Арьс ширний үйлдвэрүүдийг хотоос нүүлгэж, малын гаралтай түүхий эдийг үнэ цэнд оруулан, мал аж ахуйн салбарыг кластераар хөгжүүлэх зорилгоор “Эмээлт эко аж үйлдвэрийн парк” төслийг үе шаттай хэрэгжүүлж байна. Тус парк нь хотын төвөөс 30 км зайд Хан-Уул дүүргийн 13 дугаар хорооны Шар хөвийн хоолойд нийт 539 га талбайг хамарч буй. 

Паркийг эрчим хүчээр хангах “Дулааны цахилгаан станц болон Цэвэрлэх байгууламж”-ийг барьж байгуулах ажлын гүйцэтгэгчийг сонгон шалгаруулж, (EPC+F) гэрээг байгуулсан. Үүнтэй холбогдуулан эрчим хүчний барилга байгууламж барих тусгай зөвшөөрөл авах хүрээнд БОННҮ-ний ажил хийгдэж буй бөгөөд ажлын явц 70 хувьтай байна. Түүнчлэн инженерийн бусад дэд бүтцийн ажил болох үерийн хамгаалалтын барилга байгууламж, технологийн ус хангамжийн барилга байгууламжуудын төсвийг шинэчилж, магадлалын ерөнхий дүгнэлтийг гаргаж байгаа юм. Мөн ундны ус хангамжийн зураг төсвийг шинэчлэх ажлын явц 40 хувьтай үргэлжилж байгаа бол холбоо дохиоллын ажлын зураг тодотгох, төсөвт өртгийг шинэчлэх ажил үргэлжилж байна.

Дулааны цахилгаан станц нь 24 МВт хүчин чадалтай бөгөөд үйлдвэрүүдийг цахилгаан, дулаанаар хангана. Харин цэвэрлэх байгууламж нь хоногт 6700 шоо метр ус цэвэрлэх хүчин чадалтай төдийгүй 20'000 шоо метр хүртэл хүчин чадлыг нэмэгдүүлэх боломжтой.

Үйлдвэрлэл бүрэн хүчин чадлаар ажилласнаар 5600 ажлын байр шинээр бий болж, татварын орлогоор 86.3 тэрбум төгрөг төвлөрүүлэх, хөрөнгө оруулалтын зардлаа 6.7 жилийн хугацаанд нөхөх тооцоолол гарсан. Үүний зэрэгцээ монголын брэнд бүтээгдэхүүнийг дэлхийн зах зээлд гаргах шинэ боломж нээгдэх юм.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС