Монгол Улсын Их Хурлын дарга М.Энхболдод өнөөдөр (2017.11.28) Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд өөрчлөлт оруулах тухай 2014 оны протоколыг соёрхон батлах тухай мөн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Банкны дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслүүдийг УИХ-ын гишүүн, Засгийн газрын ХЭГ-ын дарга Г.Занданшатар өргөн мэдүүллээ.



Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд 2014 оны 5 дугаар сарын 08-ны өдрийн протоколоор дараах өөрчлөлтийг оруулжээ.

-Компанийн засаглал. Компанийн засаглалын шинэ систем буюу Удирдлагын дээд түвшнийг Удирдах зөвлөл, Захирлуудын зөвлөл (ТУЗ), Ерөнхий хороо гэсэн гурван түвшинт удирдлагад шилжүүлэх;

-Шинэ дүрэм. Удирдах зөвлөл, Захирлуудын зөвлөл, Ерөнхий хорооны эрх үүргийг зааглан тогтоох;

-Санал хураах зарчим. “Нэг орон-нэг санал” гэсэн санал хураалтын хуучин зарчмаас татгалзаж, олон хөгжлийн банкуудын жишгийн дагуу гишүүн орнуудаас банкны дүрмийн санд оруулсан хөрөнгийн хэмжээнээс хамаарсан санал хураалтын шударга зарчимд шилжих;

Иймд Олон улсын гэрээний тухай хуулийн 8 дугаар зүйлийн 8.2 дахь хэсэг, 9 дүгээр зүйлийн 9.1 дэх хэсэг, 10 дугаар зүйлийн 10.1 дэх хэсгийг тус тус үндэслэн Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслийг Улсын Их Хурлаар батлуулснаар энэхүү банкыг үүсгэн байгуулсан хэлэлцээр болон банкны дүрэмд оруулах өөрчлөлтийг хүлээн зөвшөөрч, банкны гишүүний эрх хадгалагдана хэмээн Засгийн газрын ХЭГ-ын дарга Г.Занданшатар онцоллоо.



Түүнчлэн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Банкны дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслийг өргөн мэдүүлсэн юм.

Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Эдийн засгийн хамтын ажиллагааны тухай олон улсын банкны дүрэмд 1970 оны 12 дугаар сарын 18, 1977 оны 11 дүгээр сарын 23, 1990 оны 12 дугаар сарын 18 болон 2014 оны 11 дүгээр сарын 25-ны өдрийн протоколоор тус тус нэмэлт, өөрчлөлт оржээ.

Иймд Олон улсын гэрээний тухай хуулийн 8 дугаар зүйлийн 8.2 дахь хэсэг, 9 дүгээр зүйлийн 9.1 дэх хэсэг, 10 дугаар зүйлийн 10.1 дэх хэсгийг тус тус үндэслэн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Эдийн засгийн хамтын ажиллагааны тухай олон улсын банкны дүрэмд өөрчлөлт оруулах тухай 2014 оны протоколыг манай улс соёрхон баталснаар банкны гишүүний эрх хадгалагдах юм байна хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

ЖАКАРТА. /Би-Би-Си/. Индонезийн Агунг галт уул өнгөрсөн долоо хоногт сэрж, үнс нурмаа хэдэн мянган метрийн өндөрт цацаж буйн улмаас үзэгдэх орчин хязгаарлагдмал болсонтой холбоотойгоор тус улсын аялал жуулчлалын төв гэгддэг Бали арлын олон улсын нисэх онгоцны буудлын хаалгыг дахин 24 цаг барих шийдвэрийг Тээврийн яам нь өнөө өглөө гаргажээ.

“Би-Би-Си” телевизийн мэдээлснээр, Бали арлын төв Денпасар хотын захад орших Олон улсын нисэх онгоцны буудлын үйл ажиллагааг орон нутгийн цагаар лхагва гарагийн буюу маргааш өглөөний 07:00 цаг хүртэл зогсоох шийдвэр гаргасан байна.


/Нислэг цуцлагдсаны улмаас нисэх онгоцны буудалд гацаад буй жуулчид/

Далайн түвшнээс дээш 3000 м-ийн өндөрт орших Агунг галт уул өнгөрсөн долоо хоногийн мягмар гарагт сэрж, үнс нурмаа цацаж эхэлжээ. Тус галт уул сүүлийн 54 жилийн хугацаанд анх удаагаа сэрсэн нь энэ аж.

Галт уул хэзээ мөдгүй дэлбэрч болзошгүй гэж Индонезийн ОБЕГ-ын албаны хүмүүс даваа гарагт анхааруулаад, аюулын зэрэглэлийн дохиог хамгийн өндөр түвшинд шилжүүлсэн байна.

Мөн галт уулын ойр орчмын суурин газруудад амьдардаг 100 мянга гаруй хүнийг нүүлгэн шилжүүлэхийг ОБЕГ-ын удирдлага ажилтнууддаа үүрэг болгожээ.

