүүс 21-нд УДЭТ-д ирж үзээрэй.

-       “Мөрөөдлийн театр”-ын дараагийн уран бүтээл юу вэ?

-       Бид дараагийн уран бүтээлдээ орсон байгаа. “Ээжийн дайсан” нэртэй уран сайхны киноны зураг авалтандоо орсон явж байна. Зураг авалт дуусаад монтажны ажилдаа орсон байна. Зун бид дахин шинэ кино хийнэ. Намар бас шинэ уран бүтээлээ тавина. Намрын уран бүтээлийг одоохондоо нууцалчих уу?

-       “Гэгээн муза” наадамд хэр сайн өрсөлдөгч байж чадах вэ?

-       Манай нэр дэвших ёстой гол дүрийн уран бүтээлчид бүгд нэр дэвшсэн байна. Гол нь чадалтай уран бүтээлчидтэй хамт нэр дэвшинэ гэдэг бол амжилт юм.

 Т.Хулан