Баярын өдрүүдэд Онцгой байдлын албаныхан амралтгүй ажиллаж, хүн ардынхаа эрүүл мэндийн төлөө зүтгэж байдаг. Тэдний тусламж цаг ямаг хэрэгтэй байдгийн дээр аврагч нарын ачаар хүмүүс аюул ослоос эсэн мэнд үлддэг. Шинэ он солигдох мөчид ч онцгойгийнхон өндөржүүлсэн бэлэн байдалд ажиллаж хүмүүст онцгой тусламж үзүүлжээ.

Төв аймгийн Сэргэлэн сумын Авдар багийн нутаг “Хатуугийн давааны энгэр” гэдэг газар “Тоёото” загварын суудлын автомашинтай 4 том хүн, 2 нялх хүүхэд цасанд суусан тухай дуудлагыг 2015 оны арван хоёрдугаар сарын 31-ний өдрийн 15:35 цагт өгчээ. Төв аймгийн Онцгой байдлын газрын 5 албан хаагч, 1 техник хэрэгсэлтэйгээр ажиллаж, тусламж үйлчилгээ үзүүлэн машиныг цаснаас гарган, хүмүүсийг аймгийн төвд хүргэж өгсөн байна.

Мөн нийслэлийн Хан-Уул дүүргийн 11 дүгээр хороо, Яармагаас Зайсан орох уулын хатуу хучилттай автозамын зорчих хэсэгт “Ниссан” загварын автомашин, “Хонда” загварын автомашинтай мөргөлдөж, зорчигчид гэмтжээ. Иргэн Б /50 настай, эрэгтэй/, Д /49 настай, эмэгтэй/, С /37 настай, эмэгтэй/, Ц /31 настай, эмэгтэй/, Б /21 настай, эрэгтэй/ нар хөнгөн гэмтсэн байсныг анхны тусламж үзүүлэн Яаралтай түргэн тусламжийн эмч нарт шилжүүлэн өгчээ. Дархан-Уул аймгийн Дархан сумын 8 дугаар баг, “Дархан Ус суваг” ХК-ийн зүүн талын хатуу хучилттай автозамын зорчих хэсэгт “Тоёото” загварын автомашин самбар мөргөж, төмөр хийцэнд хүн хавчуулагдсан байсныг мөн аварчээ. Осол урьд шөнө /2016 оны нэгдүгээр сарын 01-ний/ 03:48 цагт гарсан байна. Машинд хавчуулагдсан иргэн Б /27 настай, эрэгтэй/, Л /27 настай, эмэгтэй/ нарт эмнэлэгийн анхны тусламж үзүүлэн, түргэн тусламжийн эмч нарт хүлээлгэн өгчээ.

УИХ-аас 2015 онд хэд хэдэн хуулийн төслийг шинэчлэн баталж, нэмэлт өөрчлөлт оруулсан билээ. Үүний зэрэгцээ шинэ хуулиуд өргөн барьсан.
Ирэх 2016 оны нэгдүгээр сарын сарын 1-нээс буюу нөгөөдрөөс дараах хуулиуд хэрэгжиж эхэлнэ.
Хүүхдийн мөнгийг амжиргааны түвшингөөр олгоно
Өнгөрсөн сарын 13-ны өдөр УИХ Хүний хөгжил сангаас Монгол Улсын иргэнд 2016 онд хүртээх хишиг, хувийн хэмжээг тогтоох тухай тогтоолын төлсийг баталсан юм. Ингэснээр хүүхэд бүрт олгодог байсан хүүхдийн мөнгийг ирэх оны нэгдүгээр сарын 1-ний өдрөөс эхлэн ялгавартайгаар олгохоор бол­сон билээ.
Тухайлбал, төсөвт 200 гаруй тэрбумыг суулгадаг байсан хүүхдийн мөнгийг эдийн засгийн нөхцөл байдалтай холбогдуулан хасса­наар ирэх оны төсвийн жилд хүүхдийн мөнгө хэлбэ­рээр нийт 144 тэрбум төгрөг улсын төсвөөс гарахаар бол­сон. Энэ нь хүүхэд бүрт хүрэл­цэхгүй учир 0-18 насны, өрхийн амьжиргааны 1-17 ду­гаар бүлгийн хүүхдүүд сар бүр 20 мянган төгрөг олгох юм.

Танай өрх хэддүгээр бүлэгт хамрагдаж байгааг мэдэхийн тулд эхлээд хорооны нийгмийн ажилтантайгаа холбогдож хүсэлт өгөх юм байна. Ингэснээр нийгмийн ажилтан тухайн хүсэлт гаргасан өрхийн гэрт очиж, үнэлгээ хийх аж. Энд цалингийн хэмжээ нэг их нөлөөлөхгүй бөгөөд цахилгаан бараа ихтэй бол өрхийн хамрагдах бүлгийн хэмжээ дээшилж байгаа гэсэн албан бус мэдээлэл байгаа юм.
Хэрвээ амьжиргааны бүлэг тодорхойлох судалгаатай санал нийлэхгүй байгаа бол дахин нийгмийн ажилтантай холбогдон дахин үнэлгээ хийлгүүлэх боломжтой аж. Ингэсэн тохиолдолд Нийгмийн халамж үйлчилгээний хэлтсээс дахин өрхийн үнэлгээ хийж өгөх юм байна. Дашрамд дурдахад, 7-15 дугаар бүлэгт 294 мянган өрх багтдаг аж.
Хувиараа “цэцэрлэг” ажиллуулж, гэрээрээ мөнгө олох боломжтой
Улсын хэмжээнд 2013 оны байдлаар 2-5 насны 247.104 хүүхэд байгаагаас 61.585 нь нийслэлд байдаг байна. Харин тэдгээрээс 21400 хүүхэд буюу гурван хүүхэд тутмын нэг нь сургуулийн өмнөх боловсролын үйлчилгээнд хамрагдаж чаддаггүй гэсэн судалгаа бий. Гэвч, нийгэм, эдийн засгийн нөхцөл байдал, нөөц бололцооноос хамаарч одоогийн мөрдөж буй хуулийн хүрээнд 2-5 насны бүх хүүхдийг сургуулийн өмнөх боловсролын үйлчилгээнд хамруулах ямар ч боломжгүй байгаа юм. Тиймээс УИХ Хүүхэд харах үйлчилгээний тухай хуулийн төслийг өнгөрсөн долдугаар сард баталсан билээ. Энэ хууль шинэ оны эхний өдрөөс хэрэгжиж эхлэх тул иргэд заавал цэцэрлэг гэлтгүй хүүхэд харах, хүүхдээ бусдаар харуулах бүрэн боломжтой болж байгаа.
Тухайлбал, хуульд зааснаар та хүүхэд харах үйлчилгээ эрхлэх гэж байгаа бол бүрэн дунд болон түүнээс дээш боловсролтой, хүү­хэд харах үйлчилгээний тусгай сургалтад хамрагдаж гэрчилгээ авсан (Боловсролын яамны сургалтад тав хоног хамрагдана), бага насны хүүхэд­тэй харилцах арга зүй эзэмш­сэн, халдварт болон сэтгэцийн өвчин­гүй, эрүүл, гэмт хэрэгт холбогдож байгаагүй, 18-аас 65 насны Монгол Улсын иргэн байх ёстой юм. Мөн өөрийн, түрээсийн, зээлийн аль нь ч байсан хамаагүй, хүүхэд байх стандарт (хуульд зааснаар) хангасан л бол гурвуулаа нийлж, дээд тал нь 15 хүүхэд харах боломжтой юм.