Агунг галт уул сэрсэн нь Индонезийн аялал жуулчлалын салбарт ихээхэн сөргөөр нөлөөлж байна. Аялал жуулчлалын салбар нь тус улсын эдийн засгийн гол хөдөлгүүр билээ.
Г.Доржханд

“Ази, Европын дээд түвшний 11 дүгээр уулзалт “АСЕМ”-ыг зохион байгуулсан үйл ажиллагаа, түүний гүйцэтгэл, үр дүн”-д хийх эрсдлийн аудитын нээлтийн үйл ажиллагаа өнөөдөр Үндэсний аудитын газарт боллоо.

Тус үйл ажиллагаанд Монгол Улсын Ерөнхий аудитор Д.Хүрэлбаатар, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэг, Үндэсний аудитын газрын Чанарын баталгаажуулалтын албаны аудитын менежер Л.Одгэрэл, БХБЯ, СЯ, БСШУСЯ, ГХЯ, ХХААХҮЯ, БОАЖЯ, БХЯ, ХЗЯ, НЗДТГ, ИНЕГ, ТЕГ, ТТХГ, “МИАТ” зэрэг байгууллагын төлөөлөгчид, хэвлэл мэдээллийн байгууллагууд оролцлоо.

Тус эрсдлийн аудитын зорилт нь “АСЕМ”-ыг зохион байгуулсан үйл ажиллагаа, түүний гүйцэтгэл, үр дүнд аудит хийж, зөвлөмж боловсруулан холбогдох байгууллага, албан тушаалтанд танилцуулахад чиглэх бөгөөд төрийн болон хувийн хэвшлийн байгууллагуудыг хамруулах юм.

Ази, Европын дээд түвшний 11 дүгээр уулзалт “АСЕМ”-ын талаарх үндсэн мэдээлэл:

АСЕМ нь 1996 онд 26 гишүүнтэйгээр үйл ажиллагаагаа эхэлсэн бөгөөд өнөөдрийн байдлаар Ази, Европын 51 улс, хоёр олон улсын байгууллагыг нэгтгэсэн Засгийн газар хоорондын яриа хэлэлцээ, хамтын ажиллагааны албан бус үйл явц юм.

АСЕМ-ын яриа хэлэлцээ нь эрх тэгш харилцаа, харилцан хүндэтгэх зарчимд суурилах бөгөөд улс төр, эдийн засаг, нийгэм соёлын нийтлэг, тулгамдсан асуудлыг хэлэлцэн хоёр тивийн харилцааг ойртуулан бэхжүүлэх зорилготой.

АСЕМ-ын үйл ажиллагаа хоёр тивийн улс орнуудын харилцан сонирхсон бүхий л салбарыг хамардаг бөгөөд улс төр, эдийн засаг, нийгэм, соёлын салбарыг хамтын ажиллагааны гурван тулгуур гэж үздэг байна.

Монгол Улсын Ерөнхийлөгч 2008 онд БНХАУ-ын Бээжин хотноо болсон АСЕМ-ын дээд түвшний 7 дугаар уулзалтад анх оролцсон бөгөөд манай улс тус чуулга уулзалтаар гишүүнээр элссэн бөгөөд түүнээс хойш 2010, 2012, 2014 онд болсон дээд түвшний 8, 9, 10 дахь удаагийн уулзалтуудад тасралтгүй оролцсоор ирсэн байна.

Монгол Улсын нийслэл Улаанбаатар хотноо 2016 онд Ази, Европын дээд түвшний 11 дүгээр уулзалт болон дагалдах 9 хуралдааныг зохион байгуулжээ.

Монгол Улсын Ерөнхийлөгчийн 2014 оны 163 дугаар зарлигаар “АСЕМ”-ыг зохион байгуулах ажлыг удирдан зохион байгуулах, чиг үүргээр хангах Үндэсний Зөвлөлийг байгуулж, бүрэлдэхүүнийг нь баталсан байна. Үүнд:

Үндэсний зөвлөлийн дарга: Монгол Улсын Ерөнхий сайд Ч.Сайханбилэг

Үндэсний зөвлөлийн дэд дарга: Гадаад хэргийн сайд Л.Пүрэвсүрэн

Үндэсний зөвлөлийн гишүүд:

Сангийн сайд Б.Болор
Сайд, ЗГХГ-ын дарга С.Баярцогт
Нийслэлийн засаг дарга бөгөөд Улаанбаатар хотын захирагч Э. Бат-Үүл
Ерөнхийлөгчийн аюулгүй байдал, гадаад бодлогын зөвлөх А.Баттөр
Ерөнхийлөгчийн Олон нийтийн харилцааны бодлогын зөвлөх А.Ганбаатар
УИХ-ын даргын Ахлах зөвлөх С.Ламбаа
Ерөнхий сайдын Ахлах зөвлөх Б.Дэлгэрмаа, Б.Батбаяр
Ерөнхий сайдын Олон нийттэй харилцах асуудал эрхэлсэн зөвлөх Ц.Мөнх төр
ҮАБЗ-ийн Ажлын албаны дарга О.Очиржав
Үндэсний зөвлөлийн нарийн бичгийн дарга:

ГХЯ-ны Төрийн нарийн бичгийн дарга Д.Ганхуяг
Тус үйл ажиллагаанд зориулж дараах эх үүсвэрээс хөрөнгө бүрдүүлж, зарцуулжээ. Үүнд:

Улсын төсвийн хөрөнгө
Нийслэлийн төсвийн хөрөнгө
Гадаадын хандив, тусламж
Хөгжлийн банкны хөрөнгө
Бусад эх үүсвэр
Тухайлбал, Гадаад харилцааны сайдын төсвийн багцад улсын төсвөөс 2015 онд 2.5 тэрбум, 2016 онд 21.1 тэрбум, нийт 23.6 тэрбум төгрөг батлагдсанаас 2015 онд 1.5 тэрбум, 2016 онд 19.3 тэрбум, нийт 20.8 тэрбум төгрөгийг зарцуулсан байна.

