Цагдаагийн экс дарга нарт холбогдох шүүх хурал энэ лхагва гаригт болно. Тэднийг 2008 оны долдугаар сарын 1-ний үймээний хэрэгт буруутгаж байгаа юм. Түүнтэй холбогдуулан МУ-ын экс ерөнхийлөгч Н.Энхбаяр "Долдугаар сарын 1"-нд болсон үймээний талаарх шинэхэн мэдээллийг өнөөдөр өгнө гэдгээ зарлалаа. 2008 оны долдугаар сарын нэгний өдөр болсон бүхий л үйл явдлын талаарх ил далд бүхий л мэдээллийг мэдэж байгаа тус эрхэм өнөөдөр чухам ямар мэдээлэл түгээх нь олны анхаарлын төвд байна. Түүний өнөөдөр өгөх мэдээлэл УИХ-ын гишүүн Х.Тэмүүжиний гаргаж тавьсан асуудлаас ч онцгой байна хэмээн эх сурвалж мэдээлэв. Мөн энэхүү мэдээлэл энэ лхагва гаригт Сүхбаатар дүүргийн шүүхэд болох цагдаагийн дарга нарыг шүүх хурлын явцад ч нөлөөлж магадгүй байгаа гэв.
Учир нь хүмүүс рүү гал нээх тушаал өгсөн дээд удирдагч нар нь цэвэр үлдэж, үүргээ биелүүлсэн цагдаагийн дарга нарыг нарсанд хорих магадлал одоогоор бүрдээд байгаа гэнэ. Тиймээс "Долдугаар сарын 1"-нд онц байдал зарласнаас хойш ҮАБЗ-ийн хийсэн бүхий л ажлын тайлантай танилцсан Н.Энхбаярын хувьд хэн буудах тушаал өгсөн бэ гэдгийг мэдэж байгаа нь дамжиггүй. Хурал МҮОНТ-ийн хэвлэлийн танхимд 12 цагаас болох аж.
Б.Чимэг