Өөрөөр хэлбэл, нэг хүн таван хүүхэд харах боломжтой. Мөн хүүхэд харах үйлчилгээнд хамрагдаж байгаа нэг хүүхдэд ногдох хоолны болон нормативт зардлыг улсын төсвөөс санхүүжүүлэх юм. Халаалт, цахилгааны зардлын тухайн хүүхдэд ногдох хэсгийг эцэг, эх хариуцах бөгөөд сард 12100 төгрөг байхаар одоогоор тооцоод байна.
Түүнчлэн эцэг, эх асран хамгаалагчийн сайн дурын үндсэн дээр үзүүлэх нэмэлт төлбөрийг хуулиар хязгаарлаагүй байгаа юм. Энэ хууль хэрэгжиж эхэлснээр 30 гаруй мянган хүүхэд хүүхэд харах үйлчилгээнд хамрагдах судалгаа гарсан юм. Мөн үүний гуравны нэгтэй тэнцэх хэмжээний эцэг, эх ажлын байраар хангагдах боломжтой байна.
Худалдан авсан барааныхаа 2 хувийг эргүүлэх авах боломж үүснэ
Нэмэгдсэн өртгийн албан татвар (НӨАТ)-ыг зохицуулж байсан гурван ч хууль ирэх оны нэгнээс хүчингүй болж, Нэмэгдсэн өртгийн албан татварын тухай хуулийн шинэчилсэн найруулга хэрэгжиж эхлэх гэж байна.
Манай улс 1993 онд худалдааны татвартай байсан бөгөөд НӨАТ-ын тогтолцоог 1998 оноос хэрэгжүүлж эхэлсэн юм. Тэр цагаас хойш НӨАТ татварын орлогын багагүй хэсгийг бүрдүүлж ирсэн бөгөөд өнгөрсөн онд 1.4 их наяд орчим төгрөг төсөвт төвлөрүүлсэн байна. Энэ татвар Монгол Улсын нийт орлогын 21.9 хувийг дангаараа бүрдүүлж байгаа юм.
Нөгөө талаасаа НӨАТ-ыг эцсийн хэрэглэгч буюу худалдан авагч төл­дөг тул энэ нь биднээс гарч буй шууд татвар гэсэн үг. Заримдаа бидний авсан бараа, үйлчлүүлсэн үйчилгээний татварыг дундын бизнес эрхлэгч, хувь хүн, хуулийн этгээд төлө­хгүйгээр нуун дарагдуулдаг. Ингэс­нээр бидний төлж буй НӨАТ татвар болж очихгүй байх тохиолдол байдаг гэж судлаачид үздэг юм. Тэгвэл НӨАТ-ын буцаан олголтыг өгснөөр хяналт сайжирна гэж үзэж байна.

Харин 10-50 сая төгрөгийн жилийн борлуулалттай аж ахуйн нэгжүүд НӨАТ төлөгч байна. Ингээд бид НӨАТ төлөгч газраас бараа, үйлчилгээ, бүтээгдэхүүн худалдаж авахдаа НӨАТ төлсөн өөрсдийн хувийг авч үлдээд, цахим санд (Энэ сайтыг албан ёсоор зарлана) бүртгүүлэх ёстой юм. Худалдан авалт хийсэн бүтээгдэхүүн бүрийн 10 хувь нь НӨАТ бөгөөд үүний 20 хувь буюу үнийн дүнгийн хоёр хувийг бид дараа жилийн эхний өдрөөс эхлэн буцаан авах боломжтой юм. Мөн жилийн хугацаанд худалдан авсан барааны нийт үнэ, түүнээс өгсөн татвар зэргийг давхар хянах боломж бүрдэж байгаа.
Түүнчлэн НӨАТ төлөгч иргэд нэг удаа урамшууллын сугалаанд оролцож, их хэмжээний мөнгө хожих боломжтой юм. Тиймээс та ирэх оны нэгдүгээр сарын 1-нээс эхлээд худалдан авах бүрдээ НӨАТ төлсөн баримтаа хадгалаарай.
Нийтийн сонсголд та зөвхөн сонсогч байх уу
Өнгөрсөн долдугаар сард баталсан Нийтийн сонсголын тухай хууль ирэх оны нэгдүгээр сарын 1-ний өдрөөс эхлэн хэрэгжих юм. Социализмын үед бас сонсгол гэж байсан, тэр нь зөвхөн дарга нарын хийсэн бүтээсэн, хийж байгаа зүйлсийн талаар ярьдаг байсан тул ийм сонсгол хэрэггүй гэж иргэд үзэж байсан. Гэхдээ Ерөнхийлөгчийн өргөн барьсан Нийтийн сонсголын хууль нь “…төрийг удирдах хэрэгт иргэдийн оролцоог хангахад…” чиглэгдсэн гэж байгаа юм.
Ингээд сонсголыг хууль тогтоох, ерөнхий хяналтын, төсвийн, томил­гооны, захиргааны хэм хэмжээний болон төлөвлөлтийн, орон нутгийн гэсэн сэдвээр явуулж болох юм.

Мөн хувь хүн, байгууллага, төрийн нууцад хамаарах болон үндэсний аюулгүй байдлыг хангахтай холбоотойгоос бусад асуудлаар сонсголыг хаалттай явуулахыг хориглосон байгаа юм.
Иргэд ерөнхий хяналтын, хууль тогтоомжийн сонсгол явуулах хүсэлтээ тухайн асуудал эрхэлсэн байнгын болон дэд хороонд гаргаж болох бөгөөд бусад асуудлаар УИХ-ын гишүүдийн дөрөвний нэгээс доошгүй нь эсвэл Засгийн газрын гишүүн, Ерөнхийлөгч, Орон нутгийн ИТХ-ын зэрэг гишүүд сонсгол явуу­лах хүсэлт гаргаж болох юм.
Зөрчлийн оноог тооцож эхэлнэ
95aec1db-d072-42ab-ab1b-8a1e7e510fff.jpg
Замын хөдөлгөөний аюулгүй байдлыг хангах тухай хуульд жолооч нарт зөрчлийн оноо тооцох тухай заасан байгаа. Тэгвэл зөрчлийн оноог 2016 оны нэгдүгээр сарын 1-ний өдрөөс тооцож хасалт хийх аж.
Хуульд зааснаар жолоочийн зөрчлийн ерөнхий онооны дээд хэмжээ 10 байхаар тооцно. Тээврийн хэрэгсэл жолоодох эрх бүхий жолооч нарт шинээр жолоодох эрхийн үнэмлэх авсан жолооч /үнэмлэх нөхөж, сольж авах, ангилал ахиулахаас бусад/, зөрчлийн оноо дууссан болон эрх хасагдсан жолооч зохих журмын дагуу сургалтад хамрагдаж, шалгалтад тэнцсэн тохиолдолд зөрчлийн 10 оноо олгоно.
Жолооч замын хөдөлгөөний аюулгүй байдалтай холбоотой хууль тогтоомж, дүрэм, журам, стандарт зөрчсөн үйлдэлд нийгэмд учирч болзошгүй хор, уршгаас шалтгаалан зөрчлийн 1-5 оноо гэхчилэн дүрэм зөрчсөн жолоочийн 10 онооноос хасах журмаар явах юм.

Өнөөдөр бүх нийтээрээ амрах өдөр учраас автомашины улсын дугаарын хязгаарлалт үйлчлэхгүй. Дээр нь нэгдүгээр сарын 2, 3-нд амралтын өдөр таарч байгаа учраас дугаарын хязгаарлалт гурав хоногийн турш үйлчлэхгүй юм.

Тухайн өдөр хонь, бич, тахиа, могой, морь жилтнээ аливаа үйлийг хийхэд эерэг сайн ба бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр бурхныг тахих, бурханд залбирах, чимэг зүүх, мод тарих, байшингийн суурь тавих, хулгай, дээрмийг дарах, дайсныг номхотгох үйл, хараал, хариулга, хатуу үйл хийгээд өглөгийн түллэг тэргүүтнээ сайн. Цэрэг хөдөлгөх, улаа гаргах, хиншүү хярвасны үйл, мод таслах, тангаргалах, хурал цуглаан хийхэд муу. Өвдвөл гурав хоногт үл аниваас ужгирна. Замд гарвал хулгайд өртөгдөх гэмтэй. Баруун чих хангинавал аймшиг болно, зүүн бол жуулчин ирнэ. Өдрийн сайн цаг нь хулгана, үхэр, туулай, морь, бич, тахиа болой. Үс шинээр үргээх буюу засуулахбал идээ, ундаа элбэг олдоно.