Гадаад харилцааны сайдын 2016 оны санхүүгийн тайлангийн аудитаар АСЕМ-тай холбоотой нийт 14.8 тэрбум төгрөгийн зөрчил илэрсэн. Тиймээс АСЕМ-д зориулж дээрх эх үүсвэрүүдээс зарцуулсан хөрөнгийн зарцуулалт, гүйцэтгэлд эрсдлийн аудит хийхээр болсон байна.

УИХ-ын Нийгмийн бодлого, боловсрол, соёл, шинжлэх ухааны байнгын хороо, Боловсрол, соёл, шинжлэх ухаан, спортын яам хамтран “Багшийн хөгжлийн тухай хуулийн төсөл” сэдэвт хэлэлцүүлгийг өнөөдөр (2017.11.28) Төрийн ордонд зохион байгуулав.



Хэлэлцүүлэгт УИХ-ын дэд дарга Л.Энх-Амгалан, УИХ-ын гишүүн Г.Мөнхцэцэг, М.Оюунчимэг, Н.Учрал, УИХ-ын гишүүн, Засгийн газрын гишүүн, Хөдөлмөр нийгмийн хамгааллын сайд С.Чинзориг, УИХ-ын гишүүн, Засгийн газрын гишүүн, Боловсрол, соёл, шинжлэх ухаан, спортын сайд Ц.Цогзолмаа болон боловсролын салбарын багш, эрдэмтдийн төлөөлөл оролцсон юм.

Багшийн хөгжлийн тухай хуулийн төслийг танилцуулах хэлэлцүүлгийг нээж УИХ-ын дэд дарга Л.Энх-Амгалан үг хэлэв.

Багш хүн ард түмнийг соён гэгээрүүлэгч, хүүхэд залуучуудын оюун ухааныг хөгжүүлэгч, авъяас билгийг нээн илрүүлэгч, тэднийг амьдарч, хөдөлмөрлөх арга ухаанд сургаж, өөрийн биеэр үлгэрлэн хүмүүжүүлэгч байдаг. Тийм ч учраас өөрийгөө хөгжүүлэх таатай нөхцөлд ажиллах шаардлагатай байна гэж үгийнхээ эхэнд тэмдэглэлээ.



Тэрбээр “Багш хүнийг хөгжүүлэх арга хэрэгсэл үндэслэл муутай, хангалтгүй байгаа гэж үзэж “Багшийн хөгжлийн тухай” хуулийн төслийг өргөн мэдүүлсэн байна. Багшийн нийгэмд оруулж буй хувь нэмрийг бодитой үнэлэх асуудал нь тулгамдсан асуудлын нэг болоод байна. Үүнтэй холбоотойгоор багшийн нэр хүнд, ур чадварын үнэлэмж, багшийн ёс зүйд нийгмийн зүгээс өгч буй үнэлэмж буурч байгааг дурдах хэрэгтэй. Монгол Улсын Засгийн газар эдийн засгийн нөөц бололцоог ашиглан төрийн үйлчилгээний албан хаагчдын бодит орлогыг нэмэгдүүлэх хүрээнд хөдөлмөрийн үнэлэмж, хариуцлагатай нь холбох байдлаар 300 мянга хүртэлх төгрөгийг 2017-2018 онуудад олгохоор шийдвэрлэсэн. Багш болох сонирхолтой хүүхэд залуучуудыг сонгон шалгаруулж, төрөөс санхүүгийн дэмжлэг үзүүлэх, багшид ажлын ур чадвар, үр дүнд суурилсан урамшуулал олгодог тогтолцоотой болох, үүнтэй уялдуулан боловсролын чанарыг хэрхэн сайжруулах, багшийн хөгжлийн төвийг бүх шатны боловсролын байгууллагын дэргэд байгуулж, багшийг ажлын байрандаа тасралтгүй хөгжих боломж нөөцөөр хангах зэрэг заалтууд энэ хуулийн төсөлд туссан. Өнөөдрийн хэлэлцүүлэгт бүх шатны боловсролын байгууллагад ажиллаж байгаа багш нарын болон төрийн бус байгууллагын төлөөлөл оролцож байгаа бөгөөд хуулийн төсөлтэй холбоотой асуудалд өөрсдийн санал бодлоо чөлөөтэй илэрхийлэхийг хүсч байна” гэв.

Үргэлжлүүлэн Багшийн хөгжлийн тухай хуулийн төслийн талаарх танилцуулгыг УИХ-ын гишүүн Н.Учрал хийсэн юм. Мөн багш нарын цалин, нийгмийн баталгааг хэрхэн сайжруулахаар ажиллаж байгаа талаарх товч мэдээллийг УИХ-ын гишүүн, Засгийн газрын гишүүн, Хөдөлмөр, нийгмийн хамгааллын сайд С.Чинзориг оролцогчдод өглөө.

