Дөрвөн жилийн өмнө Төрийн албаны тухай хуульд оруулсан өөрчлөлт өнөөдөр 21, 22 настай залуусыг төрийн албанд ажилд ороход нь саад тушаа болж эхэллээ. Учир нь 2008 оны сонгуулийн өмнөхөн буюу тавдугаар сард УИХ-ын гишүүдийн нэмсэн өөрчлөлтөд 1990 оноос хойш төрсөн эрэгтэйчүүд төрийн жинхэнэ албан хаагч болохын тулд заавал цэргийн алба хаасан байх шаардлагатай гэсэн заалт орсон юм. Тодруулбал, Төрийн албаны тухай хууль /16.2.4-р заалт/-д 2008 оны 5-р сарын зургааны өдрөөс хойш 18 нас хүрсэн бол цэрэгт явсан байх ёстой гэж заасан. Тухайн үед 1990 оноос хойш төрсөн залуус дээд тал нь 18 настай байсан тул асуудал үүсэхээргүй байсан. Харин өнөөдөр тэд 22-той их, дээд сургууль төгссөн ажил хийх идэвхитэй насанд хүрсэн. Гэтэл дээрх заалтаас болоод төрийн байгууллагад ажиллах гэхээр “цэргийн алба хаагаагүй” гэсэн шалтгаанаар автоматаар хасагдаж байгаа юм. Жилд Монголд 65,000 хүн төрдөгийн 50 хувь нь хөвгүүд гээд хийсвэрээр тооцоод үзвэл удахгүй нэг жилд 32,5 мянган залуус цэрэгт явах болж байна. Монголын зэвсэгт хүчин нэг жилд ийм олон цэрэг бэлдэж чадна гэж үү? Мэдээж эрүүл мэндээр тэнцэхгүй, дүйцүүлэх алба хаасан залуусыг хаслаа ч их л тоо гарна. Энэ заалтын дагуу залуучуудыг цэргийн алба хаалгаж, эх оронч сэтгэлгээтэй болгож төлөвшүүлэх нь сайн хэрэг. Гэсэн ч үүний цаана бас л мөнгө, эрх мэдэл, баян ядуугийн ялгаа гэдэг асуудал тодорч байна. Амьдралын боломж сайтай, мөнгөтэй айлын хүүхдүүд бол 3,400,750 төгрөг өгөөд цэргийн албаа дүйцүүлэн хаачих тул их, дээд сургууль төгсөөд төрийн албанд орох боломж нь нээлттэй юм. Харин тийм зэргийн мөнгө төлөх чадваргүй нэг нь цэрэгт явж, энэ хооронд баян айлын хүүхдүүд ажлын байрандаа аль хэдийн байр сууриа олчихсон байх тийм л шударга бус байдал гарах нь. Энэ заалтын талаар иргэд мэдээлэлгүй байна. Мэдэж байгаа нэг нь хэл ам хийж эхэлжээ. Сонгуулийн өмнө яаран баталсан, иргэдэд хангалттай сурталчитлаагүй энэ хуулийн заалтын үр дагавар өнөөдөр гарч байна. Оюутнуудыг сурах хугацаанд нь цэргийн алба хаалгана гэж яригдаж байгаа ч ажил хэрэг болох өдий байна даа.