2015 оны 12 дугаар сарын 31-ний 20 цагаас 1 дүгээр сарын 01-ний 20 цаг

хүртэлх цаг агаарын урьдчилсан мэдээ:

БАРУУН АЙМГУУДЫН НУТГААР: Үүлэрхэг. Хангайн уулархаг нутгаар бага зэргийн цас орно. Салхи баруунаас секундэд 7-12 метр, өдөртөө Алтайн салбар уулсаар секундэд түр зуур 16 метр хүрч явган шуурга шуурна. Увс нуурын хотгор болон Хүрэн бэлчир, Идэр, Тэс голын хөндийгөөр шөнөдөө 25-30 градус, өдөртөө 16-21 градус, Алтайн өвөр говиор шөнөдөө 9-14 градус, өдөртөө 0-5 градус, бусад нутгаар шөнөдөө 13-18 градус, өдөртөө 3-8 градус хүйтэн байна.

ТӨВИЙН АЙМГУУДЫН НУТГААР: Үүлшинэ. Зарим газраар бага зэргийн цас орно. Салхи баруун өмнөөс секундэд 7-12 метр, явган шуурга шуурна. Дархадын хотгороор шөнөдөө 26-31 градус өдөртөө 18-23 градус, Хэнтэйн уулархаг нутаг, Орхон-Сэлэнгэ, Хараа, Ерөө, Туул, Тэрэлж голын сав газраар шөнөдөө 23-28 градус, өдөртөө 11-16 градус, бусад нутгаар шөнөдөө 15-20 градус, өдөртөө 4-9 градус хүйтэн байна.

ЗҮҮН АЙМГУУДЫН НУТГААР: Үүлшинэ. Зарим газраар бага зэргийн цас орно. Салхи баруунаас секундэд 7-12 метр, явган шуурга шуурна. Хэрлэн, Онон, Улз, Халх голын сав газраар шөнөдөө 23-28 градус, өдөртөө 13-18 градус, бусад нутгаар шөнөдөө 20-25 градус, өдөртөө 10-15 градус хүйтэн байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Шөнөдөө цас орохгүй, өдөртөө бага зэргийн цас орно. Салхи баруун өмнөөс секундэд 5-10 метр. Шөнөдөө 24-26 градус, өдөртөө 13-15 градус хүйтэн байна.

ГОВИЙН АЙМГУУДЫН НУТГААР: Солигдмол үүлтэй. Цас орохгүй. Салхи баруунаас секундэд 7-12 метр, Арцбогдын өвөр хоолойгоор секундэд түр зуур 16 метр хүрч ширүүснэ. Өмнөговийн нутгаар шөнөдөө 9-14 градус хүйтэн, өдөртөө 1 градус дулаанаас 4 градус хүйтэн, бусад нутгаар шөнөдөө 16-21 градус, өдөртөө 4-9 градус хүйтэн байна.

УЛААНБААТАР ХОТ: Үүлшинэ. Цас орохгүй. Салхи баруунаас секундэд 5-10 метр. Шөнөдөө Яармаг-Сонгины орчмоор 26-28 градус, бусад хэсгээр 18-20 градус, өдөртөө 11-13 градус хүйтэн байна.

Улаанбаатар хот Төрийн ордон

Сайн байцгаана уу

Эрхэм хүндэт ард иргэд ээ,

Та бүхэндээ шинэ жилийн үдшийн мэндийг хүргэж хамгийн сайн сайхныг хүсэн ерөөж мэндчилье.

Удахгүй 2015 шилжирч, шинэ 2016 он айлчлан ирэх гэж байна.

2015 он хүн төрөлхтний түүхэнд тод мөрөө үлдээгээд буцаж байна.

2015 он дэлхийн хамтын нийгэмлэгийн хэтийн зорилт, тулгамдсан асуудлын шийдлийг тодорхойлоход түүхэн жил байлаа.

2015 онд НҮБ-ын бүх гишүүн орон хамтарч, 2030 он хүртэл хийх 15 жилийн ажлаа тодорхойлов. “Тогтвортой Хөгжлийн Хөтөлбөр”-өө баталж, хэрэгжүүлэх ажилдаа орлоо. 2015 оны төгсгөлөөр Парис хотноо уур амьсгалын өөрчлөлтийн асуудлаар түүхэн чухал шийдвэрт хүрч чадлаа. Хүн төрөлхтөн эх дэлхийгээ аврах, улмаар дараачийн үедээ эрүүл амгалан амьдрах орчин бүрдүүлэх чухал шийдэлд хүрлээ.

Дэлхийн нийтийн өмнө тулгамдсан олон асуудалд шийдэл олох гэсэн үр дүнтэй яриа хэлцэл, бодит алхамууд хийгдэж байна. Монгол Улс ч эдгээрт зохих хувь нэмрээ оруулсаар байна.

2015 онд Монгол Улсын иргэд 3 саяулаа боллоо. Ерөөлөөр Монголчууд улам олуулаа болж байна.

2015 онд Монгол Улс НҮБ-ын Хүний эрхийн зөвлөлд хамгийн олон орны дэмжлэг хүлээж сонгогдлоо.

2015 онд Монгол Улс, ОХУ, БНХАУ-ын Төрийн тэргүүнүүдийн ээлжит дээд хэмжээний уулзалт болж тодорхой гэрээ хэлцэл ч хийлээ.

2015 онд Монгол Улсын ҮАБЗ, Ерөнхийлөгч, Засгийн газраас Монгол Улс байнга, идэвхтэй төвийг сахих тухай бодлогоо олон нийтэд зарлав. Монгол Улсын бүрэн эрхт байдал, хөгжил дэвшилд энхийг эрхэмлэсэн зорилгод л энэ бодлого үйлчилнэ. Манай сайн хөршийн уламжлалт бодлого, хамтын ажиллагаанд ч нийцнэ. Мөн бүс нутгийн аюулгүй байдал, харилцан ойлголцолд манай идэвхтэй, байнга төвийг сахисан бодлого тус нэмрээ оруулна гэдэгт эргэлзэхгүй байна.

Эрхэм хүндэт ард иргэд ээ!

2015 он Их түүх, өнгөрснөө эргэн санахад өнөөгийн бидэнд сургамж авах, цаашдын ажил үйлсээ тодорхойлоход чухал он байлаа.

Хувилай хаан, Өндөр гэгээн гээд Монголын олон суутнуудын сүүдэр гийсний тэгш ой тохиолоо. Мөн Аугаа эх орны болон Чөлөөлөх дайны түүхт 70 жилийн ой тохиолоо. Монголчууд бид анх удаа олон нам, олон нэр давшигчийн оролцоотой явуулсан ардчилсан, чөлөөт сонгуулийнхаа 25 жилийн ойг тэмдэглэв. Бидний бахархах түүх бол бидний бүтээх ирээдүйн хүч юм. Өнгөрөгч 2015 онд бүгдээрээ түүх сургамжаа ч ярилцлаа. Гарах шийдэл, цаашдын үйл ажиллагааны талаар ч өргөн хэлэлцүүлэг өрнөсөөр байна.

2015 он Монгол Улсын бүтээлч хөгжил дэвшилд түлхэц өгсөн он байж чадлаа. Монголчууд бид иргэдийнхээ чөлөөт сонголт, бүтээлч чанар, байгаа боломж, баялагтаа тулгуурлаж олон зүйлийг Эх орондоо хийж болох юм байна гэдгээ харлаа. Олон үйлдвэр, бүтээн байгуулалтын шав тавигдаж, зарим нь бодит түүхээ бүтээж эхэллээ.