Дараа нь “Багшийн хөгжлийн олон улсын чиг хандлага” сэдвээр УИХ-ын гишүүн, Засгийн газрын гишүүн, Боловсрол, соёл, шинжлэх ухаан, спортын сайд Ц.Цолгзолмаа илтгэл тавилаа.

Тэрбээр “Дэлхийн түвшинд сэтгэж, 21-р зууны “Монгол хүний загвар”-ыг тодорхойлох, монгол хүнийг төлөвшүүлэх мэргэшлийн үндэсний хүрээг боловсруулах, түүнд суурилан боловсролын тогтолцоог бий болгох шаардлагатай. Мөн боловсролын салбарын удирдах ажилтнуудаас орчин үеийн менежментийг мэдэх, хэрэгжүүлэх, бодлогын түвшинд сэтгэх ур чадварыг суулгах шаардлага ч тулгарч байна” хэмээн онцлов.



Мөн “Багшийн хөгжлийн асуудлаар бусад улс орнуудын хуулийн зохицуулалт” сэдвээр Боловсролын хүрээлэнгийн захирал М.Итгэл, “Багшийн хөгжлийн төвийн үйл ажиллагаа, цаашдын чиг хандлага” сэдвээр МУБИС-ийн зөвлөх, академич Б.Жадамба, БМДИ-ийн албаны дарга Ш.Оюунцэцэг нар илтгэл тавьсан юм.



Үргэлжлүүлээд хэлэлцүүлэгт оролцогчид саналаа хэллээ. Тухайлбал, багш бэлтгэх төрийн нэгдсэн бодлоготой болох, хос мэргэжлээр багш бэлтгэх сургалтын хөтөлбөрийг хуульчилж өгөх, ур чадварын нэмэгдлийг эрх тэгш олгодог байх, цэцэрлэгийн багш нарт мэргэжлээ дээшлүүлэхэд дэмжлэг туслалцаа үзүүлдэг байх, сургуулийн захирлыг сонгон шалгаруулахдаа тухайн сургуулийн багш нараас сонгодог байх зэрэг асуудлыг хуулийн төсөлд тусгаж өгөхийг хүсч байлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Японы сүмогийн холбооны дэргэдэх Ёкозунагийн зөвлөл хуралдаж, сүмогийн 70 дахь Ёкокуна

Чөлөөт бөхийн эмэгтэйчүүдийн Дэлхийн цомын тэмцээн ирэх амралтын өдрүүдэд ОХУ-ын Чебоксар хотод болно. Энэ жилийн Дэлхийн цомын тэмцээнд Япон, ОХУ, Монгол, АНУ, БНХАУ, Азербайжан, Швед, Украин гэсэн найман орны баг өрсөлдөх юм. Эмэгтэй чөлөөт бөхөөр дэлхийд тэргүүлэгч гүрэн Дэлхийн цомын найман удаагийн аварга Японы шигшээ баг Хойд хөршид зодоглох бүрэлдэхүүнээ зарласан байна. Наран улсаас 48 кг-ын жинд энэ жилийн дэлхийн аварга Юи Сүсаки, 53 кг-д өнгөрсөн жилийн дэлхийн аварга Маю Мүкаида, 55 кг-д Момока Кадоя, 58 кг-д Акие Ханаи, 60 кг-д Юкако Каваи, 63 кг-д 2014 оны Азийн аварга Юрика Ито, 69 кг-д Мива Морикава, 75 кг-д залуучуудын дэлхийн гурван удаагийн аварга Масако Фүрүичи нар хүч үзнэ.

Налайх дүүргийн гуравдугаар хорооны нутаг, Хонхорын уурхайн эдэлбэр

УИХ-ын гишүүн О.Баасанхүү архидан согтууруулах ундааг өөгшүүлэн дэмжиж, өөрийн ашиг сонирхлын хамаарал бүхий үйлчилгээний газруудад шөнийн 03:00 цаг хүртэл архи худалдаалах эрх олгосон

Нийслэлийн иргэдийн Төлөөлөгчдийн Хурлын ээлжит бус хоёрдугаар хуралдаан хоёр дахь өдрөө Хангарьд ордонд үргэлжилж байна. Өнөө өглөө эхэлсэн уг хурлаар Нийслэлийн 2018 оны төсөв, газар зохион байгуулалт, өмч хувьчлалын асуудлыг цогцоор нь хэлэлцэж эхэллээ.



Нийслэлийн Засаг дарга бөгөөд Улаанбаатар хотын Захирагч С.Батболд хэлэхдээ “УИХ-аар энэ сарын 14-ны өдөр Монгол Улсын 2018 оны төсвийн тухай хуулийг баталсан. Монгол Улсын төсвийн хуульд заасны дагуу төсвийг төлөвлөх явцдаа олон нийтийн оролцоог хангах, олон нийтийн хэлэлцүүлэг зохион байгуулна гэж заасан байдаг. Энэ хуулийн дагуу Нийслэлийн иргэний танхимд 9 дүүргийн 300 гаруй иргэн оролцсон “Улаанбаатар хотын 2018 оны төсвийн нээлттэй хэлэлцүүлэг”-ийг зохион байгуулсан. Хэлэлцүүлэгт гарсан саналыг нийслэлийн санхүү, төсвийн боломжит эх үүсвэрийн хүрээнд судлан, төсөвт тусгасан” гэдгийг онцоллоо.

