Монголын нэр хүндийг олимпын наадамд өндөрт өргөсөн спортын хэдэн төрөл бий. Тэдгээр нь чөлөөт бөх, жүдо, бокс, буудлага гэдгийг спорт сонирхдоггүй хүн ч андахгүй.

Тэгвэл дээр тоочсон спортын төрлийнх биш, бүр хаа байсан, монголчуудын хэзээ ч амжилт гаргахгүй гэж төсөөлж байсан сагсанбөмбөгчид өчигдөр дэлхийн аварга шалгаруулах тэмцээнээс мөнгөн медаль хүртэж, нийт монголчуудынхаа магнайг хагартал баярлууллаа.

Биеийн тамир, спортын салбарын 101 жилийн түүхэнд олимпын хөтөлбөр (жин, зай, төрөл, нас)-т багтдаг спортын төрлийн дэлхийн аварга шалгаруулах тэмцээн эх орондоо зохиож байсан удаагүй бөгөөд багийн спортын дээрх амжилт мөн түүх болон үлдэх нь лавтай. Ер нь улиран одож буй зургаадугаар сар Монголын спортод тун чиг ач ивээлээ хайрлажээ.

Португал улсын Брага хотод болсон бүжгийн спортын ДАШТ-ээс Монголын тамирчид өсвөр, залуучууд, насанд хүрэгчдийн ангилалд гурвантаа түрүүлж, бүжгийн спортын түүхэнд алтан үсгээр бичигдэх гавьяа байгуулсаныг бид мартаагүй байна.

Монголчууд бөхөөс өөр төрөлд гоц амжилт үзүүлж чадна гэдгийг нотлосон амжилтын цуурай үүгээр дуусаагүй.

Их Британийн нийслэл Лондон хотноо болсон шатрын багийн ДАШТ-ий түргэн тоглолтын төрөлд манай улсын шатарчид тэргүүн байр эзэлж, Монголын спортын түүхийг улам баяжууллаа.

Үүний араас Унгарын нийслэл Будапешт хотод жүдо бөхийн ДАШТ-ээс Үндэсний шигшээ багийн тамирчин К.Ёолк, Б.Ганхайч нар хүрэл медаль хүртэж, Монголын жүдо бөхийн ДАШТ-ий 32, 33 дахь медальтан болов.

Ганзага хоосон буцаадаггүй Будапештийн дэвжээнээс хос медаль хүртсэн олимпын наадмын дараах ДАШТ гэдгээрээ өрсөлдөөн ихтэй, залуу үе төрөн гарсаныг харж болохоор байв.

Төд удалгүй Лондон хотод болсон дартсын өсвөр үеийнхний дэлхийн лигийн тэмцээнд Монголын 14 настай хүү Х.Тэргэл түрүүлж, дэлхийн чансааг тэргүүлсэн анхны Ази тивийн тоглогч болсон билээ.

Мөн Е-спортын тамирчид яалаа. “Counter Strike 2” цахим спортын хамгийн өндөр зэрэглэлийн тэмцээнд тооцогддог “Major” буюу ДАШТ-д манай улсын “MongolZ” баг дэд байр эзэлж, мянга мянган хүүхэд залуусын урам зоригийг бадрааж, тууштай байдал, хичээл зүтгэл үр дүнд хүрч болдгийг батлан харуулсан юм.

Бас болоогүй пара пауэрлифтингийн дэлхийн цомоос Э.Содномдилжээ алт, Д.Жигмэд алт, мөнгө, Б.Алтангэрэл хүрэл медальтай ирсэн нь “Лос-Анжелес-2028” олимп, паралимпын бэлтгэлжилт зөв гольдролд орсоныг батлан харуулж байна.