Улс орныхоо хөгжил дэвшил, өөрсдийнхөө сайн сайхны төлөө бид л санаачлага гаргах хэрэгтэй. Бид л их ажиллаж хөдөлмөрлөх хэрэгтэй. Монгол Улс бол бидний нийтлэг баялаг. Монголчуудын амжилт ололт бол зөвхөн биднээс шалтгаална. Бодит ажил, сайн санаачлагыг дэмжих хүрээ өсч байна. Хоосон хийрхэл, хариуцлагагүй байдлын орон зай хумигдаж байна. Шийдвэр гаргагчдаас хариуцлага, шинэ барьцтай шийдлийг олон нийт шаардсаар байна.

Эрхэм хүндэт ард иргэд ээ!

Шинэ он гарах мөч улам ойртсоор байна. Хуучин онд бий болгосон сайн бүхнээ шинэ ондоо улам өвлөж хөгжүүлье. Саар зүйлээсээ сургамж авч, дахиж давтахгүй, хөгжил дэвшил өөд хичээн зүтгэцгээе.

Гарч буй 2016 он манай ард иргэдийн хувьд хариуцлагатай сонголтын жил байх болно. Өндөр ёс зүйтэй, үнэт зүйлтэй, Монгол түмний нийтлэг эрх ашигт үйлчлэх төрийн түшээдээ сонгох чухал ажил биднийг хүлээж байна. Иргэдэд эрх боломж, төрд үүрэг хариуцлагыг улам баталгаажуулсан сонголт л манай улсад нэн шаардлагатай байна.

2016 оны зун Ази, Европ тивийн удирдагчид Монголд цуглана. Ази, Европын дээд хэмжээний уулзалтын 20 жилийн ой тохионо. Дэлхийн нэр нөлөө бүхий хоёр тивийн удирдагчид уг уулзалтаасаа ажил хэрэгч яриа хэлцэл, чухал үр дүн хүсэж байна. Зочин орны хувьд Монгол Улс ч бүх боломжоороо чармайн ажиллаж байна. Монгол Улсын ололт амжилт, нэр төр Монгол хүн бүрт хамаатай. Энэ чиглэлд хийж буй бүхэн, дэд бүтэц, үр дүн цаашид ч Монгол Улсад нэн хэрэгтэй.

2016 оны зуны улирлын сүүл сард Бразил Улсад Олимпын XXXI Их наадам, тэмцээн өрнөнө. Монголчуудын спорт урлаг, оюун санаа, бүтээлч үйлсийн ололт амжилт улирч буй онд арвин байсан шиг, ирэх онд ч өөдрөг байна гэдэгт итгэлтэй байна.

Гарч байгаа 2016 он манай орны хүн бүрийн амьдралд өөдрөг гэгээн өнгө нэмэхийг хүсэж байна. Он солигдох мөчийг халуун ам бүлээрээ хүлээж байгаа Та бүхэнд эрүүл энх, аз жаргал, амжилт ололтыг хүсье. Бидэнтэй шинэ оноо угтаж байгаа хамтран зүтгэгч хүн бүрт сайн сайхныг хүсье.

Ажил үүргээ одоо болтол нэр төртэй гүйцэтгэж байгаа иргэддээ ерөөл дүүрэн шинэ оны баярын мэнд хүргэе. Дэлхийн олон оронд ажиллаж амьдарч байгаа Монголчууддаа хамгийн сайн сайхныг хүсэн ерөөе. Монголоо төлөөлсөн энэхүү мэндчилгээг нойроо хугаслан хүлээсэн билэг ерөөл боддог, сайхан сэтгэлт хүн бүрт баярлалаа.

Энэхүү цагаан сүүний дээжийг айл хотол бүр элгэн саднаараа жаргалтай, хүж дэлхий Эх орон минь амгалан сайхан байхын төлөө өргөе.

Та бүхэнд шинэ оны ерөөл бүхэн шингэсэн, гал халуун, анхны мэндийг хүргэе.

Монгол минь мөнхөд мандаг ээ.

2015 оны 12 дугаар сарын 31-ний өдрийн 24:00 цаг

Жил бүр уламжлал болгон зохион байгуулдаг “Улаанбаатарын Мөнгөн шөнө” шинэ жилийн цэнгүүн Чингисийн талбайд боллоо. Тус арга хэмжээ 21 цагаас эхэлсэн бөгөөд хөгжимчин Х.Бархүү, Б.Мягмарцэрэн, Beat Box Ray, дуучин A Cool, Т.Амина, Г.Тэнүүн, хийлч Ч.Дэлгэрцэцэг нар урлагийн тоглолт сонирхуулж, нийслэлийн Улаанбаатар чуулгын уран бүтээлчид “Үйлсийн сайхан Улаанбаатар” мюзиклыг тоглов. Он солигдох мөчид нийслэлийн Засаг дарга бөгөөд Улаанбаатар хотын Захирагч Э.Бат-Үүл, нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл нар иргэддээ баярын мэндчилгээ дэвшүүлж, нийслэлчүүдтэйгээ шинэ оноо угтлаа.

Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Юуны өмнө энд хуран цугласан Та бүхнийхээ энэ үдшийн амар амгаланг айлтгая. “Үйлсийн сайхан Улаанбаатар” мюзиклыг 20 хэмийн хүйтэнд тоглож нийслэлчүүддээ шинэ жилийн бэлэг барьсан нийслэлийн Улаанбаатар чуулгын уран бүтээлчиддээ иргэдийнхээ нэрийн өмнөөс талархал илэрхийлье. Нийслэлчүүд маань шинэ жилийн баярыг жилээс жилд өргөн дэлгэр тэмдэглэдэг болж байна. Анх удаа 20 хэмийн хүйтэнд задгай талбайд мюзикл тоглосон нь дэлхийн аль ч улсад байхгүй үзэгдэл болсон гэхэд буруудахгүй бизээ. Энэ бол нийслэл маань хөгжиж байгаагийн нэг илрэл гэж ойлгож байна. Өнгөрсөн хугацаанд нийслэлд ямар бүтээн байгуулалтын ажил хийснийг Та бүхэн надаар хэлүүлэлтгүй мэдэж байгаа гэдэгт эргэлзэхгүй байна. Цаашид бид бүхэн Улаанбаатар хотоо дэлхийн жишигт нийцсэн хот болгохын төлөө хичээнгүйлэн ажиллах болно. Та бүхэндээ шинэ оны гал халуун баярын мэндийг хүргэе” гэлээ.

Энэ үеэр Улаанбаатар хотын Цагдаагийн газар, Замын Цагдаагийн газар, нийслэлийн Мэргэжлийн Хяналтын газар, Онцгой байдлын газрын албан хаагчид өндөржүүлсэн бэлэн байдалд ажиллаж, он солигдох торгон мөчид Чингисийн талбай, Маахуур толгой, Баянхошуу, Дамбын гүүр гэсэн дөрвөн цэгээс ёслолын буудлага хийлээ. Мөн баярын арга хэмжээний үеэр явган зорчигч болон тээврийн хэрэгслийн хөдөлгөөн ихэссэнтэй холбогдуулан Чингисийн талбайн баруун, зүүн талын замын хөдөлгөөнийг түр хугацаагаар хязгаарлаж, Чингисийн талбайн баруун, зүүн болон урд зогсоолыг үнэ төлбөргүй ашиглуулав. Тус үйл ажиллагаа өндөрлөсний дараа 18 чиглэлд нийтийн тээвэр иргэдэд үйлчиллээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