Улаанбаатар хотын 2018 оны төсөвт 800 тэрбум 356 сая төгрөгийн орлого төвлөрүүлэхээр төлөвлөөд байна. Төсвийн орлогын бүрдүүлэлтийг хот, дүүргээр нь ангилан авч үзвэл, хотын шуудын төсөвт 630.7 тэрбум төгрөгийн орлого төвлөрч, нийслэлийн төсвийн орлогын 78.8 хувийг бүрдүүлэхээр, дүүргүүдийн төсөвт 169.7 тэрбум төгрөгийн орлого төвлөрч, нийслэлийн төсвийн орлогын 21.2 хувийг тус тус бүрдүүлэхээр байна. Ирэх онд нийслэлийн төсвийн орлогын 90.1 хувь буюу 721.5 тэрбум төгрөгийг татварын орлогоор, үлдэх 9.9 хувь буюу 78.9 тэрбум төгрөгийг татварын бус орлогоор бүрдүүлэхээр байна.

Хотын шуудын урсгал зардлын 31.3 хувь буюу 107.1 тэрбум төгрөгийг нийгмийн халамжийн сангийн зардалд, 27.7 хувь буюу 94.8 тэрбум төгрөгийг нийтийн тээврийн хэрэгслээр үнэ төлбөргүй зорчих зардалд болон машин цагийн зардалд, 11.7 хувийг эзлэх 40.2 тэрбум төгрөгийг хот тохижуулах зардалд, 1.5 хувь буюу 5.2 тэрбум төгрөгийг гэмт хэргээс урьдчилан сэргийлэх зардалд, 4.7 хувь буюу 15.9 тэрбум төгрөгийг “Бичил зээл” “ Жижиг дунд үйлдвэрийг хөгжүүлэх” сан”-гийн зардалд тусгасан байна. Дээрх зардлуудыг төсөвт тооцон тусгаснаар хотын шуудын урсгал зардлын нийт дүн 342.2 тэрбум төгрөг болж байгаа юм.

Орон нутгийн хөгжлийн нэгдсэн сангаас нийслэлд хуваарилж байгаа шилжүүлгийн орлого 16.3 тэрбум төгрөгөөр батлагдсан нь 2017 онтой харьцуулахад 4.4 тэрбум төгрөгөөр нэмэгдсэн дүнтэй байна. Улсын тусгай шилжүүлгээр санхүүжих Улаанбаатар хотын боловсрол, эрүүл мэндийн анхан шатны тусламж үйлчилгээ, хүүхэд хөгжил, хамгаалал, газрын харилцааны салбарын санхүүжилтийг 2017 оноос 35.2 тэрбум төгрөгөөр нэмэгдүүлж, 354.5 тэрбум төгрөг байхаар, төсөвт байгууллагын өөрийн орлогыг 9.7 тэрбум төгрөгөөр, нийт 364.2 тэрбум төгрөгөөр тус тус баталсан байна.

2018 онд Нийслэлийн төсвийн хөрөнгөөр 111 тэрбум 585 сая төгрөгийн, нийслэлийн замын сангийн хөрөнгөөр 36 тэрбум 862 сая төгрөгийн, орон нутгийн хөгжлийн сангийн хөрөнгөөр 11 тэрбум 471.3 сая төгрөгийн , нийт 159 тэрбум 919 сая төгрөгийн хөрөнгө оруулалтын төсөл, арга хэмжээг хэрэгжүүлэхээр төлөвлөлөө. 2018 онд Нийслэлийн төсвийн суурь орлогыг 660.9 тэрбум төгрөг, суурь зарлагыг 323.2 тэрбум төгрөг, Төсвийн тухай хуулийн 56 дугаар зүйлийн 2.2 т дахь заалтын дагуу орон нутгийн үндсэн тэнцлийн ашгийн 60 хувь болох 208.5 тэрбум төгрөгийг улсын төсөвт татан төвлөрүүлнэ. Улаанбаатар хотын 2018 оны төсвийн төслийг Нийслэлийн засаг дарга бөгөөд Улаанбаатар хотын захирагч С. Батболд танилцуулсан. Хот байгуулалт, нийгмийн салбар, авто зам, байгаль орчныг хамгаалах, агаарын бохирдолыг бууруулах, хот нийтийн аж ахуйн салбарт нилээд ажил хийхээр төсөвлөж, төлөвлөсөнөө танилцууллаа. Гэр хороололын дахин төлөвлөлтийг үргэлжлүүлж, бичил цэцэрлэг байгуулах, жижиг гудамж хийх, эмнэлгүүдийн гадна зам талбайн тохижилтыг ажлуудыг ч хийнэ гэдгээ хэллээ. Төсөв хэдийн хүндхэн байгаа ч авто замын салбарт ч шинээр барих, өргөтгөх, шинэчлэх ажлуудыг тусгасан гэдгээ НИТХ- ын индэр дээрээс хотын дарга хэллээ.

