Хөдөлмөрийн үндэсний нам ХҮН-аас Орон нутгийн сонгуульд ялалт байгуулсан тохиолдолд Нийслэлийн Засаг даргад буюу хотын даргад П.Наранбаярыг нэр дэвшүүлж байгаа талаараа албан ёсоор зарлалаа. П.Наранбаяр нь ХҮН-ын нийслэлийн Намын хорооны даргаар саяхан сонгогджээ.

Мэдээллийн үеэр ХҮН-ын дарга Б.Найдалаа "Бид ирэх аравдугаар сард орон нутаг, нийслэл, дүүргийн сонгууль болох гэж байгаатай холбогдуулан мэдээлэл хийж байна. Орон нутаг, нийслэл, дүүрэг нь аль нэг нам, улс төрийн хүчний бус иргэний сонгууль байдаг. ХҮН нам орон нутгийн сонгуульд үер усгүй, явган хүн явах боломжтой, байшингийн төлөө биш даргын төлөө биш сонгуульд оролцоно. Дүүрэг, нийслэлийн удирдлагаа иргэд өөрсдөө сонгох боломжийн төлөө аль нэг намтай эвсэхгүйгээр дангаараа мөрийн хөтөлбөртэйгөө оролцоход бэлэн байна. ХҮН-ын нийслэлийн намын хорооны дарга П.Наранбаяр сонгогдсон бөгөөд дараагийн хотын даргад нэр дэвшүүлнэ” гэсэн юм.

Харин УИХ-ын гишүүн Т.Доржханд "Нийслэл болон орон нутгийн сонгууль болох гэж байгаатай холбогдуулан бид ямар хотын дарга, ямар хоттой байх вэ гэдгийг бодох хэрэгтэй. Хотынхоо гудамжинд айх аюулгүй орчинд амьдарч, нийтийн тээврээр бүгд үйлчлүүлдэг хотыг аз жаргалтай хот гэж хэлж болно. Ийм хотыг бий болгох ёстой. Нийслэл, дүүрэг, аймгийн Засаг дарга нарыг Ерөнхий сайд томилно гэж эхэлсэн нь Үндсэн хуулийн эсрэг ажиллагаа. Иргэд нь сум, аймаг, дүүрэг, нийслэлийн дарга нараа сонгодог байх ёстой. Улаанбаатар Засаг дарга нийт иргэдээсээ сонгогддог, иргэдийнхээ төлөө үйлчилдэг, хариуцлага хүлээж чаддаг хотын дарга бидэнд хэрэгтэй байна" гэлээ.

С.Сүлд