ХОНЬ - (3/21-4/19)
Аливаа зүйлийг хэтрүүлэхгүй байхыг хичээ. Таны нэр хүнд өндөр байх бөгөөд хөгжилтэй арга хэмжээ үргэлжилсээр танд ганцаараа байх ч цаг олдохгүй. Гэхдээ хайртай хүндээ анхаарал тавихаа мартаж болохгүй. Ямар нэг хулгайн эд зүйл худалдан авахаас татгалз. Эс тэгвээс аюултай байдалд орно. Гэнэтийн зочин тань дээр ирэх бөгөөд тэд таныг гадуур авч явахыг хүснэ. Татгалзах хэрэггүй. Таны ажил хэрэгт тус болох олон хүмүүстэй танилцах болно. Танай гэр бүл, ах дүү төрөл төрөгсдөд шинэ оны мэндийг хүргэж эрүүл энх, аз жаргал сайн сайхан бүхнийг хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
ҮХЭР - (4/20-5/20)
Өнөөдөр та баяр баясгалантай, эрч хүчтэй, өөдрөг сэтгэлтэй байна. Давуу тал болгон ашиглах гэж байгаа боломж бүрт болгоомжтой хандаарай. Санхүүгийн асуудалдаа бүтцийн өөрчлөлт хийж, өр зээл авахаасаа татгалзвал та амьдралдаа шинэ хуудсыг нээнэ. Тусгай төлөвлөгөөнүүд таны хүч хөдөлмөрөө шавхан байж олсон мөнгөө үрэхийг ятгаж болно. Гэхдээ ихэнх үхрүүд яахаа мэднэ. Хэрвээ таны хүслийг ямар нэгэн зүйл илэрхийлж байгаа бол өөрийн хичээл зүтгэлээ хадгалвал шагнагдах болно. Үдшийг гэр бүлийхэнтэйгээ өнгөрүүлэхэд тааламжтай. Таньд болон танай гэр бүл шинэ оны мэнд хүргэж эрүүл энх, аз жаргал, сайн сайхан бүхнийг хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
ИХЭР - (5/21-6/21)
Гэр бүл болон ажил хэргийн хүмүүсийн хоорондох асуудлыг шийдэхэд хамаг хүчээ барах, сэтгэл түгшээсэн өдөр байх болно. Өнөөдөр хуурч мэхлүүлэх, алдагдал хүлээж мэднэ. Сэтгэл зүйн таагүй байдал, мэдрэлийн ачаалал ихийг авна. Ингэснээр архаг хууч өвчин сэдрэнэ. Сэтгэлийн огцом өөрчлөлт гарах, тавгүйтэл үүснэ. Үл ойлголцохоос сэргийлж асуудлыг өөр нөхцөл байдлаар солих хэрэгтэй. Таны ойр дотны хүмүүс таниас хайр халамжийг хүсч байна. Гэхдээ та дээрх байдлаас амархан гарч чадах бөгөөд энэ жилийн сүүлийн барцад байх болно. Ирэх жилдээ улам ихийг бүтээж, танд болон танай гэр бүлд ажлын амжилт, эрүүл энх сайн сайхан бүхнийг хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
МЭЛХИЙ - (6/22-7/22)
Уран бүтээлийн ажил эрхэлдэг хүмүүст туйлын таатай өдөр. Шинэ жилийн баяр мартагдашгүй, хөгжилтэй өнгөрнө. Ямар ч хүмүүсийн дунд баярыг өнгөрүүлсэн танд аз жаргалтай сайн сайхан байх болно. Найз нөхөдтэйгөө шинэ жилийг угтвал хамгийн сайн. Энэ үдшийг маш гайхалтай өнгөрөөх боломжийг одод зөвхөн танай ордныхонд бэлэглэсэн бөгөөд үүнийг та нар дэмжин аваарай. Танд болон танай гэр бүлд эрүүл энх, аз жаргал сайн сайхан бүхнийг хүсэн ерөөе. Шинэ оны мэнд хүргэе.
Дэлгэрэнгүй
ПҮРЭВ, 2015 ОНЫ 12 САРЫН 31
АРСЛАН - (7/23-8/22)
Энэ жилийн хамгийн сонирхолтой сайхан цаг үеүүдийн нэг болно. Таны өмнө бүх дэлхий ертөнц нээгдэж бусдын анхаарлыг өөртөө татахад хялбар болно. Шинэ жилийг хуучин анд нөхөдтэйгээ гэрээсээ алсад угтахад таатай. Ихэнхи арслангууд адал явдал, аялал зугаалганд тун дуртай бөгөөд томоохон хэмжээний үдэшлэг цуглаанд оролцож олны анхааралд байх дуртай байна. Хүн бүхэн таны талаар ярих нь таньд тааламжтай санагдана. Гэхдээ хайртаасаа өөр бусад хүмүүст эрч хүчээ алдсаны хэрэггүй.
Дэлгэрэнгүй
ПҮРЭВ, 2015 ОНЫ 12 САРЫН 31
ОХИН - (8/23-9/22)
Эмэгтэй охины ордныхныг шинэ учрал, хөнгөн сээтэгнэл хүлээж байна. Таны биеэ барих чадвар шүтэн бишрэгчийнхээ сайн талууд, дутагдлуудыг үнэн зөв цэгнэхэд саад болохыг од эрхэс анхааруулж байна. Эрэгтэйчүүдийн хувьд гэнэтийн танил эсвэл хуучны холбоогоо сэргээхээс болгоомжил. Энэ нь таны хувийн амьдралыг сүйрэлд хүргэнэ. Энэ өдөр гэр бүлээрээ шинэ оноо угтаж дахин хэзээ ч давтагдахгүйгээр тэмдэглэн өнгрөөхийг танд болон танай гэр бүлд хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
ЖИНЛҮҮР - (9/23-10/22)
Баярын уур амьсгал орж, ер бусын гайхамшигт үйл явдлуудаар дүүрэн өдөр болно. Хувь заяаны илгээсэн бага зэргийн адал явдлууд, шинэ танилууд, ер бусын зугаа цэнгэлээс бүү татгалз. Өсвөр насны xүүхдүүд тань үеийнхэнтэйгээ шинэ оноо угтахыг хүсвэл бүү татгалз. Гэрийн хаяг, утас, хаашаа явцгаахыг нь мэдэж бай. Холын хамаатнууд ялангуяа ганц бие хүмүүсийгш бүү март. Танд болон танай гэр бүлд шинэ оны мэнд хүргээд эрүүл энх аз жаргал, сайн сайхан бүхнийг хүсэн ерөөе. Шинэ оны мэнд хүргэе.
Дэлгэрэнгүй
ПҮРЭВ, 2015 ОНЫ 12 САРЫН 31
ХИЛЭНЦ - (10/23-11/21)
Дотны хүмүүстэйгээ хамт цагийг өнгөрөөхийг илүүд үзэж байгаа таныг багахан хэмжээний ажлын шаардлагаар уях болно. Гэхдээ энэ нь танд таагшүй санагдаж байгаа боловч үүнийг заавал хийх хэрэгтэйг сануулж байна. Учир нь танд тохиолдож болзогүй эрсдлийг ажил тань үүрч байна. Оны сүүлийн өдөр танай гэр бүл, найз нөхөд чинь үнэхээр аз жаргалтай байж алдаа болгоныг хуучин ондоо орхиж, амжилт болгоныг шинэ онтойгоо авч орохыг ерөөж байна. Танд аз жаргал сайн сайхан бүхнийг хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
НУМ - (11/22-12/21)
Хувийн болон гэр бүлийн амьдралдаа гэнэтийн бэлэг авахад бэлэн бай. Найз нөхөд, ах дүүс, хамт ажиллагсадтайгаа харьцах харьцаа харилцан хүндэтгэл дээр үндэслэнэ. Хуучин оны сүүлийн өдрийг гэр бүлдээ зориул. Гацуур модны гap тоглоом бэлтгэхэд оролц. Хүүхдүүддээ гэрээ чимэхэд нь тусал. Баярын сайхан уур амьсгал бүрдүүл. Зөвхөн сайн мэдээ сонсоно. Хүссэн бэлгээ авна. Айлд зочилж оч. Эсвэл найз нөхөд, ах дүүсээ гэртээ урь. Танай гэр бүл, ах дүү, төрөл төрөгсдөд шинэ оны мэнд хүргээд аз жаргал сайн сайхан бүхнийг хүсэн ерөөе.
Дэлгэрэнгүй
ПҮРЭВ, 2015 ОНЫ 12 САРЫН 31
МАТАР - (12/22-1/19)
Ирэх онд матарнууд яүгууртан мэт амьдралаас татгалзаж, аливаа олон нийтийн арга хэмжээг мэдээгүй мэт өнгөрүүлж, тэр ч битгий хэл хамтран ажиллагчийнхаа төрсөн өдрийг үл мэдэгч болон өнгөрүүлэх хүсэл нь давамгайлна. Дүнсгэр, түгжигдмэл байдал бүү авт. Хэрвээ та яст мэлхий мэт хцяган дотроо нуугдаж ил гарахыг хүсэхгүй бол чухал үйл явдлууд тань хажуугаар өнгөрөх болно. Та хүмүүсийг гэртээ урихдаа баяр хөөтрэй байх болно. Энэ үел гэр амьтай мартнууд найз нөхөд болон хайртай хүнтэйгээ цагийн өнгөрөөхөд таатай байна. Хэрэв гэр бүлд тань асуудал тулгарвал сайн ярилцаж тайвшруулах хэрэгтэй. Өөдрөг эрч хүчтэй байгаарай.
Дэлгэрэнгүй
ПҮРЭВ, 2015 ОНЫ 12 САРЫН 31
БУМБА - (1/20-2/18)
Та амьдралын дээд түвшин рүү тэмүүлж байна. Таньд хөрөнгө мөнгө, тохилог байшин, сайн гэр бүл шаардлагатай. Аз жаргалтай баян хүн болох, хүссэндээ хүрэхэд шаардагдах бүх зүйл танд байна. Таны амьдралын олон зүйл өөрийгөө үнэлэх үнэлгээнээс хамаарна. Амьдрал ба энэ хооронд хийж амжуулсан бүх зүйлээсээ таашаал ав. Ямар нэг зүйл өөрчлөхөөс бүү ай. Таны зорилго бол амьдралаа олон талтай болгох явдал юм. Оны сүүлийн өдөр та бүх уур бухимдлаа тайлж Шинэ оноо угтаарай. Танд болон танай гэр бүлд эрүүл энх аз жаргал сайн сайхан бүхнийг хүсэн ерөөе. Шинэ оны мэнд дэвшүүлье.
Дэлгэрэнгүй
ПҮРЭВ, 2015 ОНЫ 12 САРЫН 31
ЗАГАС - (2/19-3/20)
Өнөөдөр загасынхан өөрсдийгөө ертөнцийн төв мэтээр төсөөлнө. Тэд бүхнийг удирдаж зааварлаж итгүүлж бэлэг өгч зугаацуулж хамгаалж байхыг хүснэ. Энэ нь ч биелэлээ олно. Лаа, хятад улаан дэнлүү, бенгалын гал зэргийг нөөцлөхөө мартав. Ирж буй 2015 оныг түүдэг гал, задгай зуухны дэргэд угтвал гайхамшигтай байх болно. Галын дөл хэдий чинээ хурц тод байх нь энэ жил таны хувьд төдий чинээ хурц тод байх болно. танд болон танай гэр бүлд ирж буй шинэ ондоо эрүүл энх, сайн сайхан бүхнийг хүсэн ерөөе. Шинэ оны мэнд хүргэе.