“Нийслэлийн 2018 оны газар зохион байгуулалтын төлөвлөгөө батлах тухай” танилцуулгыг нийслэлийн Газрын албаны дарга Э.Болорчулуун “Нийслэлийн өмчөөс 2018 онд хувьчлагдах эд хөрөнгийн жагсаалт батлах тухай” танилцуулгыг Нийслэлийн өмчийн харилцааны газрын дарга Ч. Однасан нар хийлээ. Тус хуралд Нийслэлийн аудитын байгууллага санал, дүгнэлтээ танилцуулсан. Хуралдаан асуулт, хариултаар үргэлжилж байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Арктик тивд нохойтой чаргаар 300 км замыг туулдаг “Fjallraven Рolar” олон улсын адал явдалт аялалд Монгол Улсаас

Мэргэжлийн сүмо бөхийн Ёкозунагийн зөвлөл өчигдөр хуралджээ.

Байгаль орчин, аялал жуулчлалын сайд Н.Цэрэнбатад Хууль зүй, дотоод хэргийн яамны Төрийн нарийн бичгийн дарга Г.Баясгалан тэргүүтэй төлөөлөгчид Байгаль орчны салбарын тухай багц хуулийн төслийг хүлээлгэж өглөө. Энэ үйл ажиллагаанд Байгаль орчин, аялал жуулчлалын яамны Төрийн нарийн бичгийн дарга Ц.Цэнгэл, Төрийн захиргааны удирдлагын газрын дарга Х.Батжаргал, Аялал жуулчлалын бодлого зохицуулалтын газрын дарга С.Бат-Эрдэнэ, Ойн бодлого зохицуулалтын газрын дарга М.Тунгалаг, Газар зохион байгуулалт, усны нэгдсэн бодлого зохицуулалтын газрын дарга Ш.Мягмар, Тусгай хамгаалалттай нутгийн удирдлагын газрын дарга Ч.Батсансар, Хяналт шинжилгээ, үнэлгээ, дотоод аудитын газрын дарга Т.Алтангэрэл,Хуулийн хэлтсийн дарга Ч.Раднаабазар, Сав газрын удирдлагын хэлтсийн дарга Н.Баттулга, Цэвэр технологи, хөрөнгө оруулалт, үйлвэрийн хэлтсийн дарга Ц.Уранчимэг нар оролцсон юм.



Хууль зүй, дотоод хэргийн сайдын тушаалаар байгуулагдсан ажлын хэсэг Байгаль орчин, аялал жуулчлалын яаманд 6 сарын хугацаатай ажиллаж, салбарын хууль тогтоомжийн давхардал, зөрчил, хийдлийг тогтоох, уялдаа холбоог сайжруулах ажлыг Германы техникийн хамтын ажиллагааны нийгэмлэгийн Эдийн засгийн тогтвортой хөгжлийн эрх зүйн орчинг баталгаажуулах төсөлтэй хамтран амжилттай гүйцэтгэсний үр дүнд энэхүү хуулийн төслийг өнөөдөр хүлээлгэж өгсөн юм.Ажлын хэсгийнхэн Байгаль орчныг хамгаалах тухай, Усны тухай, Ойн тухай, Амьтны тухай зэрэг байгаль орчны салбарын 19 хуульд дүн шинжилгээ хийж, нийт 142 давхардал, 177 зөрчил, 227 хийдлийг тогтоож, нэгтгэсэн байна.



Хуулийн төслийг хүлээж авах үеэр Байгаль орчин, аялал жуулчлалын сайд Н.Цэрэнбат хэлсэн үгэндээ “Манай салбарын цөөнгүй хууль хоорондоо уялдаа холбоогүйгээс болж иргэд, аж ахуйн нэгжүүд өөрсдөдөө ашигтай байдлаар хуулийг тайлбарлаж, маргаан үүсгэх тохиолдол гардаг. Хуулиудын давхардал, хийдлийг арилгаж, уялдаа холбоог сайжруулснаар байгаль орчны салбарын тухай хуулиуд иргэдэд ойлгомжтой болж, маргаан дэгдээдэг асуудал үгүй болно гэдэгт итгэлтэй байна. Цаашид Байгаль орчны салбарын багц хуулийн төслийг УИХ-аар батлуулахаар Хууль зүй, дотоод хэргийн яамтай хамтран ажиллана” хэмээсэн юм.



Харин Хууль зүй, дотоод хэргийн яамны Төрийн нарийн бичгийн дарга Г.Баясгалан “Зургаан сарын дотор нэг салбарын хуулиудын давхардал, хийдлийг арилгаж, томъёолно гэдэг амаргүй ажил. Энэ ажилд бусад яамыг манлайлан оролцож, туслалцаа үзүүлж ажилласан Байгаль орчин, аялал жуулчлалын яамны хамт олонд талархлаа илэрхийлье. Багц хуулийн төслийг УИХ-ын хаврын чуулганаар хэлэлцүүлэхээр төлөвлөөд байгаа. Н.Цэрэнбат сайд анхаарч ажиллана гэж хэлсэн учир УИХ-аар батлуулна гэдэгт итгэлтэй байна” гэлээ.

