“Улаанбаатар Трамвай” төслийг нийслэлийн хоёр чиглэлд хэрэгжүүлэхээр төлөвлөсөн. Нэгдүгээр шугам нь Зуслангийн бүс “Зунжин худалдааны төв”-өөс Сүхбаатарын талбай хүртэлх чиглэлд баригдах бол хоёрдугаар шугамыг Архивын ерөнхий газраас Сүхбаатарын талбай чиглэлд хэрэгжүүлнэ.  

Энэхүү нийтийн тээврийн хэрэгсэл нь 100% цахилгаан, эко, байгальд ээлтэй тээврийн хэрэгсэл бөгөөд хөдлөх бүрэлдэхүүн нь хөгжлийн бэрхшээлтэй иргэд зорчиход тохиромжтой, нам тавцант, зорчигчид тав тухтай зорчих, орчин үеийн нийтийн тээврийн хэрэгсэл гэдгээрээ давуу талтай. Трамвайн хөдлөх бүрэлдэхүүн нь лидар радар буюу аюулгүй ажиллагаа систем юм. Өөрөөр хэлбэл, замын тэмдэг болон гэрлэн дохиог автоматаар мэдэрч, жолоодлого хийхэд туслалцаа үзүүлдэг бөгөөд аюулыг мэдэрч осол гарахаас урьдчилан сэргийлэх, ослоос зайлсхийх боломжтой систем аж.  

Харин цахилгаан хангамжийн хувьд, 600 – 750V DC-/direct current/ хүчдэлийн цахилгаан ашигладаг. Улаанбаатар Трамвай төсөлд тогтмол гүйдлийн 750В системийг ашиглах бөгөөд энэ нь олон улсад түгээмэл хэрэглэгддэг, дэвшилтэт технологид суурилсан тоног төхөөрөмжүүдтэй нийцдэг байна. Энэхүү шийдэл нь манай орны нөхцөлд хамгийн оновчтой, найдвартай, үр ашигтай систем ажээ.  

Дохиоллын систем нь трамвайны хөдөлгөөнийг замын уулзвар болон автомашины урсгалтай уялдаж зохицуулна. Өөрөөр хэлбэл, Трамвай уулзварт ойртох үед гэрлэн дохио өөрчлөгдөж, трамвай нь ногоон гэрлээр давуу эрхтэй хөдөлгөөнд оролцдог систем юм.  

“Улаанбаатар Трамвай” төслийн I, II шугамын Техник, эдийн засгийн үндэслэл (ТЭЗҮ)-д эдгээр үзүүлэлтийг тусгасан бөгөөд Зам тээврийн яамны Төмөр замын дэд зөвлөл, Шинжлэх ухаан технологийн зөвлөлөөр хэлэлцэн дэмжиж, мөн тус яамны Хөгжлийн төвөөр магадлуулсан. Түүнчлэн өнгөрсөн долоо хоногт НИТХ-ын Бүсчилсэн хөгжлийн хороо болон АН-ын бүлгийн хуралдаанаар хэлэлцэн, НИТХ-ын ээлжит бус VII хуралдаанаар хэлэлцэхийг дэмжээд байна гэж Нэгдсэн төслийн удирдлагын газраас мэдээлэв.