Үнэлэх: Одоогийн үнэлгээ:
Сэтгэгдэл Илгээх Хэвлэх Share|
Есөн сум түргэн тусламжийн машинтай боллоо
45 минутын өмнө


Эрүүл мэнд, спортын яамнаас шинэ оны босгон дээр улсын төсвийн хөрөнгө оруулалтаар зургаан аймгийн есөн суманд Япон улсад үйлдвэрлэсэн Ниссан маркийн тусгай зориулалтын түргэн тусламжийн авто машиныг хүлээлгэн өглөө.

2015 оны төсвийн тухай хуулийн Эрүүл мэнд, спортын сайдын багцаас Улсын төсвөөс Улаанбаатар хотын 9 эрүүл мэндийн байгууллагад,18 аймагт нийт 47 түргэн тусламжийн автомашиныг олгохоор тендер зарлан сонгон шалгаруулж, гэрээ байгуулсан. Өмнө нь найман түргэн тусламжийн автомашиныг нийлүүлээд байсан бол өнөөдөр цас зудны байдал хүнд байгаа алслагдсан аймгуудын сумд болох Говь-Алтай аймгийн Эрдэнэ сум, Сүхбаатар аймгийн Асгат, Ховд аймгийн Ховд, Мөст сумд Хөвсгөл аймгийн Төмөрбулаг, Хэнтий аймгийн Батноров, Төв аймгийн Аргалант, Өвөрхангай аймгийн Хайрхандулаан, Өмнөговь аймгийн Мандал-Овоо сумдад олголоо.

Эрүүл мэнд, спортын сайдын үүрэг гүйцэтгэгч Ц.Оюунбаатар түргэн тусламжийн машин гардуулах үеэр хэлсэн үгэндээ Эрүүл мэнд, спортын яам, Улсын онцгой комисс өвөлжилтийн бэлтгэлийг хангах ажлын хүрээнд ард иргэддээ тэр дундаа хөдөөгийн алслагдсан сумдын малчдад эмнэлгийн тусламж үйлчилгээг шуурхай цаг алдалгүй хүргэх боломж нөхцлийг бүрдүүлж байна. Цаашид ч эрүүл мэндийн байгууллагуудаа төлвөлгөөний дагуу түргэн тусламжын авто машинтай болгох ажил ээлж дараатай явагдана. Шинэ он гараад мөн Япон улсаас захилсан дараагийн ээлжийн авто машин орж ирнэ гэдгийг энэ үеэр хэллээ.



Авто машин гардуулах үйл ажиллагаанд Эрүүл мэнд, спортын сайдын үүрэг гүйцэтгэгч Ц.Оюунбаатар, Эрүүл мэнд, спортын яамны Төрийн нарийн бичгийн дарга С.Ламбаа болон бусад албаны хүмүүс оролцлоо.

онгол Улсын Их Хурлын гишүүн Н.Энхболд 2016 оны 01 дүгээр сарын 01-ний өдрөөс хэрэгжиж эхлэх Нийтийн сонсголын тухай хуулийн талаар өнөөдөр /2015.12.31/ мэдээлэл хийлээ.



Тэрээр мэдээлэлдээ, Нийтийн сонсголын тухай хуулийн төсөл болон холбогдох бусад хуулийн төслүүдийг Монгол Улсын Ерөнхийлөгчөөс 2014 оны 6 дугаар сарын 8-ны өдөр Улсын Их Хуралд өргөн мэдүүлснийг 2015 оны 7 дугаар сарын 8-ны өдрийн Улсын Их Хурлын чуулганы нэгдсэн хуралдаанаар хэлэлцэн баталсан. Төрийн шийдвэр боловсруулах, хэлэлцэх, батлах, хэрэгжилтийг нь хянах бүхий л үйл ажиллагаанд иргэд оролцож, үзэл бодлоо илэрхийлэх, шийдвэрт саналаа тусгах боломж нөхцлийг бүрдүүлсэн маш чухал хууль батлагдсан гэдийг онцлоод хуулийн талаар дэлгэрэнгүй тайлбарласан юм.

Нийтийн сонсголын тухай хууль нь 5 бүлэг 26 зүйлтэй. Хууль тогтоомж, захиргааны хэм хэмжээний актыг тогтоох, төрийн байгууллага, нутгийн өөрөө удирдах болон нутгийн захиргааны байгууллага, албан тушаалтны үйл ажиллагаанд хяналт тавих, түүнчлэн хууль тогтоомж, захиргааны хэм хэмжээний актын хэрэгжилтийг үнэлэх, нийтийн эрх ашгийг хөндсөн асуудлаар шийдвэр гаргахын өмнө төрийн байгууллага, албан тушаалтан, иргэн, хуулийн этгээд, мэргэжлийн шинжээчээс санал сонсох, мэдээлэл авах зорилгоор нийтийн сонсголын үйл ажиллагааг зохион байгуулна. Ингэхдээ Нийтийн сонсголын тухай хуулиар хууль тогтоомжийн төсөл, ерөнхий хяналтын, төсвийн хяналтын, томилгооны, захиргааны хэм хэмжээний болон төлөвлөлтийн, орон нутгийн сонсгол гэсэн үндсэн 6 төрлийн сонсголыг доор дурдсан үндэслэл, журмаар явуулж төрийг удирдах хэрэгт иргэдийн оролцоог хангахаар тусгажээ.

