Их дээд сургуулиудын төлбөр жилээс жилд нэмэгддэг. Энэ жишигээр 2025-2026 оны хичээлийн жилд мөн л нэмэгджээ. Тухайлбал, нэг кредит хичээлийн төлбөр 87000-282000 төгрөгийн хооронд хэлбэлзэж байна. Ингэснээр хагас жилийн хичээлийн төлбөр нь зургаан сая төгрөг давж буй оюутнууд болон тэдний гэр бүлийн эдийн засагт хүндрэл учирч байгаа талаар оюутнууд хэллээ. Тодруулбал, Их дээд сургуулиуд хичээл сонголтоо, хичээлийн шинэ жил эхлэхээс 7-14 хоногийн өмнө нээдэг. Уг хичээл сонголтоо хийхдээ бүх төлбөрөө бүрэн төлөхийг шаарддаг.  Гэвч сургалтын төлбөр жил бүр нэмэгдэж, тооцоолж бэлдэж ирсэн мөнгөнөөс давж асуудал үүсдэг байна. Ийнхүү 2025-2026 оны хичээлийн жилд их дээд сургуулиудын сургалтын төлбөрт хэрхэн өөрчлөлт гарсныг танилцуулж байна.

ШИНЖЛЭХ УХААН ТЕХНОЛОГИЙН ИХ СУРГУУЛЬ

-Нэг кредит хичээлийн дундаж үнэлгээ 187800 төгрөг байна-

ШУТИС-д 2025 оны хичээлийн шинэ жил шинээр элсэн суралцах оюутанд ерөнхий суурь, мэргэжлийн суурь хичээлийн нэг кредитийн үнэлгээ 190000 төгрөг байгаа бол дэвшин суралцаж буй оюутнууд салбар сургуулиасаа хамаарч 185600 болон 190000 мянган төгрөгийн төлбөр төлнө.

МОНГОЛ УЛСЫН БОЛОВСРОЛЫН ИХ СУРГУУЛЬ

-Нэг кредит хичээлийн дундаж үнэлгээ 111450 төгрөг байна-

Эрэлттэй болон тэргүүлэх мэргэжлийн нэг кредитийн үнэлгээ салбар сургуулиасаа хамаараад  91100-135400 мянган төгрөгийн хооронд байна. Харин бусад мэргэжлийн нэг кредитийн үнэлгээ 87300-129800 мянган төгрөгийн хооронд байна.

АНАГААХ ШИНЖЛЭХ УХААНЫ ИХ СУРГУУЛЬ

-Нэг кредит хичээлийн дундаж үнэлгээ 144000 төгрөг байна-

АШУҮИС-ийн жилийн төлбөр мэргэжлээсээ хамаарч дунджаар 5270000 төгрөг бол хамгийн багадаа 3540000 төгрөг. Харин нэг багц цаг нь мэргэжлээсээ хамаарч 118000, 170000 төгрөг байна.

САНХҮҮ ЭДИЙН ЗАСГИЙН ИХ СУРГУУЛЬ

-Нэг кредит нь 282 мянган төгрөг болж нэмэгджээ-

Санхүү эдийн засгийн их сургуулийн нэг кредитийн үнэ 282000 төгрөг болж нэмэгдсэн байна. Оюутнууд нэг улиралд дунджаар 12-21 кредит хичээл сонгон суралцдаг. Ингэснээр нэг жилийн төлбөр зургаан сая төгрөгөөс дээш гарах тооцоо гарч байгаа бөгөөд сургалтын төлбөрийг улирал бүр хоёр хуваан төлөх боломжтойг сургуулиас мэдээллээ.

МОНГОЛ УЛСЫН ИХ СУРГУУЛЬ

-Нэг кредит хичээлийн дундаж үнэлгээ  166250 төгрөг байна-

Ерөнхий суурь хичээлийн нэг кредит хичээлийн төлбөр 154000, харин салбар сургуулиудаас хамааран мэргэжлийн суурь хичээлийн төлбөр 154700-178500 байна.

