УИХ-ын 2020 оны ээлжит сонгуулийн үр дүнгээр шинээр бүрдсэн парламентын анхны ээлжит бус чуулган нээлтээ хийлээ. Цар тахлын нөлөө дэлхий дахинд, улмаар манай улсын эдийн засагт хүнд сорилт болж буй энэ цаг үе парламентаас Төсвийн тодотголыг хүссэн ч, эс хүссэн ч шаардаж эхэлсэн.

Тиймдээ ч шинэ парламентын анхны ээлжит бус чуулганаар хэлэлцэх гол асуудал нь Төсвийн тодотгол. 

Үүнийг УИХ-ын дарга Г.Занданшатар "Улсынхаа эдийн засгийг идэвхжүүлэх, нэгэнт бий болсон хүндрэлийг ужгируулахгүй байх, хямралаас эдийн засгаа, баялаг бүтээгчдээ, иргэдээ хамгаалах чиглэлээр Засгийн газраас гаргаж буй шийдвэрүүдийг дэмжиж, авч хэрэгжүүлж эхэлсэн бодлогын арга хэмжээнүүдийг цаашид үргэлжлүүлэхэд нэн шаардлагатай байгаа хууль, тогтоомжуудыг хойшлуулалгүй хэлэлцэн батлах нь бидний үүрэг гэж үзэж байна" хэмээн тодотгосон.

Эдийн засгийн нөхцөл байдал, цаг үеийн шаардлагаа харсан ч УИХ-ын даргын хэлсэн үг бодитой. Гэхдээ үүнтэй агаар нэг чухал асуудлыг бийг Г.Занданшатар дарга дурдсангүй. Тэр нь гадаадад гацсан иргэдээ эх оронд татан авчрах асуудлын тухай.

Угтаа бол хүмүүнлэг Ардчилсан Монгол Улсын хууль тогтоох дээд байгууллагыг даргалж байгаа хүний хувьд ээлжит бус чуулганаар хөндөгдөх нэг асуудал нь гадаадад гацсан иргэд байх болно хэмээсэн нь бол гоё харагдах байлаа. Үндсэн хуульд ч энэ тухай "Эх орондоо хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилго болгоно. Үүний учир Монгол Улсын Үндсэн хуулийг даяар олноо зарлан тунхаглаж байна" дурдсан байдаггүй гэж үү?!

Улсын Онцгой комиссын Шуурхай штабын дарга, хурандаа Б.Ууганбаяр "Гуравдугаар сарын 12-нд бүх нислэг зогсож, бүх хил хаагдсан.

Үүнээс хойш гадаадын 44 улсаас 14370 иргэнээ авч ирсэн. Үүнээс 6010 хүнийг нь хойд, урд хилээр авто замаар авсан. Гурван сард 3 мянга гаруй хүн элчин сайдын яамдуудаар дамжуулан Монголдоо ирэх хүсэлтийг гаргасан байсан. Одоо энэ тоо 10 мянгаас буухаа болисон. Зуны улиралтай холбоотой нэмэгдэж байгаа зүйл бий" хэмээн ярьсан удаатай.

Харин өдгөө гадаадын улс оронд амьдарч байгаа 10 мянга гаруй иргэн эр орондоо ирэх хүсэлт гаргасан тухай албан мэдээ бий. 

Тэдгээр иргэнээ бүгдийг нь нэг дор авчрах боломжгүй учраас тусгай үүргийн онгоц нисгэхээс эхлээд шат дараатай арга хэмжээг Улсын Онцгой комисс, Засгийн газраас авч хэрэгжүүлж байгаа юм. Хаа хаанаа нөхцөл байдал хүнд байгаа ч бүхэл бүтэн тусгаар улсын хувьд иргэдээ эх оронд нь ирэх эрхийг нь үлдээх нь зүйн хэрэг.

Тэр тусмаа Г.Занданшатар дарга шинэ парламентын анхны ээлжит бус чуулганыг нээж үг хэлэхдээ энэ бүгдийг бодолцох нь байв. Адаглаад чуулганы нээлтэд цахимаар оролцсон Дипломат төлөөлөгчийн газар, Олон улсын байгууллагын тэргүүн нарын өмнө Монгол Улс хүмүүнлэг харагдах байлаа.

Г.Эрхэс