Үүнд:

1. Хууль санаачлагч нь хүний эрх, эрх чөлөө, хуулийн этгээдийн эрх, хууль ёсны ашиг сонирхлыг хязгаарлахтай холбоотой болон нийтийн ашиг сонирхолтой шууд хамааралтай нийгэм, эдийн засаг болон байгаль орчны асуудлыг шийдвэрлэхэд хууль тогтоомжийн төслийн сонсголыг явуулахаар тусгасан байна.

Хууль тогтоомжийн төслийн сонсгол явуулах асуудлыг тухайн Байнгын хорооны нийт гишүүдийн гуравны нэгээс доошгүйн саналаар шийдвэрлэх бөгөөд иргэн хуулийн этгээд уг сонсголыг явуулах хүсэлтийг тухайн асуудал эрхэлсэн Байнгын болон дэд хороонд хандан гаргах юм.

2. Хууль тогтоомжийн хэрэгжилтийн мониторинг үнэлгээ хийх эрх зүйн орчинг бүрдүүлэх зорилгоор Улсын Их Хурал, нутгийн өөрөө удирдах байгууллага ерөнхий хяналтын сонсголыг явуулахаар тусгав. Ингэхдээ Хууль тогтоомж, захиргааны хэм хэмжээний актын хэрэгжилтийг үнэлэх зорилгоор ерөнхий хяналтын сонсголыг тогтмол явуулах бөгөөд тухайн хууль, тогтоомж, захиргааны хэм хэмжээний акт хүчин төгөлдөр болсноос хойш 24-30 сарын дотор эхний хяналтын сонсголыг, дараагийн сонсголыг таван жил тутамд нэгээс доошгүй удаа заавал зохион байгуулна.

3. Улсын Их Хурал нь төсвийн хууль тогтоомжийн хэрэгжилтийг хангуулах, төсвийн сахилга батыг дээшлүүлэх, төсвийн орлого, зарлага, төсвөөс санхүүжүүлсэн болон хөрөнгө оруулсан үйл ажиллагаа, хөрөнгө оруулалтыг хянах зорилгоор улсын нэгдсэн төсвийн биелэлт, зарцуулалттай холбоотой асуудлаар Төрийн аудитын байгууллагаар дүгнэлт гаргуулан төсвийн хяналтын сонсголыг зохион байгуулахаар тусгав.

4. Улсын Их Хурал өөрийн бүрэн эрхийн хүрээнд хамаарах асуудлаар албан тушаалтныг томилохдоо Улсын Их Хурлын нийт гишүүдийн дөрөвний нэгээс доошгүй гишүүдийн хүсэлтийг үндэслэн томилгооны сонсголыг явуулахаар заажээ.

5. Захиргааны хэм хэмжээний болон төлөвлөлтийн сонсголыг захиргааны хэм хэмжээний актыг батлах, нийтийн ашиг сонирхлыг хөндсөн захиргааны шийдвэр гаргахын өмнө зохион байгуулахаар тусгав.

6. Орон нутгийн сонсголыг Улсын Их Хурал, Засгийн газар нь тухайн орон нутгийн иргэдийн Төлөөлөгчдийн Хурлын хүсэлт, тухайн асуудал хариуцсан байнгын хорооны шийдвэрийг үндэслэн тодорхой асуудлаар тухайн газарт очиж явуулахаар заасан байна. Нийтийн сонсголын тухай хуулийг баталснаар хууль тогтоох болон төрийн шийдвэр гаргах үйл ажиллагаанд иргэний оролцоог хангах, иргэд төрөөс гарах шийдвэрийн талаар өөрийн санал бодлоо илэрхийлэх, шийдвэрт нөлөөлөх эрх зүйн үндэс бүрэлдэж, төр иргэн хооронд мэдээллийн эргэх холбоо үүсч, иргэдээс төрд итгэх итгэл нэмэгдэх бөгөөд үүний үр дүнд хууль, нийтээр дагаж мөрдөх хэм хэмжээ тогтоосон актын чанар сайжирч, нийтээр хүлээн зөвшөөрөх хандлагад эерэг нөлөө үзүүлнэ гэж үзжээ.

Мэдээллийн төгсгөлд Улсын Их Хурлын гишүүн Н.Энхболд сэтгүүлчдийн сонирхсон асуултад хариулт өглөө.

Өнөөдөр 21:00 цагаас Чингисийн талбайд “Мөнгөн шөнө” цэнгүүний үеэр Улаанбаатар хотын Цагдаагийн газар, Замын Цагдаагийн газар, нийслэлийн Мэргэжлийн Хяналтын газар, Онцгой байдлын газрын албан хаагчид өндөржүүлсэн бэлэн байдалд ажиллаж, он солигдох торгон мөчид нийслэлийн дөрвөн цэгт ёслолын буудлага хийх юм. Мөн баярын арга хэмжээний үеэр явган зорчигч болон тээврийн хэрэгслийн хөдөлгөөн ихэсдэгтэй холбогдуулан Чингисийн талбайн баруун, зүүн талын замын хөдөлгөөнийг 20:00 цагаас эхлэн түр хугацаагаар хязгаарлаж, Чингисийн талбайн баруун, зүүн болон урд зогсоолыг үнэ төлбөргүй ашиглуулах юм. Тус үйл ажиллагаа өндөрлөсний дараа 18 чиглэлд нийтийн тээвэр иргэдэд үйлчилнэ.

Жил бүрийн нэгдүгээр сарын 1-нд бүх нийтээр амардаг. Энэ өдөр автомашины улсын дугаарын хязгаарлалт үйлчлэхгүй. Нэгдүгээр сарын 2, 3-нд амралтын өдөр таарч байгаа учир мөн дугаартын хязгаарлалт үйлчлэхгүй юм байна.

Баярын өдрүүдэд замын хөдөлгөөний ачаалал эрс нэмэгддэг учир өнөө орой “Чингис”-ийн талбайд болох ”Мөнгөн үдэш” арга хэмжээний дараа иргэдэд үйлчлэх тусгай автобусуудыг нийслэлийн Тээврийн газраас гаргаад байгаа аж.

Эрүүл мэнд, спортын сайд асан Г.Шийлэгдамбыг авлигын хэрэгт сэжиглэн эрүүгийн хэрэг үүсгэн АТГ-аас баривчилж, Төв аймгийн Урьдчилан хорих төвд саатуулаад байгаа. Тэгвэл шүүхээс шийдвэр гаргаснаар түүнийг цагдан хорих хугацааг 30 хоногоор сунгасан байна.
Өнгөрсөн сард мөн Г.Шийлэгдамбын цагдан хоригдох хугацаа дуусгавар болсон ч шүүхээс түүнийг яллагдагчаар татаж, цагдан хорих хугацааг дахин хоёр сараар сунгасан юм. Тодруулбал, яллагдагчаар татаж, үргэлжлүүлэн хорих хүсэлтээ АТГ прокурорт хүргүүлсэн байна. Прокурор хүсэлтийг шүүхэд хүргүүлснээр Баянзүрх, Сүхбаатар, Чингэлтэй дүүргийн шүүхээс дээрх шийдвэрийг гаргажээ. Г.Шийлэгдамбын биеийн байдал тааруу байгаа учир өмгөөлөгч нь батлан даалтад гаргуулах хүсэлтээ шүүхэд хүргүүлсэн ч хүсэлтийг шүүх хүлээж аваагүй юм.