СОЁЛ УРЛАГИЙН ИХ СУРГУУЛЬ

-НЭГ КРЕДИТ ХИЧЭЭЛИЙН ҮНЭ 155000-

Соёл, урлагийн их сургуульд суралцагчдын нэг кредит хичээлийн үнэ 155000 төгрөгөөр тогтоогдсон. Өмнөх жилээс харьцангуй бага нэмэгдсэн үзүүлэлттэй байна.

Салбар салбарын сургуулийн оюутнуудаас нэг кредит хичээлийн үнэ хэдэн төгрөг байгаа талаар тодрууллаа.

• ШУТИС Геодизийн ангийн 1-р курсийн оюутан А. Сугар /Нэг кредит хичээлийн үнэ 190000 төгрөг/
• ШУТИС-ХХҮДС Үйлдвэрлэлийн дизайны ангийн 3-р курсийн оюутан Б.Үүрийнтуяа/Нэг кредит хичээлийн үнэ 190000 төгрөг, өнгөрсөн жилийн нэг кредит хичээлийн үнэ 157000 төгрөг /
• ШУТИС-ХХҮДС Үйлдвэрлэлийн дизайны ангийн 1-р курсийн оюутан М.Баяртуул /Нэг кредит хичээлийн үнэ 190000 төгрөг/
• ШУТИС-ХХҮДС Интерьер дазайны ангийн 4-р курсийн оюутан Э.Чимэгбаяр /Нэг кредит хичээлийн үнэ 190000 төгрөг, өнгөрсөн жилийн нэг кредит хичээлийн үнэ 147000 төгрөг/
• ШУТИС Уул уурхайн геотехникийн ангийн 4-р курсийн оюутан Д.Дашдорж /Нэг кредит хичээлийн үнэ 186300, /
• Их засаг Гааль татварын эдийн засгийн ангийн 2-р курсийн оюутан Б. Энэрэлт /Нэг кредит хичээлийн үнэ 165000 төгрөг/
• ОУУБИС нийгмийн ажилтны ангийн 4-р курсийн оюутан С.Замбага /Нэг кредит хичээлийн үнэ 140000 төгрөг, өнгөрсөн жилийн нэг кердит хичээлийн үнэ 105000-110000 төгрөг/
• -МУИС-ХЗС  Эрх зүйн хөтөлбөрийн 4-р түвшний оюутан А.Болор-Эрдэнэ /Нэг кредит хичээлийн үнэ 144300 төгрөг, өнгөрсөн жилээс нэмэгдээгүй/
• МУИС Сэтгэл судлалын хөтөлбөрийн 3-р түвшний оюутан /Нэг кредит хичээлийн үнэ 130900, өнгөрсөн жилээс нэмэгдээгүй/
• МУБИС-НХУС Нийгмийн ухааны багшийн ангийн 1-р курсийн оюутан О.Гоомарал /Нэг кредит хичээлийн үнэ 129800 төгрөг/
• МУБИС-НХУС Хятад хэлний багшийн 4-р курсийн оюутан А.Нарантуяа /Нэг кредит хичээлийн үнэ 129800 төгрөг, өнгөрсөн жилийн нэг кредит хичээлийн үнэ 108900 төгрөг/
• АШУҮИС Сувилахуйн хөдөлмөр засалчийн ангийн 1-р курсийн оюутан Г.Дөлгөөн /Нэг кредит хичээлийн үнэ 136000 төгрөг/ 
• ХААИС Барилгын инженжерийн ангийн 1-р курсийн оюутан Б.Ганбаяр /Нэг кредит хичээлийн үнэ 149000 төгрөг/

Нэг кредит хичээлийн үнэ 11-57 мянгаар нэмэгдэж, нийт төлбөрийн хэмжээ 100-600 мянган төгрөгөөр нэмэгдсэн үзүүлэлттэй байна. Төлбөрийн хэмжээ өсч болох ч дагаад цагийн ажил, хөдөлмөр эрхлэлт,  хөдөлмөрийн хөлсний хэмжээгээ адилхан нэмээд өгвөл оюутан залуус, төлбөр нэмэгдлээ гээд жил бүр шаналаад суухгүй л болов уу...

Б.Туяамарал