УИХ-ын гишүүн Ц.Нямдорж Хууль зүй дотоод хэргийн сайд ажлаа авсан даруйдаа С.Зоригийн хэргийг нууцын зэрэглэлээс гаргана гэдгээ мэдэгдсэн билээ.

“Тогтвортой аялал жуулчлал, тогтвортой хөгжлийн зорилт 2030-д аялал жуулчлалын салбарын оруулах хувь нэмэр” сэдэвт сургалтыг ирэх сарын 5-7-ны хооронд зохион байгуулах гэж байна. Нийслэлийн Аялал жуулчлалын газар Байгаль орчин, Аялал жуулчлалын яамтай хамтран дэлхийн аялал жуулчлалын чиг хандлага, олон улсын туршлагаас суралцах, тус салбарынхны мэдлэг чадварыг дээшлүүлэх зорилгоор хийж байгаа юм.

Сургалтыг Дэлхийн аялал жуулчлалын байгууллагын зөвлөх, зочлох үйлчилгээний олон улсын эксперт, сургагч багш, судлаач Стив Нөүкс удирдан явуулах бөгөөд Байгаль орчин, аялал жуулчлалын яам, Нийслэлийн Аялал жуулчлалын газар, Аялал жуулчлалын хөгжлийн төв, дүүргүүдийн аялал жуулчлал хариуцсан мэргэжилтэн, 21 аймгийн аялал жуулчлалын газрын мэргэжилтэн, аялал жуулчлалын багш, судлаачид, хувийн хэвшлийн байгууллага, аж ахуйн нэгжүүдээс нийт 150 хүн хамрагдана.

Сургалт 3 өдөр үргэлжлэх ба хоёр өдөр танхимын сургалт, нэг өдөр техникийн сургалт явагдана. Чингис хаан зочид буудлын ”Хаан танхим” болон Горхи-Тэрэлжийн цогцолбор газарт явагдах энэхүү эрчимжүүлсэн сургалтаар “Тогтвортой хөгжлийн үзэл баримтлал”, “Тогтвортой хөгжлийн зорилтууд түүнийг аялал жуулчлалтай холбох нь”, “Тогтвортой аялал жуулчлал ба хөгжил” зэрэг сэдвээр өргөн хүрээний мэдлэг олгох юм. Мөн сургалтад бүрэн хамрагдсан оролцогчдод сертификат олгох болно.

Ноён Стив Нөүкс аялал жуулчлалын салбарт 40 гаруй жил ажиллаж байгаа арвин туршлагатай мэргэжилтэн бөгөөд сүүлийн 25 жилийн хугацаанд тэрбээр Дэлхийн Аялал Жуулчлалын Байгууллага, Нэгдсэн Үндэсний Байгууллагын Байгаль орчны хөтөлбөр, Олон Улсын хөдөлмөрийн байгууллага, Дэлхийн Банк, Олон Улсын Санхүүгийн Корпорац, Азийн Хөгжлийн Банкны болон бусад томоохон төсөл, хөтөлбөрүүдийн тогтвортой аялал жуулчлалын төслийн зөвлөхөөр хамтран ажиллаж байна. Аялал жуулчлалын хөгжлийн төвийн 7777-9001 / 9331-1111 дугаарын утсаар холбогдож бүртгүүлэх боломжтой гэж нийслэлийн Аялал жуулчлалын газраас мэдээллээ.

Авлигатай тэмцэх газраас сар бүрийн 25-ны өдөр хэвлэлийн бага хурал зарлаж, авлигын эсрэг хууль тогтоомжийг хэрэгжүүлэх хүрээнд хийсэн ажил, арга хэмжээний талаар мэдээлдэг билээ. Энэ удаа тус газрын Тамгын хэлтсийн дарга, эрхэлсэн комиссар З.Баасанням, Урьдчилан сэргийлэх

Нийслэлийн замын сангийн хөрөнгөөр жил бүр нийтийн тээврийн үйлчилгээний хөдөлгөөний аюулгүй байдлыг хангах, хүртээмжийг нэмэгдүүлэх үүднээс автобусны зогсоолын талбайг шинээр гаргадаг. Дээрх ажлын хүрээнд 2017 онд нийслэлийн дүүргүүдээс болон иргэдээс ирүүлсэн саналд үндэслэн нийслэлийн Тээврийн газар, Замын цагдаагийн алба, нийслэлийн Автозамын хөгжлийн газрын хамтарсан ажлын хэсгийн шийдвэрээр 2017 онд 13 зогсоолын талбай гаргах ажил бүрэн хийгдэж ашиглалтад хүлээж аваад байна.

Дээрх зогсоолуудыг дайран өнгөрч буй 26 чиглэлийн зураглалд өөрчлөлт оруулан баталгаажуулсан ба үйлчилгээг ирэх сарын 1-ний өдрөөс хүргэх болно.

Нийтийн тээврээр үйлчлүүлэгч иргэд та бүхэн үйлчилгээтэй холбоотой санал хүсэлтээ 11323176, 11326352 дугаарын утсанд 24 цагийн турш өгөх боломжтой гэж нийслэлийн Тээврийн газраас мэдээллээ.

