Саяхан Дархан-Уул аймагт хоёр ч удаа дэлбэрэлт болж, дэлбэрэлтийн улмаас олон айл өрх орох оронгүй болсон. Тиймээс аюултай ачаа тээвэрлэлтийн журмын хэрэгжилтийг хангуулах зорилгоор тус аймгийн нутаг дэвсгэрт зорчиж буй тээврийн хэрэгслүүдэд нийслэлийн холбогдох албаныхан нэгдсэн шалгалт хийсэн байна. Шалгалтаар ямар нэгэн зөрчил илрээгүй хэдий ч хот хоорондын чиглэлд зориулалтын бус нийтийн тээврийн болон автомашинаар хийн түлшний баллоныг тээвэрлэж буй хууль бус үйлдлийг таслан зогсоож, авто тээврийн хэрэгслээр хүний амь нас, эрүүл мэнд, хүрээлэн буй орчинд аюул хохирол учруулж болзошгүй ачаа тээвэрлэхийг зогсоох аймгийн Засаг даргын захирамж гарсан байна. Аюултай ачаа гэдэгт тээвэрлэлтийн болон ачих буулгах үед, мөн хадгалалтын явцад тэсрэх, гал авалцах, байшин барилга, тоног төхөөрөмж, агуулах сав, тээврийн хэрэгслийг эвдэх, хүн, мал амьтныг гэмтээх, хордуулах, түлэх, хорт туяаны цацрагаар шарах, өвчлүүлэх зэрэг нөлөө үзүүлэх бодис, биет материал бүхий ачаа багтдаг аж.Б.Чимэг