Тээврийн хэрэгслийг ачих, зөөх, шилжүүлэх, шинэчилсэн журмыг 2016 оны нэгдүгээр сарын 1-нээс мөрдөж эхэлнэ.
НИТХ-аас 08:00-20:00 цагийн хооронд хориглосон газарт зогсож бусдын хөдөлгөөнд саад учруулсан тээврийн хэрэгслийг зөөж, шилжүүлэх төлбөрийг тогтоосон. Тодруулбал, Мотоцикл 30,000 төгрөг Суудлын автомашин, микробус болон 3,5 тонн хүртэлх жинтэй ачааны автомашин, автобус 60,000 төг 3,5 тонноос дээш жинтэй том оврын тээврийн хэрэгслийг 90,000 төгрөгөөр зөөж шилжүүлдэг байхаар тогтоолоо.
ТҮР СААТУУЛАХ ХАШАА /БАЙР/-НЫ НЭГ ХОНОГИЙН ТӨЛБӨР Мотоцикл 3,000 Суудлын автомашин, микробус болон 3,5 тонн хүртэлх жинтэй бүх ачааны машин 5,000 3,5 тонноос 24 тонн хүртэлх жинтэй ачааны автомашин болон дунд оврын автобус 10,000 Тусгай зориулалтын том оврын тээврийн хэрэгсэл, хүнд механизми 20,000 төгрөг байна.

Төв аймгийн Эрдэнэ сумын Өгөөмөр багийн “Тарваган шийрийн гацаа” гэдэг газар Туул голын мөсөн дээгүүр зорчиж явсан 22-00 ... улсын дугаартай “Ланд крузер-100” загварын автомашин мөс цөмөрч суусан байна гэсэн дуудлага Онцгой байдлын албанд иржээ.
Тус дуудлагын дагуу Налайх дүүргийн Онцгой байдлын хэлтсийн албан хаагчид ажиллахад, жолооч Д (48 настай, эрэгтэй) автомашины бүхээгтээ осгож нас барсан байжээ. Уг хэргийг цагдаагийн байгууллагад шалгаж байна.

Улсын Ерөнхий прокурорын дэргэдэх зөвлөлийн хуралдаан 2015 оны 12 дугаар сарын 31-ний өдөр боллоо.

Хуралдаанаар прокурорын байгууллагаас 2016 онд дэвшүүлсэн зорилт, УЕПГ-ын 2016 оны үйл ажиллагааны төлөвлөгөө, Прокуроруудын ажлын байрны тодорхойлолтын тус тус хэлэлцэж баталлаа.

Прокурорын байгууллага 2016 онд прокурорын мэтгэлцэх ур чадварыг дээшлүүлэх, шүүхэд төрийг төлөөлөх үйл ажиллагааг өргөжүүлэх, прокурорын мэргэжил, ёс зүйн үнэлэмж, урамшуулал, хариуцлагын тогтолцоог төгөлдөржүүлэх зорилтыг дэвшүүлж ажиллахаар боллоо.

Дархан-Уул аймгийн прокурорууд гэмт хэргээс урьдчилан сэргийлэх чиглэлээр Дархан сумын Малчин, Өргөө болон 1-16 дугаар багуудын гэмт хэргээс урьчилан сэргийлэх ажлыг шалган тусалж мэргэжил арга зүйн туслалцаа үзүүлэн, багуудад гарсан гэмт хэргийн шалтгаан нөхцлийг арилгуулахаар мэдэгдэл бичжээ.

Прокурорууд хариуцсан багийн засаг дарга, нийгмийн ажилтан, хэсгийн байцаагч нарт гэмт хэргээс урьдчилан сэргийлэх тухай хуулийг хэрэгжүүлэх талаар сургалт явуулсан ба хяналтын прокурор Д.Энхтуяа, С.Баттамир нар хариуцсан багтаа Ерөнхий боловсролын сургуулийн 10-11 дүгээр ангийн 500 гаруй сурагчдад Прокурорын байгууллагын чиг үүргийг танилцуулан 2015 онд зонхилон гарсан хулгай, дээрэм, хөдөлгөөний аюулгүй байдлын эсрэг гэмт хэргүүдийн шалтгаан нөхцөл, гэмт хэргээс урьдчилан сэргийлэх арга замын талаар яриа таниулга хийж шалгалтыг үр дүнтэй явуулсан байна.

Зам тээврийн яамны Төрийн нарийн бичгийн дарга, “Монголын төмөр зам” ТӨХК-ийн ТУЗ-ийн дарга асан Б.Батзаяа, Ухаахудаг-Гашуун сухайтын чиглэлийн төмөр замын ажлыг гүйцэтгэж байсан Өмнөд Солонгосын “Самсунг С&Т” компанийн захирал Ли Жон Гёл нарыг хоёр сарын өмнө цагдан хорьж нийгэмд багагүй шуугиан дэгдээсэн.

Улмаар өнгөрсөн сард “Самсунг С&Т” компанийн захирал Ли Жон Гёл, Б.Батзаяа нарыг батлан даалтад гаргаад байсан ч Б.Батзаяаг төд удалгүй эргүүлэн хорьсон.

Тэгвэл өдгөө ШШГЕГ-ын харьяа хорих 461 дүгээр ангид саатуулагдаж буй Б.Батзаяа Өргөдлийн байнгын хороонд өргөдөл илгээжээ. Түүний энэ сарын 18-нд илгээсэн тус өргөдөлд тэрбээр хоёр зүйлийг тусгасан байна. Ингэхдээ байнгын хорооны дарга О.Баасанхүүтэй уулзахыг хүссэн төдийгүй өлсгөлөн зарлахаа ч тусгажээ.

Б.Батзаяаг Эрүүгийн хуулийн 148.4 буюу зохион байгуулалттайгаар бусдын эд хөрөнгийг залилан мэхэлж улсад үлэмж их хэмжээний хохирол учруулсан, 161’1.2 буюу зохион байгуулалттайгаар мөнгө угааж улсад онц их хэмжээний хохирол учруулсан байж болзошгүй гэсэн үндэслэлээр шалгаж байгаа билээ.

...WWW.24TSAG.MN сайт нь 2011 онд байгуулагдсан өдөр тутмын мэдээллийн шуурхай сайт юм. Байгуулагдаад 4 жил болж байгаа ч бид Монголын дөрөвдэхь том мэдээллийн веб сайт болон байр сууриа эзэлж, өөрийн гэсэн уншигчдын хүрээллийг бий болгосон амжилтыг үзүүлээд байна...

Шинэ жилийн баярын өдрүүдэд пиротехникийн хэрэгсэл буюу салют худалдаж авахгүй байхыг Мэргэжлийн хяналтын ерөнхий газрын “Зөвлөгөө, мэдээллийн төв” анхааруулж байна.

Хэзээ, хаана үйлдвэрлэсэн нь тодорхой бус, хэрэглэх зааваргүй, баталгаагүй пиротехникийн хэрэгслийг гар дээрээс худалдаж авч он солигдох мөчид хэрэглэснээс гар, хуруугаа гэмтээн эрүүл мэндээрээ хохирсон тохиолдол хэдэн жилийн өмнө гарч байсан. Иймээс баяраа тэмдэглэж байгаа иргэд, аж ахуйн нэгж, байгууллагууд зөвшөөрөлгүйгээр пиротехникийн хэрэгсэл буюу салют ашиглахгүй байх, зайлшгүй шаардлагатай гэж үзвэл зөвхөн мэргэжлийн хүн ажиллуулах зэргээр аюулгүй байдлаа хангахыг анхааруулж байна.

Гар дээрээс болон худалдааны төв, зах, бусад газарт зөвшөөрөлгүйгээр пиротехникийн хэрэгсэл худалдан борлуулж байгаа тохиолдолд мэргэжлийн хяналт, онцгой, цагдаагийн байгууллагад мэдэгдэхийг зөвлөж байна.