Монгол Улсын Гадаад харилцааны сайд

ХБНГУ-ын Монгол дахь Конрад-Аденауэр-Сан компанийн нийгмийн хариуцлагын (КНХ) тухай хэлэлцүүлгийг өнөөдөр Туушин зочид буудлын хурлын танхимд зохион байгуулах гэж байна. Тус хэлэлцүүлгээр Компанийн нийгмийн хариуцлага ба Тогтвортой Хөгжлийн зорилтууд судалгааны ажлын товч танилцуулга хийгдэхээс гадна яагаад компанийн нийгмийн харицлага Монгол улсад чухал болох мөн түүнийг хэрхэн оновчтой нутагшуулах тухай хэлэлцүүлэг өрнөх болно. Хэлэлцүүлэгт УИХ-ын гишүүн асан С. Дэмбэрэл, Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав, Үндэсний Хөгжлийн Газрын судалгаа, шинжилгээний албаны дарга доктор А. Мөнхболд мөн эдийн засагч Б.Найдлаа нар оролцоно.

Бизнесийн ил тод байдал, шинэ технологийг хөгжүүлэх, нийгмийн тэгш бус байдлыг бууруулахад хувь нэмрээ оруулах, хууль тогтоомжийг дээдлэх ёс энэ бүхэн компанийн нийгмийн хариуцлага буюу Corporate Social Resposibility (CSR)-гийн нэг хэсэг. Kомпанийн нийгмийн хариуцлага гэдэг нь энгийнээр хэлбэл байгаль орчны болон нийгмийн асуудлуудыг компаниуд өөрийн бизнесийн үйл ажиллагаандаа уялдуулахыг хэлдэг байна. Өөрөөр хэлбэл хөгжлийн гурван тулгуур болох эдийн засаг, нийгэм, хүрээн буй орчиндоо ээлтэй ашгийн төлөө үйл ажиллагаа явуулахыг ойлгодог байна.

Монгол дахь Конрад-Аденауэр-Сан компанийн нийгмийг хариуцлагыг энэ жилээс эхлэн үйл ажиллагааныхаа нэг зорилт болгосон бөгөөд ирэх жилүүдэд энэ сэдвээр төсөл хөтөлбөр хэрэгжүүлэхээр төлөвлөжээ.

Японы сүмогийн 70 дахь ёкозүна Харүмафүжи болон Таканоива нарын хооронд

Нийслэлийн Хүнс, хөдөө аж ахуйн газрын дарга Д.Баянбат Мияконожо хотын Хөдөө аж ахуйн хэлтсийн дарга Иший Ёшихироог өнөөдөр хүлээн авч уулзлаа. Уулзалтад нийслэлийн Хүнс, хөдөө аж ахуйн газрын дэд дарга Д.Пүрэвсүрэн, Захиргааны хэлтсийн дарга Д.Мягмарсүрэн, Газар тариалангийн хэлтсийн дарга Ц.Төмөртулга, Хүнсний үйлдвэрлэлийн хэлтсийн дарга А.Цэцгээ, Мияконожо хотын Хөдөө, аж ахуйн хэлтсийн Ахлах мэргэжилтэн Нишихита Юүичи, Хөдөө, аж ахуйн хэлтсийн мэргэжилтэн Мацүбара Шиняа болон бусад албаныхан байлцав.

Уулзалтын үеэр Мияконожо хотын Хөдөө аж ахуйн хэлтсийн дарга Иший Ёшихиро Мияконожо хотын Захирагч Икэда Такахисагаас Нийслэлийн Засаг дарга бөгөөд Улаанбаатар хотын Захирагчид хаягласан мэндчилгээг уламжиллаа. Тэрбээр “Энэхүү захидалд хоёр хотын найрамдалт харилцаа мандан бадарч, цэцэглэн хөгжихийг бэлэгшээсэн гэдгийги энд онцлон хэлмээр байна. Мияконожо хот өөрийн брэнд үхрийн махыг гадаадын зах зээлд гаргах ажлын хүрээнд Япон улсаас Монгол Улсад суугаа Элчин сайдын яамнаас зохион байгуулдаг Эзэн хааны төрсөн өдрийн хүндэтгэлийн хүлээн авалтад мияконожо брэнд үхрийн махаар хийсэн зоог танилцуулан сурталчлах юм. Бид бүхэн тус арга хэмжээнд оролцох зорилгоор энэ сарын 27-ноос ирэх сарын 1-ний өдрүүдэд Улаанбаатар хотод айлчилна” гэв.

Нийслэлийн Хүнс, хөдөө аж ахуйн газрын дарга Д.Баянбат “Бид бүхэн хоёр хотын хөдөө аж ахуйн салбарыг өргөжүүлэх гол зорилготой хүмүүс. Тиймээс та бүхэнтэй эл салбарт хамтын ажиллагааг өрнүүлэх талаар цаашид хамтран ажиллахдаа таатай байх болно. Хоёр хотын хамтын ажиллагаа цаашид салбар бүрт олон санал, санаачлагын дагуу өргөжинө гэдэгт итгэлтэй байна” хэмээлээ.

Улаанбаатар хот Япон улсын хотуудаас хамгийн анх Мияконожо хоттой 1999 онд найрамдалт харилцааг тогтоож байсан бөгөөд хоёр хот хооронд соёл урлаг, спорт, аялал жуулчлалын салбарт хамтын ажиллагаа идэвхтэй өрнөж байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.